ኤርሚያስ 50 FHB Father's Heart Bible™

50 ¹እቲ ኣቦና ብዛዕባ ባቢሎን፥ ምድሪ ባቢሎናውያን፥ ብነቢይ ኤርሚያስ ኣቢሉ ዝተዛረቦ ቃል፦

²ኣብ ማእኸል ኣህዛብ ኣፍልጡ፥ ኣውጅዎ ድማ፤ ሰንደቕ ኣልዕሉ ኣውጅዎ ድማ፤ ሓደ እኳ ኣይትሕብኡ። ከምዙይ በሉ፦ ባቢሎን ተማርኸት፤ ቤል ሓፈረ፥ ማርዱክ ተሰብረ። ምስልታት ባቢሎን ሓፈሩ፥ ጣዖታት ድማ ተሰባበሩ። ^a a v2 ቤልን ማርዱክን ሓለቓ ኣማልኽቲ ባቢሎን ነበሩ። ³ካብ ሰሜን ሓደ ህዝቢ ናብኣ ይድይብ ኣሎ እሞ፥ ንሱ ነታ ምድሪ ባድማ ክገብራ እዩ፤ ኣብኣ ድማ ሓደ እኳ ኣይነብርን። ሰብን እንስሳን ድማ ሃዲሞም ጠፊኦም።

⁴በተን መዓልቲታት እቲኣተን፥ በቲ ጊዜ እቱይ ድማ፥ ይብል ኣቦና፥ ደቂ እስራኤል፥ ንሳቶምን ደቂ ይሁዳን፥ ሓቢሮም ክመፁ እዮም፤ እናበኸዩ ክኸዱ እዮም፤ ንኣቦኦም ድማ ክደልዩ እዮም። ⁵ናብ ፅዮን ዝወስድ መንገዲ ክሓቱ እዮም፥ ገፆም ድማ ናብኣ ኣቢሎም፤ “ንዑ፥ ብናይ ዘለኣለም ኪዳን ምስ ኣቦና ንተኣሳሰር፥ ንሱ ድማ ፈፂሙ ኣይርሳዕን እዩ።” ⁶ህዝበይ ዝጠፍኡ ኣባጊዕ ኮይኖም ነበሩ፤ ጓሶቶም ኣስሓትዎም፤ ናብ ኣኽራን ድማ ፈነውዎም። ካብ እምባ ናብ ኰረብታ ኰለል በሉ፤ ዝዓርፉሉ ቦታ ድማ ረስዑ። ⁷ዝረኸብዎም ዅሎም በልዕዎም፥ ፀላእቶም ድማ ከምዙይ በሉ፦ “ንሕና በደለኛታት ኣይኮናን፤ ኣብ ልዕሊ እግዚኣብሄር፥ እቲ ናይ ሓቂ መጓሰዪኦም፥ ስለ ዝሓጥኡ፥ ኣብ ልዕሊ እግዚኣብሄር፥ ተስፋ ኣቦታቶም፥ ስለ ዝሓጥኡ።” ⁸ካብ ማእኸል ባቢሎን ህደሙ፤ ካብ ምድሪ ባቢሎናውያን ውፁ፤ ከምቶም ነቲ መጓሰ ዝመርሑ ተባዕትዮ ኣጣል ኩኑ። ⁹እንሆ፥ ኣብ ልዕሊ ባቢሎን ዘበራብሮን ዘምፅኦን፥ ካብ ምድሪ ሰሜን ዝመፅእ ጉባኤ ዓበይቲ ኣህዛብ እዩ፤ ኣብ ልዕሊኣ ክስለፉ እዮም፥ ካብኡ ድማ ክትማረኽ እያ። ፍላፃኦም ከም ናይ በሊሕ ተዋጋኢ እዩ፥ ጥራሕ ኢዱ ዘይምለስ። ¹⁰ባቢሎን ክትዝመት እያ፤ ዝዘምትዋ ዅሎም ክፅገቡ እዮም፥ ይብል ኣቦና።

