1 Samuel 14

14 ¹Thangkha akhali Saulwui naomayara Jonathanna awui raisāri phungmeli hānga, "Rālu, inili kāroda khalei Philistinewui raimipamli ini kānda vāsa," kha awui avāva̱li mahāngmana. ²Saulna Gibe-ahwui ayarli, Migronli khalei kabothei thing azingli pamsai; mi shātharuk sha̱kha ali ngasoda pamsai. ³Ahitubwui naomayara, Ichabodwui achinā, Phinehaswui naomayara, Eliwui naomayara, Shilohli ithumwui Avāwui pāngmon Ahijahna ephod chi ngavai. Jonathan vāhaira kaji mibingna matheimana. ^a a v3 Ephod chiya, Vareli thānthei phākhavai atamli pāngmonna ngavaikhavai kachon katonga akhana.

⁴Jonathanna Philistinewui raimipamshong kānkhavai phai kaji makānkhavaibingwui ngachaili, uishongli lunghār akha kala yashongli lunghār akha nganinga; akha chi Bozez hoi, kala khangatei chi Seneh hoi. ⁵Lunghār akha atungshongla, Michmashli kāroda nganinga, kala khangatei chi azingshongli, Gebali kāroda nganinga. ⁶Jonathanna awui raisāri phungmeli hānga, "Rālu, ahui marimkashokbingwui raimipam hili ini kānda vāsa. Chile ithumwui Avāna iniwui vang samipai; kaja mi kachungkha eina jila mi kateokha eina jila, kankhui khavai awuili khikha maleimana."

⁷Awui raisāri phungmena hānga, "Nawui ningli leikahai saikora sālu. Vālu; iwui ning kala manglā eina I nali ngasodalei."

⁸Chieina Jonathanna hānga, "Inina mibing chishong kānkāra kala athumna inili theiranu. ⁹Athumna, 'Ithumna nanili samphangranglakha eina lānglu,' da hāngakha, ini iniwui pamli pamra kala athumshong makāluira. ¹⁰Kha athumna, 'Ithumshong kārālu,' da hāngakha, inina kāra, kaja ithumwui Avāna athumli iniwui pāngli horsangmi kahaina; chiya iniwui machutna."

¹¹Chieina ani khanini chi Philistinewui raimipamli akhalatta chithei. "Yanglu," da Philistinenaobingna hānga, "Hebrewnaobingna athum ngathumkasā akhuibing eina ngawokshoka." ¹²Raimipamwui mibingna Jonathan kala awui raisāri phungmeli hokhuida hānga, "Ithumshong kārālu, ithumna nanili tandi mira." Jonathanna awui raisāri phungmeli hānga, "Iwui khanukli kārālu, kaja ithumwui Avāna athumli Israelwui pāngli horsangmi kahaina."

¹³Jonathanna apāng aphei eina kāhaowa, kala awui raisāri phungmela awui khanukli kāhaowa; Philistinenaobing Jonathanwui mangāli pitai, awui raisāri phungmena awui khanukli athumli shaothata. ¹⁴Chi khare ngararli Jonathan kala awui raisāri phungmena acre tangkhai sha̱kha alungli mi maga̱ sha̱kha shaothata.

¹⁵Rāmrahli, luili, kala raimi saikorali kashimāna yuihaira; raimipam kala khangaponbing chila kathirririhaowa, okathuina nganuka; chi ithumwui Avāwui eina kharā kashimāna. ¹⁶Benjaminwui Gibe-ahli khalei Saulwui khamayonbingna yangshoklaga theihaowa: Philistinewui raimi kachungkha menghaira, apam kachida ngapha̱yāng yāmhaira. ¹⁷Saulna awui raimibingli hānga, "Khipa maleithuwa kaji shānkhuilu." Athumna shānkhui tharan, Jonathan kala awui raisāri phungme maleithuwa.

¹⁸Saulna Ahijahli hānga, "Ithumwui Avāwui oko chi hili khuirālu," kaja atam chichangli ithumwui Avāwui oko chi Israelnaobingla ngasoda leisai. ¹⁹Saulna pāngmonli hāngmahunglakha, Philistine rairumwui khonkazār chi pangmamān kaji eina zathaowa. Ana pāngmonli hānga, "Napāng khuithuiulu."

