Me basika na mukanda
Dibuku

Mbikudulu ya Tata samu na Babilone

Kimfumu yina nataka Yuda na bunkole, yawu mosi me baka lufundusu: Bele me kuma na nsoni, bibaka me bwa, mpe ntoto me bikana na bambwa ya mfinda. Na ntangu yina, Isayeli ti Yuda ke vutuka na bidilu, ke yufula nzila ya kukwenda na Siyone mpe na Tata ya bawu, ba ke sosa masumu ya bawu kasi ke zwa yawu ve, mpe Mukuli ya bawu kele ngolo.

Tata ya beto ke zonza na bavese 2–24, 30–33, 35–44

Kapu 50.

Mambu yina Tata ya beto tubaka na yina me tadila Babilone, yinsi ya bantu ya Babilone, na nzila ya mumbikudi Yelemi:

Beno zabisa na kati ya makanda ya bantu mpe beno mwangisa yawu; beno nanguna kidimbu mpe beno mwangisa yawu; beno bumba ata kima ve. Beno tuba: Ba me baka Babilone; Bele me kuma na nsoni, Maladuke me pasula. Biteki ya yandi me kuma na nsoni, banzambi ya yandi ya biteki me pasula. a a v2 Bele mpe Maladuke vwandaka banzambi ya nene ya Babilone. Samu dikanda mosi ke basika na node samu na kunwanisa yandi; yawu ke kitula yinsi ya yandi kisika ya kumwangana, mpe ata muntu mosi ve ke zinga na yawu. Bantu mpe bibulu me kima; bawu me kwenda.

Na bilumbu yina mpe na ntangu yina, Tata ya beto ke tuba, bana ya Isayeli ke kwiza, bawu mpe bana ya Yuda kumosi; bawu ke kwenda na kudila ntangu bawu ke tambula, mpe bawu ke sosa Tata ya bawu. Bawu ke yufula nzila ya kukwenda na Siyone, bawu ke tala na ndambu ya kuna: «Beno kwiza, beto vukana na Tata ya beto na ngwisani ya seko yina ba ke zimbana yawu ve ata ntangu mosi.» Bantu ya munu me kuma mameme yina me zimbana; bavungi ya bawu bendaka bawu na nzila ya mbi, bawu bikaka bawu kwenda na myongo. Bawu vwandaka yima-yima katuka na mongo tii na mongo ya nkaka; bawu zimbanaka kisika ya bawu ya kupema. Bantu nyonso yina monaka bawu vwandaka dya bawu, mpe bambeni ya bawu tubaka: «Beto kele ve na kifu, samu bawu salaka masumu na Yave, kisika ya bawu ya kyeleka ya kudila, Yave, kivuvu ya batata ya bawu.» Beno kima na kati ya Babilone; beno basika na yinsi ya bantu ya Babilone, mpe beno vwanda bonso bankombo ya babakala yina ke kwendaka na ntwala ya mukangu. Samu beno tala, mu ke na kutelemisa mpe kunata na ntwala ya Babilone mukangu ya makanda ya nene katuka na yinsi ya node. Bawu ke tandama na milonga samu na kunwanisa yandi, mpe katuka kuna, ba ke baka yandi. Makonga ya bawu ke pumbuka bonso ya kinwani ya mayela yina ke vutukaka ve na maboko ya mpamba. Ba ke botola yinsi ya bantu ya Babilone; bantu nyonso yina ke botola yandi ke yukuta, Tata ya beto ke tuba.

Samu beno ke yangalala, samu beno ke sala kyese, beno bantu yina ke botolaka mvwilu ya munu, samu beno ke dumuka bonso ngombe ya kento yina ke dyata bambuma mpe beno ke dila bonso bampunda ya babakala, mama ya beno ke kuma na nsoni mingi; yina butaka beno ke kuma na nsoni. Beno tala, yandi ke kuma ya nsuka na kati ya makanda— yinsi ya kuyuma, ntoto ya mpwila ya maza, nseke. Samu na makasi ya Tata ya beto, bantu ke zinga na yandi ve; yandi ke kuma kisika ya kumwangana ya mvimba. Konso muntu yina ke luta pene-pene ya Babilone ke yituka mpe ke seka yandi samu na bamputa ya yandi nyonso. Beno baka bisika ya beno samu na kunwanisa Babilone na zunga nyonso, beno nyonso yina ke sadilaka minani. Beno losila yandi makonga; beno yimina makonga ve, samu yandi salaka masumu na Tata ya beto. Beno boka samu na kunwanisa yandi na ndambu nyonso; yandi me kukipesa. Banzo ya yandi ya nda-nda me bwa; ba me bwisa bibaka ya yandi. Samu ti yayi kele kitumbu ya Tata ya beto, beno pesa yandi kitumbu; beno sala yandi bonso yandi salaka. Beno katula na Babilone muntu ya kukuna mpe muntu ya kukatula bambuma. Na mantwala ya mbele ya muntu ya kunyokola, konso muntu ke vutuka na bantu ya yandi mosi, mpe konso muntu ke kima na yinsi ya yandi mosi.