¹¹ኣቱም ዘመትቲ ርስተይ፥ ስለ እትሕጐሱ፥ ስለ እትፍስሁ፥ ከም እኽሊ እትረግፅ ጊደር ስለ እትዘልሉ፥ ከም ኣፍራስ ድማ ስለ እትሕርኑ፥ ¹²ኣዴኹም የመና ክትሓፍር እያ፤ እታ ዝወለደትኩም ድማ ክትዋረድ እያ። እንሆ፥ ካብ ኣህዛብ ዳሕረወይቲ ክትከውን እያ፤ በረኻን ንቑፅ ምድርን ምድረ በዳን ክትከውን እያ። ¹³ብሰንኪ ቝጥዓ ኣቦና ሰብ ኣይነብረላን፤ ፈፂማ ክትባድም እያ። ብባቢሎን ዝሓልፍ ዅሉ ክግረም፥ ብዅሉ ቝስሊ ድማ ፃፂ ክብል እዩ። ¹⁴ኣቱም ኵሉኹም ቀስተኛታት፥ ብዙርያኣ ኣብ ልዕሊ ባቢሎን ተሰለፉ፤ ናብኣ ውርውሩ፤ ፍላፃ ኣይትቆጥቡ፤ ኣብ ልዕሊ ኣቦና ሓጢኣት ገይራ እያሞ። ¹⁵ብዅሉ ወገን ኣብ ልዕሊኣ ዓው በሉ፤ ኢዳ ሂባ እያ። ግምብታታ ወዲቖም፤ መናድቓ ፈሪሶም። እዙይ ፍርዲ ኣቦና እዩ እሞ፥ ኣብ ልዕሊኣ ፍርዲ ፈፅሙ፤ ከምቲ ዝገበረቶ ግበሩላ። ¹⁶ካብ ባቢሎን ነቲ ዘራእን ነቲ ዓፃድን ቍረፁ። ካብ ቅድሚ ሰይፊ እቲ ጨቛኒ ነፍሲ ወከፍ ናብ ህዝቡ ክምለስ እዩ፥ ነፍሲ ወከፍ ድማ ናብ ምድሩ ክሃድም እዩ።

¹⁷እስራኤል ፋሕ ዝበለ መጓሰ ኣባጊዕ እዩ፤ ኣናብስ ሰጒጎምዎ። ቅድም ንጉስ ኣሶር በልዖ፥ ሕዚ ኸዓ ኣብ መወዳእታ ናቡከደነፆር ንጉስ ባቢሎን ኣዕፅምቱ ሓኸኾ።

¹⁸ኣቦ ሰራዊት ሰማይ፥ ኣቦና ናይ እስራኤል፥ ከምዙይ ይብል ኣሎ፦ ከምቲ ንንጉስ ኣሶር ዝቐፃዕክዎ፥ ንንጉስ ባቢሎን፥ ንምድሩ ድማ ክቐፅዕ እየ። ¹⁹ንእስራኤል ናብ መጓሰዪኡ ክመልሶ እየ፥ ኣብ ቀርሜሎስን ባሳንን ድማ ክጓሰ እዩ፤ ኣብ እምባታት ኤፍሬምን ገለዓድን ነፍሱ ክትፀግብ እያ። ²⁰በተን መዓልቲታት እቲኣተን፥ በቲ ጊዜ እቱይ ድማ፥ ይብል ኣቦና፥ በደል እስራኤል ክድለ እዩ፥ ግናኸ የለን፤ ሓጢኣት ይሁዳ ክድለ እዩ፥ ሓደ እኳ ኣይርከብን፤ ነቶም ብህይወት ዘትርፎም ተረፍ ይቕረ ክብለሎም እየ እሞ።

²¹ናብ ምድሪ ምራታይም ደይብ፥ ናብቶም ኣብ ጶቆድ ዝነብሩ ድማ። ቅተሎም፥ ፈፂምካውን ኣጥፍኣዮም፥ ይብል ኣቦና፤ ኵሉ እቲ ዝኣዘዝኩኻ ግበር። ²²ድምፂ ውግእ ኣብ ምድሪ ኣሎ፥ ዓብዪ ጥፍኣት ድማ ኣሎ። ²³መዶሻ ብዘላ ምድሪ ከመይ ኢሉ ተቘሪፁን ተሰይሩን! ባቢሎን ከመይ ኢላ ኣብ ማእኸል ኣህዛብ መገረሚ ኮይና! ²⁴ኦ ባቢሎን፥ መፈንጠር ኣፃወድኩልኪ፥ ንስኺ ከይፈለጥኪ ድማ ተታሓዝኪ፤ ምስ ኣቦና ስለ እተፃረርኪ፥ ተረኺብኪ ተታሓዝኪ።

