Papa nou delivre pèp Izrayèl la pa mwayen Sayil

Naas ofri Jabès nan peyi Galaad lapè si chak moun bay je dwat li. Sayil t ap raboure lè nouvèl la rive; Sentespri pran l, li dekoupe bèf li yo pou rele Izrayèl, epi anvan maten fini li kraze Amonit yo. Li refize touye moun ki te kritike l yo: jodi a Papa nou bay delivrans.

Chapit 11.

Lè sa a, Nakach, moun Amon an, moute vin moute kan li devan Jabès nan peyi Galarad. Tout moun Jabès yo di Nakach: “Pase yon kontra ak nou, n'a sèvi ou.”

Nakach, moun Amon an, reponn: “M'ap pase kontra sa a ak nou sou yon sèl kondisyon: m'ap pete je dwat chak moun, konsa m'ap fè tout pèp Izrayèl la wont.”

Chèf fanmi Jabès yo di li: “Ban nou sèt jou pou nou voye mesaje nan tout peyi Izrayèl la. Si pa gen pesonn ki vin delivre nou, n'a rann tèt nou ba ou.” Mesaje yo rive lavil Gibeya, kote Sayil te rete a, yo rakonte pèp la sa ki te rive. Tout moun pran kriye byen fò.

Lè sa a menm, Sayil t'ap antre soti nan jaden, dèyè bèf li yo. Li mande: “Kisa ki rive pèp la? Poukisa y'ap kriye konsa?” Yo rakonte li nouvèl moun Jabès yo. Lè Sayil tande pawòl sa yo, Lespri Papa nou desann sou li ak fòs, epi yon gwo kòlè pran l'. Li pran yon pè bèf, li dekoupe yo an moso, epi li voye moso yo nan tout peyi Izrayèl la ak mesaje, li di: “Men sa k'ap fèt ak bèf nenpòt moun ki pa soti vin jwenn Sayil ak Samyèl.” Lè sa a, yon gwo laperèz Papa nou tonbe sou pèp la, yo tout soti tankou yon sèl moun. Li konte yo lavil Bezèk: te gen twasanmil moun nan pèp Izrayèl la, ak trantmil moun nan branch fanmi Jida a. Yo di mesaje ki te vini yo: “Men sa pou nou di moun Jabès nan peyi Galarad yo: Denmen, anvan solèy la cho, n'a delivre nou.” Mesaje yo ale, yo bay moun Jabès yo nouvèl la, epi kè yo kontan. Moun Jabès yo di: “Denmen n'a rann tèt nou ba ou. Lè sa a, w'a fè nou tou sa ou vle.” Nan denmen, Sayil separe pèp la fè twa gwoup. Granmaten, anvan bajou kase, yo antre nan kan an, yo bat moun Amon yo jouk solèy la vin cho. Sa ki te chape yo gaye toupatou, pa menm gen de ladan yo ki rete ansanm.

Yo renouvle wayòm nan devan Papa nou

Pèp la di Samyèl: “Ki moun ki t'ap mande: ‘Èske se Sayil ki pou gouvènen nou?’ Lage mesye sa yo ban nou, n'ap touye yo.”

Men Sayil di: “Yo p'ap touye pesonn jòdi a, paske se jòdi a Papa nou delivre pèp Izrayèl la.”

Samyèl di pèp la: “Ann ale, ann moute lavil Gilgal al renouvle wayòm nan la.” Tout pèp la ale lavil Gilgal, epi la devan Papa nou yo fè Sayil wa. La yo touye bèt yo ofri pou di mèsi devan Papa nou, epi Sayil ak tout moun pèp Izrayèl yo te kontan anpil.