Isayeli kele mukangu ya mameme yina me mwangana, yina bankosi me kimisa. Ntete, ntinu ya Asule dyaka yandi, mpe ntangu yayi na nsuka, Nebukadnesare ntinu ya Babilone me dya mikwa ya yandi.

Tata ya binwani ya zulu, Tata ya beto ya Isayeli, ke tuba mutindu yayi: Mu ke pesa kitumbu na ntinu ya Babilone mpe na yinsi ya yandi, mutindu mu pesaka kitumbu na ntinu ya Asule. Mu ke vutula Isayeli na kisika ya yandi mosi ya kudila, mpe yandi ke dikila na Kaamele mpe na Basane; na myongo ya Efalayime mpe ya Ngalaade, moyo ya yandi ke yukuta. Na bilumbu yina mpe na ntangu yina, Tata ya beto ke tuba, ba ke sosa masumu ya Isayeli kasi yawu ke vwanda ve; ba ke sosa masumu ya Yuda kasi ba ke mona ata mosi ve, samu ti mu ke lolula bantu yina me bikana, yina mu ke bika na luzingu.

Beno yuluka samu na kunwanisa yinsi ya Melatayime, mpe bantu yina ke zinga na Pekode. Beno fwa bawu mpe beno manisa bawu na kufwa, Tata ya beto ke tuba; beno sala mambu nyonso yina mu me tumisa beno. Makelele ya mvita kele na yinsi, mpe lufwa ya nene. Mutindu ba me zenga kikonkoto ya ntoto ya mvimba mpe ba me pasula yawu! Mutindu Babilone me kuma kima ya nsisi na kati ya makanda! Mu tulaka mutambu samu na nge, Babilone, mpe nge kangamaka kaka na ntwala nge zaba yawu. Ba monaka nge mpe ba kangaka nge samu ti nge nwanisaka Tata ya beto.

Tata ya beto me kangula yinzo ya yandi ya kubumbila binwanunu mpe me basisa binwanunu ya nkele ya yandi, samu ti Tata ya binwani ya zulu kele na kisalu ya kusala na yinsi ya bantu ya Babilone. Beno kwiza nwanisa yandi katuka na bandambu nyonso; beno kangula bibumbulu ya yandi ya bambuma; beno tula yawu mutindu bampandu ya bambuma. Beno manisa yawu na kufwa; bika ti ata kima mosi kubikana ve na yawu. Beno fwa bangombe ya yandi nyonso ya baleki ya babakala; bika ti bawu kulumuka na kisika yina ba ke fwa bawu. Kyadi samu na bawu, samu ti kilumbu ya bawu me kwiza, ntangu ya kitumbu ya bawu. Beno wa! bantu yina me kima mpe bantu yina me tina na yinsi ya Babilone, ke kwiza na Siyone samu na kuzabisa mambu ya kudedama ya Tata ya beto, mambu ya kudedama ya yandi samu na Yinzo ya yandi ya Longo. Beno bokila bantu ya minani samu na kunwanisa Babilone, bantu nyonso yina ke bendaka munani. Beno zungidila yandi na bandambu nyonso; bika ti ata muntu mosi kutina ve. Beno vutudila yandi mutindu mavanga ya yandi; beno sala yandi mambu nyonso yina yandi me sala. Samu ti yandi me sala lunangu na mantwala ya Tata ya beto, na mantwala ya Muntu ya Longo ya Isayeli.

