Mi eng' bukuit

1 Samuel 13 FHB Father's Heart Bible™

Kiistoi 15% eng' kiy ne iale korook →
Bukuit

Ng'eetu Lugeet ak Philistiik

Ki par Jonathan lugeetap Philistiik, ak ki iyumgei Philistiik kobooto kariisyek che ma koitoksei, ak ki unygei Israel eng' kebenonik ma mi kitang'indet ne yaei rotweet. Kingo keer Saulo lugeennyi koyaagitu, ki igoitoi kagoochinet ineegei ago koma tebi. Ma ki riip ng'atuutyetap Kwandanyi; ma neneti laitornatennyi.

Sura 13.

Ki tinye Saulo kenyiisyek sosom ye kingo egu laitoryat, ak ki laitoran Israel kenyiisyek artam ak aeng'. a a v1 Nambaisyek che mi eng' ng'olyoondoni ko kiibetyo eng' Hebrania, ne kole, "Ki tinye Saulo kenyiit agenge… ak ki laitoriin kenyiisyek aeng'." Nambaisyek che mi yu ko kosuubei somanetap Bukuisyek che chaang' che leel che mi raani. Ki lewen Saulo eliphuusyek somok eng' Israel: eliphuusyek aeng' kobooto ineendet eng' Mikmas ak emetap tuloonook ne po Bethel, ki mi eliphuut agenge ak Jonathan eng' Gibeatap Benjamin. Ago piik alak che ng'etunot ko ki iweek koba gaa, chii tugul koonnyi. Ki par Jonathan lugeetap Philistiik eng' Geba, ak ki kas Philistiik. Yeityo koguut Saulo iryageet eng' emet komugul koleenji, “Ingogas Yahudik!” Ki kas Israel tugul kole kabar Saulo lugeetap Philistiik, ak kole kagoyaagitu Israel icheeget eng' Philistiik. Nooto si ki iyumgei piik koba ole mi Saulo eng' Gilgal. Ki iyumgei Philistiik si koboryo ak Israel—kariisyek eliphuusyek somok, piik che ketei paraisisyek eliphuusyek lo, ak lugoosyek che ma koitoksei ko uu ng'aniek che mi ngeguutap nyanjet. Ki pwa kotogos ak kiteptoi eng' Mikmas, eng' komostap kong'asiis ne po Beth-aben. Kingo keer murenigap Israel kole mi nyalilda, amu kiga koromit piik miising', ko kiunygei eng' kebenonik, osotik, rwandosyek, keriingonik ak keriingonigap peek. b b v6 Keriingonigap peek ko ki kipaljee eng' rwandosyek eng' orit ng'wony, si koyumi ak koriib peegap robta. Ki keny Yahudik alak araraitap Jordan koba Gad ak Gilead. Ago ki tebi Saulo eng' Gilgal, ak ki susub ineendet piik tugul kobotanionu.

Yai Saulo ne ma gototi Ng'olyoondap Kwanda

Ki tebi Saulo peetuusyek tisap, sait ne ki lewen Samuel; ago ma ki nyo Samuel Gilgal, ak ki yestaat piik kobun ineendet. Ki le Saulo, “Iibwa kagoochinetap kebeelei ak che po kaalyeet.” Ak ki yai kagoochinetap kebeelei.

Kingo baat kayaeetap kagoochinetap kebeelei, konyo Samuel, ak ki ng'eetu saang' Saulo si korwok ak kogat ineendet. “Nee ne iyai?” koteebe Samuel. Kowolji Saulo koleenji, “Ki ageer piik koyestoi kobun anee, ak ma ki inyoo eng' sait ne ki lewen, ak kiga koiyumgei Philistiik eng' Mikmas,

ka abwaat ale, ‘Pwonechi Philistiik eng' Gilgal, ak ma ki acheeng' kaalyeet ne po Kwandanyo.’ Nooto si ka aigaigaigei ak ayai kagoochinetap kebeelei.”

“Ki iyai eng' perberyo,” koleenji Samuel Saulo. “Ma ki iriip ng'atuutyet ne ki igoochin Kwandang'ung'. Ngot iriip, ko nda ka iteech Kwandanyo laitornateng'ung' eng' Israel koigeny. Ago nguno ko ma tebi laitornateng'ung'. Kagocheeng' Kwandanyo chii age ne kergei ak muguleldanyi, ak kotebi ineendet koek pounindetap piikyik, amu ma ki iriip ne ki ng'atak.”

Ki ng'eet Samuel Gilgal ak kotogosta koba Gibea ne po Benjamin. Ki it Saulo piik che ki mi kobooto ineendet—murenik pogolusyek lo.

Ma Tinye Israel Kariigap Lugeet

Ki tebi Saulo, ak weeriinnyi Jonathan, ak piik che ki mi kobooto icheek eng' Geba ne po Benjamin; ki kiteptoi Philistiik eng' Mikmas. Ki ng'eet luulik eng' nganaseetap Philistiik eng' kweanaik somok. Age ko ki wendi Ophrah, eng' emetap Sual; age ko ki wendi Beth-horon; ne po somok ko kwo kiwotet ne ing'ururi atebweetap Seboim, kwo surkwen. Ma ki konyoorunet keechiirtaindet eng' Israel komugul, amu ki le Philistiik, “Ingomete Yahudik koyae rotonik anan ng'otwek.” Nooto si ki choru Israel tugul koba ole mi Philistiik si koilyeli ngelebwogik, kariik che kiburburenisye, aonik ak ngalilyosyek. Ki mi beeyuut ne po koilyelet; ne po koilyel ngelebwogik, kariik che kiburburenisye ak panyeek ko kebebertap chepkondok ne po fedha, ago ne po koilyel aonik ak koilyeli kogeny suumeek ko kebeberta ne ming'in. c c v21 Suumeek ko kii keetit ne koi ne tinye mete ne po keechiir ne ilyeli, ne ki kiboisyee si koturchi tuuga korutu. Eng' peetuutap lugeet ma ki konyoorunet rotweet anan ng'otit eng' piik tugul che ki mi kobooto Saulo ak Jonathan; Saulo kityo ak weeriinnyi Jonathan ko ki tinye.

Ki ng'eetu lugeetap Philistiik koba ole kiigendee eng' Mikmas.