²⁵ኣቦና መኽዘን ኣፅዋሩ ከፊቱ ኣፅዋር ቍጥዓኡ ኣውፅአ፥ ኣቦ ሰራዊት ሰማይ ኣብ ምድሪ ባቢሎናውያን ዝሰርሖ ዕዮ ኣለዎ እሞ። ²⁶ናብኣ ምፁ ካብ ኵሉ ወገን፤ ኣብያተ እኽላ ክፈቱ፤ ከም ኵምራ እኽሊ ኵምርዋ። ፈፂምኩም ኣጥፍእዋ፤ ሓደ እኳ ኣይትረፋ። ²⁷ኵሎም መንእሰያት ኣብዑር ቅተሉ፤ ናብ ማሕረዲ ይረዱ። ወይለኦም፥ መዓልቶም መፂኣ እያ እሞ፥ ጊዜ መቕሰፍቶም እዩ። ²⁸ስምዑ! እቶም ህዱማትን ዘምለጡን፥ ካብ ምድሪ ባቢሎን፥ ፍርዲ ኣቦና፥ ፍርዲ ቤተ መቕደሱ ኽነግሩ፥ ናብ ፅዮን ይመፁ ኣለዉ። ²⁹ኣብ ባቢሎን ቀስተኛታት ፀውዑ፥ ኵሎም እቶም ቐስቲ ዝገትሩ። ኣብ ዙርያኣ ብኵሉ ወገን ሰፈሩ፤ ሓደ እኳ ኣይምለጥ። ከም ግብራ ፍደይዋ፤ ከምቲ ዝገበረቶ ኵሉ ግበሩላ። ኣብ ልዕሊ ኣቦና፥ ኣብ ልዕሊ ቅዱስ እስራኤል ተዐቢያ እያ እሞ።

³⁰ስለዙይ መንእሰያት ኣብ ኣደባባያት ክወድቁ እዮም፥ ኵሎም ተዋጋእቲ ድማ በታ መዓልቲ እቲኣ ስቕ ክብሉ እዮም፥ ይብል ኣቦና። ³¹እንሆ፥ ኦ ዕቡይ፥ ኣነ ኣንፃርካ እየ፥ ይብል ኣቦ ሰራዊት ሰማይ፥ መዓልትኻ መፂኣ እያ እሞ፥ እታ ዝቐፅዓካ ጊዜ እያ። ³²እቲ ዕቡይ ተዓንቂፉ ክወድቕ እዩ፥ ዜተንስኦ ድማ የለን። ኣብ ከተማታቱ ሓዊ ከንድድ እየ፥ ኣብ ዙርያኡ ዘሎ ዅሉ ድማ ክበልዕ እዩ። ³³ኣቦ ሰራዊት ሰማይ ከምዙይ ይብል ኣሎ፦ ደቂ እስራኤል ተጨቊኖም ኣለዉ፥ ደቂ ይሁዳ ድማ ምሳቶም። እቶም ዝማረኽዎም ኵሎም ኣጥቢቖም ሒዞምዎም፤ ክሰድዎም ድማ ኣበዩ።

³⁴መድሓኒኦም ብርቱዕ እዩ፤ ስሙ ኣቦ ሰራዊት ሰማይ እዩ። ንሱ ብርግፅ ጉዳዮም ክማጐተሎም እዩ፤ ንምድሪ ዕረፍቲ ኽህባ፥ ነቶም ኣብ ባቢሎን ዝነብሩ ግና ራዕዲ ኽህብ እዩ።

