1 ሳሙኤል 12

12 ¹ሳሙኤልም ለእስራኤል ሁሉ እንዲህ አለ፤ “በነገራችሁኝ ነገር ሁሉ ድምፃችሁን ሰማሁ፤ በእናንተም ላይ ንጉሥ አነገሥሁ። ²አሁንም ንጉሡ በፊታችሁ ይሄዳል። እኔም ሸመገልሁ፤ ጠጕሬም ሸበተ፤ ልጆቼም ከእናንተ ጋራ ናቸው። ከልጅነቴ ጀምሮ እስከ ዛሬ ድረስ በፊታችሁ ተመላለስሁ። ³እነሆ፤ በአባታችንና በቅቡዑ ፊት ቁሙና በእኔ ላይ መስክሩ። የማንን በሬ ወስጃለሁ? የማንን አህያ ወስጃለሁ? ማንን አታልያለሁ? ማንን በድያለሁ? ዐይኔን ልጨፍን ከማን እጅ መማለጃ ተቀብያለሁ? ንገሩኝ፤ እኔም እመልስላችኋለሁ።”

⁴እነርሱም፣ “አላታለልኸንም፤ አልበደልኸንም፤ ከማንም እጅ ምንም አልወሰድህም” አሉ።

⁵እርሱም፣ “በእጄ ምንም እንዳላገኛችሁ አባታችን በእናንተ ላይ ምስክር ነው፤ ቅቡዑም ዛሬ ምስክር ነው” አላቸው። እነርሱም፣ “ምስክር ነው” አሉ።

⁶ከዚያም ሳሙኤል ሕዝቡን እንዲህ አለ፤ “ሙሴንና አሮንን የሾመ፣ አባቶቻችሁንም ከግብፅ ያወጣ አባታችን ነው። ⁷አሁንም ቁሙ፤ ለእናንተና ለአባቶቻችሁ ያደረገውን የጽድቅ ሥራ ሁሉ በአባታችን ፊት በእናንተ ላይ እናገር ዘንድ።”

⁸ያዕቆብ ወደ ግብፅ በገባ ጊዜ አባቶቻችሁ ወደ አባታችን ጮኹ፤ እርሱም ሙሴንና አሮንን ላከ፤ ከግብፅም አወጣቸው፤ በዚህም ስፍራ አስፈራቸው። ⁹እነርሱ ግን አባታችንን ረሱ፤ ስለዚህ ለሐዞር ጦር አለቃ ለሲሣራ፣ ለፍልስጥኤማውያንና ለሞዓብ ንጉሥ እጅ አሳልፎ ሰጣቸው፤ እነርሱም ተዋጓቸው።

¹⁰እነርሱም ወደ አባታችን ጮኹ፤ “ኀጢአት ሠራን፤ አባታችንን ትተን በኣሎችንና አስታሮትን አመለክን። አሁንም ከጠላቶቻችን እጅ አድነን፤ እኛም እናገለግልሃለን” አሉ። ¹¹ስለዚህ አባታችን ይሩብዓልን፣ ባርቅን፣ ዮፍታሔንና ሳሙኤልን ላከ፤ በዙሪያችሁ ካሉ ከጠላቶቻችሁም እጅ አዳናችሁ፤ እናንተም በሰላም ኖራችሁ። ^a a v11 ይሩብዓል የጌዴዎን ሌላ ስም ነው፤ እርሱም የአባቱን የበኣል መሠዊያ ያፈረሰ መስፍን ነበር።

¹²የአሞናውያንን ንጉሥ ናዖስ ወደ እናንተ ሲመጣ ባያችሁ ጊዜ፣ አባታችን ንጉሣችሁ ሆኖ ሳለ፣ “አይሆንም፤ ንጉሥ ይግዛን” አላችሁኝ። ¹³አሁንም እነሆ የመረጣችሁትና የለመናችሁት ንጉሥ፤ እነሆ፣ አባታችን በእናንተ ላይ ንጉሥ አድርጓል። ¹⁴አባታችንን ብትፈሩ፣ ብታገለግሉትና ብትታዘዙት፣ ትእዛዙንም ባትቃወሙ፣ እናንተም ንጉሣችሁም ሁላችሁ አባታችንን ብትከተሉ፣ መልካም ይሆንላችኋል። ¹⁵ነገር ግን አባታችንን ባትታዘዙና ትእዛዙን ብትቃወሙ፣ እንደ አባቶቻችሁ የአባታችን እጅ ይቃወማችኋል።

¹⁶አሁንም ዝም ብላችሁ ቁሙ፤ አባታችን በዓይናችሁ ፊት ሊያደርግ ያለውን ይህን ታላቅ ነገር እዩ። ¹⁷ዛሬ የስንዴ መከር አይደለምን? አባታችንን እጠራለሁ፤ እርሱም ነጎድጓድንና ዝናብን ይልካል፤ ለእናንተ ንጉሥ በመለመናችሁ በአባታችን ፊት ያደረጋችሁት ክፋት እንዴት ታላቅ እንደ ሆነ ታውቃላችሁ። ^b b v17 በበጋ መጀመሪያ በስንዴ መከር ወቅት ዝናብ ፈጽሞ ማለት አይዘንብም፤ ስለዚህ ድንገተኛው ነጎድጓድ ያለ ጥርጥር ከአባታችን የመጣ ምልክት ነበር።

¹⁸ሳሙኤልም ወደ አባታችን ጮኸ፤ በዚያም ቀን ነጎድጓድንና ዝናብን ላከ፤ ሕዝቡም ሁሉ አባታችንንና ሳሙኤልን እጅግ ፈሩ።

¹⁹ሕዝቡም ሁሉ ሳሙኤልን፣ “እንዳንሞት ስለ ባሪያዎችህ ወደ አባትህ ጸልይ፤ ንጉሥ በመለመን በኀጢአታችን ሁሉ ላይ ክፋትን ጨምረናልና” አሉት።

²⁰ሳሙኤልም ሕዝቡን እንዲህ አለ፤ “አትፍሩ። ይህን ክፋት ሁሉ አድርጋችኋል፤ ነገር ግን አባታችንን ከመከተል ዘወር አትበሉ፤ በፍጹም ልባችሁም አገልግሉት። ²¹ወደ ከንቱ ጣዖታት ዘወር አትበሉ፤ ከንቱ ናቸውና አይጠቅሙም፤ አያድኑምም። ²²አባታችን ስለ ታላቅ ስሙ ሕዝቡን አይጥልም፤ የገዛ ሕዝቡ ሊያደርጋችሁ መርጧልና። ²³እኔም ስለ እናንተ መጸለዬን በማቆም በአባታችን ላይ ኀጢአትን ልሠራ ከቶ አይገባኝም፤ መልካሙንና ቅኑን መንገድ አስተምራችኋለሁ። ²⁴አባታችንን ብቻ ፍሩ፤ በፍጹም ልባችሁም በታማኝነት አገልግሉት፤ ለእናንተ ያደረገውንም ታላቅ ሥራ አስቡ። ²⁵ነገር ግን ክፋትን በማድረግ ብትጸኑ፣ እናንተም ንጉሣችሁም ሁላችሁ ትጠፋላችሁ።”