Ni yawu yina, baleki ya yandi ke bwa na banzila ya yandi, mpe binwani ya yandi nyonso ke vwanda pi na kilumbu yina, Tata ya beto ke tuba. Beno tala, mu kele mbeni ya nge, nge muntu ya lunangu, Tata ya binwani ya zulu ke tuba, samu ti kilumbu ya nge me kwiza, ntangu yina mu ke pesa nge kitumbu. Muntu ya lunangu ke bula dikulu mpe ke bwa, ata muntu mosi ke telemisa yandi ve. Mu ke pela tiya na bambanza ya yandi, mpe yawu ke dya bima nyonso yina me zungidila yandi. Tata ya binwani ya zulu ke tuba mutindu yayi: Ba me niokola bantu ya Isayeli, mpe bantu ya Yuda kumosi na bawu. Bantu nyonso yina botolaka bawu ke simba bawu ngolo; bawu ke buya kubika bawu kukwenda.

Muntu yina ke kuula bawu kele na ngolo; Tata ya binwani ya zulu kele nkumbu ya yandi. Ya kyeleka, yandi ke nwanina dyambu ya bawu, samu na kupesa ntoto kupema, kasi kupesa mpasi na bantu yina ke zinga na Babilone.

Mbele samu na bantu ya Babilone, Tata ya beto ke tuba, mpe samu na bantu yina ke zinga na Babilone, mpe samu na bamfumu ya yandi mpe bantu ya ndwenga ya yandi! Mbele samu na bamimbikudi ya luvunu, mpe bawu ke kuma bilawu! Mbele samu na binwani ya yandi, mpe ba ke pasula bawu! Mbele samu na bampunda ya yandi mpe bapusu-pusu ya yandi, mpe samu na binwani nyonso ya banzenza yina kele na kati-kati ya yandi, mpe bawu ke kuma mutindu bakento! Mbele samu na bima ya ntalu ya yandi, mpe ba ke botola yawu! Kuyuma samu na maza ya yandi, mpe yawu ke yuma! Samu ti yawu kele yinsi ya biteki, mpe bawu ke kuma bilawu samu na biteki ya bawu ya nsisi. Yo yina, bibulu ya nseke mpe bambwa ya mfinda ke zinga kuna, mpe bandeke ya nene ke zinga na yandi. Yawu ke vwanda dyaka ve na bantu, mpe ata muntu ke zinga na yandi ve na mabuta nyonso ya ke kwiza. Mutindu Tata ya beto bebisaka Sodome ti Gomore mpe bambanza ya pene-pene na yawu, Tata ya beto ke tuba, mutindu mosi, ata muntu ke zinga kuna ve; ata mwana-muntu ke bikana na yandi ve. Beno tala, kibuka ya binwani ke kwiza katuka na node; dikanda ya nene mpe bantinu mingi ke telama katuka na bandilu ya ntoto. Bawu ke simba minani mpe makonga; bawu kele bantima-ngolo mpe bawu ke wila kyadi ve. Makelele ya bawu ke duma bonso mbu ntangu bawu ke tambula na bampunda, bawu me kubama mutindu muntu samu na mvita, samu na kunwanisa nge, Mwana-nkento ya Babilone. Ntinu ya Babilone me kuwa nsangu ya bawu, mpe maboko ya yandi me lemba. Boma me simba yandi, mpasi bonso nkento yina ke buta. Beno tala, bonso nkosi yina ke katuka na matiti ya mingi ya Yolodani samu na kukwenda na kisika ya kudya ya ngolo, na mbala mosi, mu ke kimisa Babilone na yinsi ya yandi, mpe mu ke tula na zulu ya yandi muntu yina mu ke sola. Samu ti nani kele bonso munu? Nani lenda bokila munu? Muvungi ya nkutindu lenda telama na ntwala ya munu?

Yo yina, beno wa mabanza yina Tata ya beto me baka samu na kunwanisa Babilone mpe mambu yina yandi me yidika samu na kunwanisa yinsi ya bantu ya Babilone: Ya kyeleka, bana-fyoti ya mameme ya bawu ba ke benda bawu; ya kyeleka, kisika ya kudya ya bawu ke yituka samu na mambu yina ke bwila bawu. Na makelele ya ntangu ba ke botola Babilone, ntoto ke ningana, mpe ba ke kuwa kudila ya yandi na kati ya makanda.