³⁵ሰይፊ ኣብ ልዕሊ ባቢሎናውያን፥ ይብል ኣቦና፥ ኣብ ልዕሊ እቶም ኣብ ባቢሎን ዝነብሩ፥ ኣብ ልዕሊ መሳፍንታን ጠቢባንን! ³⁶ሰይፊ ኣብ ልዕሊ ሓሰውቲ ነቢያት፥ ዓሻታት ድማ ክኾኑ እዮም! ሰይፊ ኣብ ልዕሊ ጀጋኑ፥ ክስበሩ ድማ እዮም! ³⁷ሰይፊ ኣብ ልዕሊ ኣፍራስን ሰረገላታትን፥ ኣብ ልዕሊ ኵሎም እቶም ኣብ ማእኸላ ዘለዉ ጓኖት ሰራዊት፥ ከም ኣንስቲ ድማ ክኾኑ እዮም! ሰይፊ ኣብ ልዕሊ መዛግብቲ፥ ክዝመቱ ድማ እዮም! ³⁸ድርቂ ኣብ ልዕሊ ማያት፥ ክነፅፉ ድማ እዮም! ምድሪ ጣዖታት እያሞ፥ በቶም ዘፍርሕ ምስልታቶም ይዕብዱ። ³⁹ስለዙይ ኣራዊት ምድረ በዳን ዝብዕታትን ኣብኣ ክነብሩ እዮም፤ ሰገናትውን ኣብኣ ክነብራ እየን። ድሕሪ ደጊም ሰብ ኣይነብረላን፤ ብዅሉ ወለዶ ኸዓ ዝነብረላ ሰብ ኣይህሉን እዩ። ⁴⁰ከምቲ ኣቦና ንሶዶምን ጎሞራን ነተን ጐረባብተን ከተማታትን ዝገልበጦ፥ ይብል ኣቦና፥ ከምኡ ኣብኣ ሓደ እኳ ኣይነብርን፤ ወዲ ሰብ ኣብኣ ኣይሓድርን። ⁴¹እንሆ፥ ህዝቢ ካብ ሰሜን ይመፅእ ኣሎ፤ ዓብዪ ህዝብን ብዙሓት ነገስታትን ድማ ካብ ወሰን ምድሪ ይለዓሉ ኣለዉ። ⁴²ቀስትን ኵናትን ይሕዙ፤ ጨካናት እዮም፥ ኣይምሕሩን ድማ። ድምፆም ከም ባሕሪ ይጓዝም፤ ኣብ ኣፍራስ ተወጢሖም፥ ኣቲ ጓል ባቢሎን፥ ከም ሰብኣይ ንውግእ ኣብ ልዕሌኺ ተሰሊፎም ኣለዉ። ⁴³ንጉስ ባቢሎን ወረኦም ሰሚዑ፥ ኣእዳዉ ድማ ላሕለሐ። ቅልውላው ሓዞ፥ ከም ሕርሲ ሰበይቲ ዝኾነ ቃንዛ ድማ። ⁴⁴እንሆ፥ ከም ኣንበሳ ካብ ዱር ዮርዳኖስ ናብ ፅኑዕ መጓሰዪ ዝድይብ፥ ብቕፅበት ዓይኒ ንባቢሎን ካብታ ምድሪ ከሳጕጋ እየ፥ ነቲ ዝሓረኽዎ ድማ ኣብ ልዕሊኣ ክሸሞ እየ። ከማይ መን ኣሎ? ንኣይ ዝፅውዕ መን እዩ? ኣብ ቅድመይ ደው ክብል ዝኽእል ጓሳ መን እዩ?

⁴⁵ስለዙይ እቲ ኣቦና ኣብ ልዕሊ ባቢሎን ዝመኸሮ ምኽሪ ስምዑ፥ ኣብ ልዕሊ ምድሪ ባቢሎናውያን ዝሓንፀፆ ሓሳባትውን ስምዑ፦ ብርግፅ ናእሽቱ መጓሰኦም ክጓተቱ እዮም፤ ብርግፅ መጓሰዪኦም ብመወዳእታኦም ክግረም እዩ። ⁴⁶ባቢሎን ብእትምረኸሉ ድምፂ ምድሪ ክትንቀጥቀጥ እያ፥ ኣውያት ድማ ኣብ ማእኸል ኣህዛብ ክስማዕ እዩ።