Khalatlui 1

1 ¹Mosesna tuibing hi Jordan kānda, lamhāngli, Suph kāroda Arabahli, Paran eina Tophel, Laban, Hazeroth, kala Dizahabwui ngachaili Israel katongali hānga. ²Horebwui eina Seir Kaphungwui shongfa eina Kadesh-barnea tāshungda hi tharāda akhathangwui shongzāna. ³Zingkum hangmatiwui thili, kachāng tharāda akhawui kharethang, ithumwui Avāna athumwui vang ali kakaso saikora chi Mosesna Israelli hānga, ⁴Heshbonli kapama Amorwui awunga Sihon, kala Ashtaroth eina Edre-ili pamkasā Bashanwui awunga Ogli ana yuikahaiwui thilina. ⁵Jordan kānda, Moab ngaleili, Mosesna ain hi pheichithei phokta hānga:

⁶Ithumwui Avāna Horebli ithumli hānga, "Nathum kaphung hili sāngnā ngayurpamhaira.

⁷Ngareikhuida Amorwui kaphungram kala athumwui khongnainao saikora, Arabah, kaphungram, angako, Negeb, ngayiphei, Canaan ngalei, Lebanon, kala Euphrates kong khare tāshungda vālu. ⁸Yanglu, ina ngalei chi nathumwui mangāli phāhaira. Vāda, navā ngarā Abraham, Isaac, kala Jacob, kala athumwui thili athumwui atheibingli mikhavai ina khangashit sākahai ngalei chi shimlui khuilu."

Otphun Ngasoda Phung

⁹Atam chili ina nathumli hānga, "Ina imāngna nathumli maphungrarmara. ¹⁰Nathumwui Avāna nathumli mataisangmihaira, kala aja nathum kazingramwui sirā thāda kachungkha ngasāhaira. ¹¹Ithumwui Avāna nathumli thing shida mataisangmida, ana nathumli ngashit kahai athishurda somiranu. ¹²Ina imāngna nathumwui kala nathumwui nganangwui kharit kala otphun chi kathāda phungra? ¹³Nathumwui shangbingwui vang thangmei, theishingkakhui, kala kashārang mibing kapangkhuilu, kala ina athumli nathumwui kathāna phāsangra."

¹⁴Kala nathumna ili ngahānkai, "Nana hāngkahai tui chi ithumna sākhavai phālakhaira." ¹⁵Chieina ina nathumwui shangbingwui kathānabing, thangmei kala kashārang mibing, kapangkhuida athumli nathumwuitungli thing-thingwui, shāshāwui, hangphangā-ngāwui, tharā-rāwui kathāna, kala nathumwui shangbingwui otva̱bing sāngasaka. ¹⁶Atam chili ina nathumwui bichar kasābingli hāngchithei, "Nathumwui achinābing ngachaili tuishot khanganāda, mi akha, awui achinā, lah awuili ngaso kha̱mi ngachaili khamashung eina bichar sālu. ¹⁷Bichar atamli mijang masālu; kateola khareila ngaraichāda khanganālu. Khipālikha mamayāmalu, kaja bichar hi ithumwui Avāwuina. Nathumwui vang kasaksakmāng tuishot chi ili khuirālu; ina chi khanganāra." ¹⁸Kala atam chitharan ina nathumna sāra kaji ot saikora nathumli hāngchithei.

Mi Tharāda Khani Ngaleili

¹⁹Ithumna Horeb chihohailaga, nathumna theikahai kachungkha kala khangacheela lamhāng chi hupta vālaga, ithumwui Avāna ithumli hāngchithei athishurda, Amorwui kaphungramshong vai, kala Kadesh-barneali latunga. ²⁰Ina nathumli hānga: Nathumna ithumwui Avāna ithumli miki kaji Amorwui kaphungramli vāshunghaira. ²¹Yanglu, nathumwui Avāna ngalei chi nathumwui mangāli haimihaira. Vālu, ithumwui Avāna ngashit kahai athishurda, akhuilu. Mangachee kala mangangalu.

²²Nathum katongana iwuili rālaga hānga, "Ithumwui vang ngalei chi ra̱yang khavai, kala ithumna vāki kaji shongfa eina ithumna vākashung kaji keinungbingwui pao ithumli khuiung khavai, mi rida chihosa."

²³Ot chi ili phālakhairada theihaowa, chiwui vang eina ina shang-shangwui eina mi ava̱va̱, nathumwui mi tharāda khani khui. ²⁴Athumna ngareida kaphungramli vāda, Eshcolwui tampākli vāshunglaga, chi ara̱yangkhui. ²⁵Athumna ngalei chiwui athei kaikha athumwui pāngli khuilaga, ithumli khuiung, kala unghānga: "Ithumwui Avāna ithumli miki kaji ngalei chi phāli."

