1 ሳሙኤል 11

11 ¹አሞናዊው ናሐስ ወጥቶ በያቤስ ገለዓድ ላይ ሰፈረ። የያቤስ ሰዎች ሁሉ ናሐስን፣ “ከእኛ ጋራ ኪዳን አድርግ፤ እኛም እንገዛልሃለን” አሉት።

²አሞናዊው ናሐስም መልሶ፣ “ይህን ኪዳን ከእናንተ ጋራ የማደርገው እንዲህ ነው፤ የእያንዳንዱን ቀኝ ዐይን አወጣለሁ፤ በእስራኤልም ሁሉ ላይ ውርደትን አመጣለሁ” አለ።

³የያቤስ ሽማግሌዎች፣ “በእስራኤል ግዛት ሁሉ መልእክተኞችን እንድንልክ ሰባት ቀን ስጠን፤ የሚያድነን ባይኖር እጅ እንሰጥሃለን” አሉት። ⁴መልእክተኞቹ ወደ ሳኦል ጊብዓ ደርሰው የሆነውን ለሕዝቡ ነገሩ፤ ሁሉም ድምፃቸውን ከፍ አድርገው አለቀሱ።

⁵ያን ጊዜ ሳኦል ከብቶቹን ተከትሎ ከዕርሻ መጣ። “ሕዝቡ ምን ሆነ? ስለ ምን ያለቅሳሉ?” ብሎ ጠየቀ። እነርሱም የያቤስ ሰዎችን ወሬ ነገሩት። ⁶ሳኦል ይህን ቃል በሰማ ጊዜ፣ የአባታችን መንፈስ በኀይል ወረደበት፤ ቍጣውም እጅግ ነደደ። ⁷ጥንድ በሬዎች ወስዶ ቈራርጦ በመልእክተኞች እጅ በእስራኤል ግዛት ሁሉ ላከ፤ “ሳኦልንና ሳሙኤልን ተከትሎ የማይወጣ ሁሉ በሬዎቹ እንዲህ ይደረጋሉ” አለ። የአባታችንም ፍርሀት በሕዝቡ ላይ ወደቀ፤ እንደ አንድ ሰውም ሆነው ወጡ። ⁸በቤዜቅ ቈጠራቸው፤ እስራኤላውያን ሦስት መቶ ሺሕ፣ የይሁዳም ሰዎች ሠላሳ ሺሕ ነበሩ። ⁹የመጡትን መልእክተኞች፣ “ለያቤስ ገለዓድ ሰዎች እንዲህ በሏቸው፤ ‘ነገ ፀሓይ በሚሞቅበት ጊዜ ትድናላችሁ’” አሏቸው። መልእክተኞቹም ሄደው ለያቤስ ሰዎች ነገሩ፤ እነርሱም ደስ አላቸው። ¹⁰የያቤስ ሰዎችም፣ “ነገ እጅ እንሰጥሃለን፤ የወደድኸውን ሁሉ አድርግብን” አሉ። ¹¹በነገታው ሳኦል ሕዝቡን በሦስት ክፍል ከፈለ፤ በማለዳ ዘበኛ ሰዓት ወደ ሰፈሩ ገብተው እስከ ቀኑ ትኵሳት ድረስ አሞናውያንን ገደሉ፤ የተረፉትም ሁለት ሆነው በአንድነት እስከማይቀሩ ድረስ ተበተኑ።

መንግሥቱ በአባታችን ፊት ታደሰ

¹²ሕዝቡም ሳሙኤልን፣ “‘ሳኦል በእኛ ላይ ይነግሣል?’ ብሎ የጠየቀ ማን ነው? እነዚያን ሰዎች አስረክበን፤ እንገድላቸዋለን” አሉት።

¹³ሳኦል ግን፣ “ዛሬ አባታችን ለእስራኤል ድነትን ስላመጣ ዛሬ ማንም አይገደልም” አለ።

¹⁴ሳሙኤልም ሕዝቡን፣ “ኑ፤ ወደ ጌልገላ ሄደን ንግሥናውን በዚያ እናድስ” አላቸው። ¹⁵ሕዝቡም ሁሉ ወደ ጌልገላ ሄዶ በዚያ በአባታችን ፊት ሳኦልን አነገሡት፤ በዚያም በአባታችን ፊት የኅብረት መሥዋዕቶችን ሠዉ፤ ሳኦልና የእስራኤል ሰዎች ሁሉ እጅግ ደስ አላቸው።