²⁰Saul kala awui raimibing ngahotserlaga rai rāshunga, kala Philistinenaobingwui raighai akha eina akha ngaherlaga pa̱ngapā katonga ngasāsai kaji theihaowa. ²¹Ayā Philistinenaobingwui mijang zangda athumli ngasoda rairumli vākazang kahai Hebrewnaobing chila, Saul kala Jonathanli ngasoda khalei Israelnaobingli ngasozat khavai ngalanhaowa. ²²Ephraimwui kaphungramli ngathumda leikahai Israelwui mibing saikorana Philistinenaobing yāmhaira kaji kashā tharan, athumla raili athumli kharomserhaowa. ²³Chithāda chithang ithumwui Avāna Israelli kanshokmi, kala rai chi Beth-aven kānda khavā zathaowa.

Saulwui khamor kahai khangashitna Israelli ngayāng ngasak

²⁴Israelwui raimibing chithang kachot phāhaowa, kaja Saulna athumli khangashit sāngasakta hānga, "Ina iwui yangkashebingli athut makhuiranglakha eina tangda, ngazin rida kashakazā kazā mi chili khonkashi ngasaranu." Chiwui vang eina raimibing khipākha kashakazā mamazapyangmana.

²⁵Raimibing saikora ngahongli vāzanga, kala ngaleili khuira̱ leisai. ²⁶Ngahongli vākazang tharan, khuira̱ longkatha̱ leisai, kha khipākha apāng khamorli makhāngmana, kaja raimibingna khangashitli ngacheehaowa. ²⁷Kha Jonathanna awui avāna raimibingli khangashit sāngasak chi mashālakmana, chiwui vang eina awui lijei aton yonkhangkāda khuira̱li rura, kala apāng khamorli khuirālaga awui mik kahor sāhaowa. ²⁸Raimi akhana hānga, "Navāna raimibingli khangashit sāngasakta, 'Aja kashakazā kazā mi chili khonkashi ngasaranu' da hānga; chiwui vang eina mibing vānhaira."

²⁹Jonathanna hānga, "Iwui avāna ngalei chili khangachot ngasakhaira. Yanglu, ina khuira̱ hi kateokha mazapyangda eina imik kathāda kahor sāhaokhala. ³⁰Raimibingna aja athumwui yangkashebingwui ngapon chi ningtharlak eina zai kaja, kathāda phamei kharsi! Philistinenaobingli yuikakhui chi kachungkha maningmana." ³¹Chithang athumna Philistinenaobingli Michmashwui eina thuilaga Aijalon vāpeida maikashi mihaira, kala raimibing katong vānserhaowa. ³²Raimibingna ngapon chili vaoda yao, sei, kala seinao khuilaga, ngaleili taithatlaga, ashee zangda khalei sā chi shai. ³³Kachikathā akhana Saulli hānga, "Raimibingna ashee zangda khalei sā shaida ithumwui Avāwui mangāli morei sai." "Nathumna makakachang otsak sāhaira," da ana hānga. "Ngalung kahakva akha chi hili ili khalangshokmilu."

³⁴Chieina ana hānga, "Raimibingwui ngachaili zangserlaga athumli hānglu: kachikathāna awui mukvā lah awui yao chi ili khuirāmilu, hili taithatlaga shailu; ashee zangda khalei sā shaida ithumwui Avāwui mangāli morei masālu." Chithāda ngayāshong chichangli mi saikorana awui mukvā chi khuirāda apam chili taithata.

³⁵Saulna ithumwui Avāli hanphut akha sākhui; hi ana awui vang sākhare hanphut sākhui. ³⁶Saulna hānga, "Arui ngayā ithum Philistinenaobingli kharomvāga, kazing mathangranglakha eina tangda athumli ngaponkakhui, kala khipākha kharing eina mahorhaila." Athumna ngahānkai, "Nawui mangāli kaphā chi sālu." Kha pāngmon china hānga, "Ithum hili ithumwui Avāwui ngalemli vāsa."