Israelna Manganā Kahai

²⁶Chithālala nathum mavākasang, kala nathumwui Avāwui ningkhamili ngakaishihaowa. ²⁷Kala nathumwui kachonshimli kapumpama, hānga, "Varena ithumli ningkakachaiwui vang, ithumli Amorbingwui pāngli mida ithumli sāshimān khavai, ana ithumli Egypt ngaleiwui eina khuikashoka. ^a a v27 Hili mibingna ithumwui Avāli awui malungwui khamathei chi hānga — Avāna anaongarāli maleishimei kaji khare mikhanam chi — kha khamashungli ana athumli shongfa hupta phunglakha. ²⁸Ithum kali vārakhala? Ithumwui ichināngarāna ithumwui malung tātung ngasaka, hānga, 'Ithumli chungmeida kala talla̱khon mibing; kazingram zangkhavai ngaveili keinung hakkhamahābing; kala ithumna Anakwui naomayarabing chila apam chili theihaira.'" ^b b v28 Anaknaobing hi Canaan hupta khangacheela, talla̱khon raimibingwui shang akhana.

²⁹Chieina ina nathumli hānga, "Athumli makathirlu lah mangacheealu. ³⁰Nathumwui Avā, nathumwui mangāli vākasona, ana Egyptli nathumwui miktāli nathumwui vang sai athishurda, khalatta nathumwui vang ngararmira, ³¹kala lamhāngli, aja apam hili nathum rāshungda nathumna zatthai shongfa saikorali, avā akhana anaomayarali phungkazat thāda nathumwui Avāna nathumli phungkazat chi nathumna theihaira."

³²Chithālala, tui hiwui eina tangda, nathumna nathumwui Avāli mashitsangmana, ³³nathumwui rāmrah ayang khavai nathumwui mangāli shongfali vālaga, ngayā mei eina, ngashun muiyā eina, nathumna vāki kaji shongfa nathumli chithei.

³⁴Kala ithumwui Avāna nathumna kahāng tui chi shālaga, malungvātlakhaowa, kala ana khangashit sai,

³⁵"Mi hi, makhayā thot hina, khipākhana ina navā ngarāli mira da ngashit kahai khamathā ngalei chi matheimara, ³⁶Jephunnehwui naomayara Calebmāngna chi theira, kala ina awui phei naisang kahai ngalei chi ali mira, kala awui naongarāli, khikhalajila ana ithumwui Avāli ningtongchaoda shura.’

³⁷"Nathumwui vang eina ithumwui Avāna ilila malungvātta hānga, ‘Nala chili mazangmara.’ ³⁸Nawui mangāli nganinga Nunwui naomayara Joshuana chili zangra. Ali pangngasaklu; ana Israelwui shimlui chi angayarmira. ³⁹Nathumwui naoshinaobing, nathumna sāshai ngasāra da hāng kahai, kala nathumwui naoshinao, aja kaphā kala makaphā makatheibing, athumna chili zangra. Ina chi athumli mira; athumna chi samphangra. ⁴⁰Kha nathumva, ngareida Red Seashong vākhavai lamhānglungli zatphoklu."

⁴¹Chieina nathumna ili ngahānkai, "Ithumna ithumwui Avāli morei sāhaira. Ithumwui Avāna ithumli kaso kahai athishurda, ithumna akhuida ngararra." Nathum kachiva̱na kaphungramli akhui hi phungpailaka da machukta khalattawui khutlai thāngkhuiserhaowa.

⁴²Ithumwui Avāna ili hānga, "Athumli hānglu: ‘Maakhuialu, ngararda masaalu, kaja I nathumwui alungli maleimana; chi maningakha nathum nathumwui yangkashebingwui mangāli yortāra.’"

⁴³Ina nathumli hānga, kha nathumna manganāmana. Nathumna ithumwui Avāwui kahāngli ngakaishida, ningyat eina sāda, kaphungramli akhuihaowa. ⁴⁴Kaphungram chili kapam Amornaobingna nathumli ngasoda tārāsai, khui thāda nathumli kharomvai, kala Seirli Hormah eina tangda nathumli yuihaowa. ⁴⁵Nathumna latunghaida ithumwui Avāwui mangāli chapa, kha ithumwui Avāna nathumwui akhon mashāmana, kala nathumli manganāmana. ⁴⁶Chiwui vang nathumna Kadeshli zimiksho kachungkha apamsanga.