1 Samuel 12

12 ¹Samuelna Israel saikorali hānga, "Ina nathumna ili hāngkahai saikorali nathumwui akhon nāshunghaira, kala nathumwuitungli awunga akha sāhaira. ²Ara awunga chi nathumwui mangāli zata. Ina sarhaida kuingapoktham kāhaira; iwui naomayarabing nathumwui ngachaili lei. Ina nganuilakhawui eina thuida aja zimiksho eina tangda nathumwui mangāli zathaira. ³Yanglu, ina hina; ithumwui Avā kala awui thao neomi kahaiawui mangāli iwui makhamayā shākhi sālu. Khipāwui sei ina khuirākhala? Khipāwui gadhā ina khuirākhala? Khipāli ina kateizāhaikhala? Khipāli ina rekhareklak eina sahaikhala? Mik ngapeo khavai khipāwui pheizā ina khuirākhala? Ili hānglu, laga ina nathumli hanmira."

⁴Athumna hānga, "Nana ithumli makateizāmana, lah ithumli marekharekmana, lah khipākhawui pāng eina khikha makhuimana."

⁵Ana athumli hānga, "Nathumna iwui pāngli khikha matheimana da ithumwui Avāna nathumli makhamayā shākhina, kala awui thao neomi kahaiana aja zimiksho shākhina." Athumna hānga, "A shākhina."

⁶Chitharan Samuelna mibingli hānga, "Ithumwui Avāna Moses eina Aaronli pangkhuimida navā ngarāli Egyptwui eina khuishokmi. ⁷Ara nganingkālu, chieina nathum eina navā ngarāwui vang ana sāmi mashun ot saikorawui pongli ina ithumwui Avāwui mangāli nathumwui makhamayā iwui tuingaphun khuivāra."

⁸Jacobna Egyptli azang tharan, navā ngarāna ithumwui Avāli ngakaowa, chieina ana Moses eina Aaronli chihovāda, athumli Egyptwui eina khuishokta hili chipama. ⁹Kha athumna ithumwui Avāli malaihaowa, chiwui vang ana athumli Hazorwui raimi kathāna Siserawui pāngli, Philistinenaobingwui pāngli, kala Moab awungawui pāngli horsangmi; chibingna athumli rai rātai.

¹⁰Athumna ithumwui Avāli ngakaoda hānga: "Ithumna morei sāhaira; ithumna ithumwui Avāli horhaira, kala Baal eina Ashtarothli otram ngatha̱ya. Ara ithumli ithumwui yangkashebingwui pāng eina kanshokmilu, laga ithumna nali otram ngatha̱ra." ¹¹Chiwui vang ithumwui Avāna Jerubbaal, Barak, Jeptha, kala Samuelli chihovāda, nathumli kuikhamareili khalei nathumwui yangkashebingwui pāng eina kanshokmi; chieina nathum chingri eina pama. ^a a v11 Jerubbaal hi Gideonwui aming khangatei akhana, chiya awui avāwui Baalwui hanphut ngakhuntekmi bichar kasaana.

¹²Nathumna Ammonwui awunga Nahash nathumli shanglaga rā kaji theilaga, ithumwui Avā nathumwui awunga sāda leilakha, nathumna ili hānga, "Maningmana, awunga akhana ithumwuitungli mungra." ¹³Ara nathumna kapangkhuida rākapo awunga chi hina. Yanglu, ithumwui Avāna nathumwuitungli awunga akha sāhaira. ¹⁴Nathumna ithumwui Avāli ngacheeda, ali otram ngatha̱da awui kahāng nganāda, kala awui ningkhamili ngakaishi masa̱da, kala nathum eina nathumwui awunga khanini ithumwui Avāli shurakha, saikora kaphā sāra. ¹⁵Kha nathumna ithumwui Avāwui kahāng makhanganā, awui ningkhamili ngakaishiakha, ithumwui Avāwui pāng navā ngarāli sāmi thāda nathumlila makhamayā leira.

¹⁶Ara nganingkai chingri, ithumwui Avāna nathumwui miktāli sāra kaji hi mataimeikap ot chi theilu. ¹⁷Aja kehu hātkaphok atam maningmala? Ina ithumwui Avāli ngakaora; chieina ana kazing khangashum kala zingrot chihovāra, chieina nathumna khalattawui vang awunga rākapo nathumwui makhayā ot chi ithumwui Avāwui miktāli kayākha mataimei khala kaji theira. ^b b v17 Lumkachāng khareli chāng māhā atamli zingrot rokahai hi khangkaza thada, chiwui vang hengsāda rā kazing khangashum kala zingrot chi ithumwui Avāwui eina kharā ot mashunrik kahaina.

¹⁸Samuelna ithumwui Avāli ngakaowa; chithang ana kazing khangashum kala zingrot chihovāhaira, kala mi saikorana ithumwui Avā kala Samuelli ngacheemeihaowa.

¹⁹Mi saikorana Samuelli hānga, "Naraobingwui vang nawui Avāli seihā sāmilu, chieina ithum mathimara: awunga rāpoi eina ithumna ithumwui morei saikorali makaphā ngarumhaira."

²⁰Samuelna mibingli hānga, "Mangacheealu. Nathumna makaphā hi saikora sāhaira; chithālala ithumwui Avāwui thi kashurwui eina mangareithuihaialu; nathumwui ningyāng tongda ali otram ngatha̱lu. ²¹Arema meoma̱li makhorumalu; ngachonkhami maleimana, kanmi khavai maleimana, kaja athum aremana. ²²Kaja ithumwui Avāna awui khare mingwui vang awui mibingli mahorhaipaimara. Ana nathumli awui mibing sākhavai kapangkhuihaira. ²³Ilala nathumwui vang seihā sā mathāhaila ithumwui Avāwuitungli morei masāluimara; kala ina nathumli kaphā kala khamashung apong tamchitheira. ²⁴Ithumwui Avāli maningla ngacheelu, nathumwui ningyāng tongda ningtonglak eina ali otram ngatha̱lu, ana nathumwui vang sāhai hakkhamahā otsak chi machukkhuilu. ²⁵Kha nathumna makaphā ot sāchingakha, nathum kala nathumwui awunga khanini kheithuira."