³⁷Chieina Saulna ithumwui Avāli ngasanda hānga, "Ina Philistinenaobingli kharomvāra? Nana athumli Israelwui pāngli mira?" Kha chithang ana ali mangahānkāmithuwa. ³⁸Saulna hānga, "Hili rālu, nathum raimibingwui akhokabing saikora, kala aja morei hi kathāda shokkahaikhala theikhuisa. ³⁹Israelli huikhame ithumwui Avāna theira; inaomayara Jonathanwui khayonkhamāng leilala, a kachangkhata thira." Kha mibingwui alungli khipākha mangahānkāmana. ⁴⁰Ana Israel saikorali hānga, "Nathum uishongli nganinglu; inaomayara Jonathan eina ina yashongli nganingra." Mibingna Saulli hānga, "Nawui mangāli kaphā chi sālu."

⁴¹Saulna seihā sāda hānga, "Ithumwui Avā, Israelwui Vare, khisāda aja nana narao ili mangahānkāmakhala? Hi khayonkhamāng ili lah inaomayara Jonathanli leiakha, ithumwui Avā, Israelwui Vare, Urim eina ngahānkāmilu; kha nawui mi Israelli leiakha, Thummim eina ngahānkāmilu." Ka̱lā yanglaga chi Jonathan eina Saulwuili tāhaowa; kala mibing china khikha mathāmhaowa. ^b b v41 Urim eina Thummim hina pāngmonwui ephodli keihai ot kathara akhabing, Varewui ngahānkā ka̱lā eina phāshang khavai khuiphungmi.

⁴²Saulna hānga, "Ina eina inaomayara Jonathanwui ngachaili ka̱lā yanglu." Ka̱lā chi Jonathanli tāhaowa.

⁴³Saulna Jonathanli hānga, "Nana kasasā chi ili hānglu." Ana ngahānkai, "Ina iwui khāmshuiwui atonli khuira̱ kateokha maningla mazapyanghaira. Ara ina thira kajina."

⁴⁴Saulna hānga, "Jonathan, na kachangkhata mathiakha, ithumwui Avāna ili hikathā sāda chi eina lāngda sāranu."

⁴⁵Raimibingna Saulli hānga, "Israelwui vang hi khayui kahakva yuikakhui Jonathan thirala? Maningmana! Ithumwui Avāna theira, awui kuisam akha eina tangda ngaleili mapitāmara, kaja aja ana ithumwui Avāwui ngachon eina hikathā sāhaira." Chieina athumna Jonathanli kankhui, kala ana mathimana. ⁴⁶Chieina Saulna Philistinenaobingli kharomkharā chi khuithuilaga, Philistinenaobing china kachichā ngaleili ngalanhaowa.

Saulwui Raingararbing kala Shimkhur

⁴⁷Saulna Israelwui wungram akhui tharan, kachāyām shong eina awui yangkashebing saikorali, Moabli, Ammonwui naomayarabingli, Edomli, Zobahwui awungabingli, kala Philistinenaobingli rai ngarara. A ngareivā apam saikorali, ana athumli yuihaowa. ⁴⁸Ana marākta rai ngarara, Amaleknaobingli sāthathaowa, kala Israelli asākazambingwui pāng eina kankhui. ⁴⁹Saulwui naomayarabing Jonathan, Ishvi, kala Malchishua hoi. Awui naongalāva̱ khani: naochizai Merab, kala khanganuiva̱ Michal hoi. ⁵⁰Awui preiva̱ Ahima-azwui naongalāva̱ Ahino-am hoi. Awui raimi kathāna Saulwui avāgato Nerwui naomayara Abner hoi, ⁵¹kaja Saulwui avāva̱ Kish, kala Abnerwui avāva̱ Ner chi Abielwui naomayarabingna.

⁵²Saulwui thotli Philistinenaobingli rai khangarar zakshilāka; kala ana kapanga maningakha kapinga mi akha kathei tharan, ali akhalattawui vang khuiya.