1 Samuel 13

13 ¹Saulna mungkaphok tharan a zingkum thumrā kāshunghairasai, kala ana Israelwuitungli zingkum hangmatida khani munga. ^a a v1 Vāsi hiwui mashingbing chi Hebrew tuiwui eina horhaida lei, china "Saul kum kha kāshunghairasai… kala kum khani munga" da tui. Hilila khalei mashing chi ara khalei Baibel kachungkhawui hāng eina thuina. ²Saulna Israelwui eina mi thing kathum kapangkhui; thing khani Michmash eina Bethelwui kaphungramli ali ngasoda pama, kala thing kha Benjaminwui Gibe-ahli Jonathanli ngasoda pama. Kataibing chi ana mi kachiva̱ awui kachonshimli chihovāserhaowa. ³Jonathanna Gebali khalei Philistinewui raimipam chi sāthata, kala Philistinenaobingna shai. Chieina Saulna ngalei hupva̱li talla̱ khongda, "Hebrewnaobingna shākhuiranu!" da hānga. ⁴Israel saikorana Saulna Philistinewui raimipam sāthata da, kala Israel Philistinenaobingli yangkharing khavai ot sāhaira da shai. Chieina mibing china Saulli khokkha sāda Gilgalli vāhaowa. ⁵Philistinenaobing siguigari thing kathum, sigui raimi thing tharuk, kala shamadru pheiwui situi ngayāda makhuila raimi eina Israelli ngarar khavai kazipa. Athumna vālaga Beth-avenwui zingshovāk Michmashli rāmrah vasāpama. ⁶Mibing chi yāng eina rāsha̱da, Israelwui mibingna athum kakhanangli lei da theilaga, lungkhur, ngahong, lunghār, chom, kala ra̱khongli ngathumserhaowa. ^b b v6 Ra̱khongbing chi ngashun tara̱ kazipkhui kala kaziphai khavai lunghārli shomda sākahai ngaleikhur tara̱ khorbingna. ⁷Hebrewnao kaikhana tangda Jordan makānlaga Gad eina Gileadli vai. Kha Saulva Gilgalli pamsanghaowa, kala mi saikorana kathirriri eina ali shurrai.

Saulna Avāwui Tui Maleila Ot Sai

⁸Samuelna hāngkahai atam athishurda ana shinithang ngaraipama; kha Samuelna Gilgalli marāmana, kala mibing chi awui eina ngapha̱yānghaowa. ⁹Saulna hānga, "Rikkatā kachigat kala pha̱kaphayā chi ili khuirālu." Kala ana rikkatā kachigat chi chigata.

¹⁰Ana rikkatā kachigat chigat kupkahaiwui thili, Samuel rāhaowa, kala Saulna ali samphang kala shālam mi khavai shoka. ¹¹Samuelna ngahāna, "Na khi sāhaokhala?" Saulna ngahānkai, "Ina mibing chi iwui eina ngapha̱yānghaowa da thei, na atam chāda marāmana, kala Philistinenaobing Michmashli kazipa da theilaga,

¹²Ina kahangva, 'Philistinenaobing Gilgalli ili ngarar khavai rāra, kala ina ithumwui Avāwui ngahānkhangai maphāzatmana.' Chiwui vang ina khalattali tandi sāda rikkatā kachigat chi chigata."

¹³Samuelna Saulli hānga, "Na mangma̱lak eina sāhaira. Nawui Avāna nali ngasakkahai ningkhami chi na mamayonmana. Na mayonakha, ithumwui Avāna nawui wungram chi Israelwuitungli mashimānla sāpānchingmira. ¹⁴Kha ara nawui wungram chi maleichingmara. Ithumwui Avāna khalattawui vang awui ning eina khavai mi akha phāhaira, kala awui mibingwuitungli ali khamung sāda kapangkhui, kaja ana nali kakaso chi na mamayonmana."

¹⁵Samuelna Gilgal chihohailaga Benjaminwui Gibe-ahli kāhaowa. Saulna ali khangaso mibing chi mashinga; athum mi shātharuk chichangna.

Israel Raisāri Maleila Horhaira

¹⁶Saul eina anaomayara Jonathan, kala anili khangaso mibing chi Benjaminwui Gebali pamsai; Philistinenaobing Michmashli rāmrah vasāpama. ¹⁷Philistine rāmrahwui eina khangaponbing khum kathum sāda shoka. Akhana Shual ngaleili khalei Ophrahshong ngareishanga; ¹⁸khangatei akhana Beth-horonshong mai ngareivai; kakathuma china Zeboiim tampāk yangkazang tharishong, lamhāngshong mai ngareivai. ¹⁹Israel saikorali mari kasā mi akhala matheithuwa, khikhalajila Philistinenaobingna, "Chi maningakha Hebrewnaobingna raighai lah kazei sākhuira" da hānga. ²⁰Chiwui vang eina Israel saikora athumwui tin, kenti, ngahā kala khainao kharā khavai Philistinenaobingli tai. ²¹Tin, kenti kala marik-kapei kharā khavaiwui vang lupā ounce akhawui khum mati sha̱kha khuiya, kala ngahā kharā khavai eina lunggu kharāluishit khavaiwui vang lupā ounce akhawui khum chishat sha̱kha khuiya. ^c c v21 Lunggu chi atungli mari kharā zutkahai thing sha̱wui akhana, seibingli zat ngasak khavaiwui vang singkahaina. ²²Rai sāthang, Saul eina Jonathanli khangaso mibing saikorawui ngachaili raighai lah kazei akhala matheithuwa; Saul eina anaomayara Jonathan maningla chi singsai.

²³Kala Philistinenaobingwui raimi thān akhana Michmashwui kajuili vāhaowa.