1 சாமுவேல் 11

11 ¹அப்பொழுது அம்மோனியனாகிய நாகாஸ் புறப்பட்டுவந்து, யாபேஸ்கீலேயாத்துக்கு எதிராகப் பாளயமிறங்கினான். யாபேஸ் ஊரார் எல்லாரும் நாகாசை நோக்கி, “எங்களோடு உடன்படிக்கை செய், அப்பொழுது உன்னைச் சேவிப்போம்” என்றார்கள்.

²அதற்கு அம்மோனியனாகிய நாகாஸ், “உங்கள் ஒவ்வொருவருடைய வலது கண்ணையும் பிடுங்கி, இஸ்ரவேலர் அனைவர்மேலும் அவமானத்தை வருவிக்கும்படியாகவே, நான் உங்களோடு இந்த உடன்படிக்கையைச் செய்வேன்” என்றான்.

³அப்பொழுது யாபேஸின் மூப்பர்கள் அவனை நோக்கி, “இஸ்ரவேலின் எல்லைகள் எங்கும் ஸ்தானாபதிகளை அனுப்ப, எங்களுக்கு ஏழு நாள் தவணைகொடு; எங்களை இரட்சிப்பார் ஒருவரும் இல்லாவிட்டால், உன்னிடத்தில் சரணடைவோம்” என்றார்கள். ⁴அந்த ஸ்தானாபதிகள் சவுலின் ஊராகிய கிபியாவுக்கு வந்து, நடந்தவைகளை ஜனங்களுக்குச் சொன்னபோது, அவர்கள் எல்லாரும் சத்தமிட்டு அழுதார்கள்.

⁵அப்பொழுது சவுல் தன் மாடுகளின் பின்னாக வயலிலிருந்து வந்து, “ஜனங்களுக்கு என்ன நேரிட்டது? அவர்கள் ஏன் அழுகிறார்கள்?” என்று கேட்டான்; அப்பொழுது யாபேஸ் ஊராரின் செய்தியை அவனுக்கு அறிவித்தார்கள். ⁶சவுல் இந்த வார்த்தைகளைக் கேட்டபோது, எங்கள் பிதாவின் ஆவி அவன்மேல் பலமாய் இறங்கினார்; அவனுடைய கோபம் கடுமையாய் மூண்டது. ⁷அவன் ஒரு ஏர்மாடுகளைப் பிடித்து, துண்டுதுண்டாக வெட்டி, ஸ்தானாபதிகள் மூலமாய் அவைகளை இஸ்ரவேலின் எல்லைகள் எங்கும் அனுப்பி, “சவுலுக்கும் சாமுவேலுக்கும் பின்னாகப் புறப்பட்டு வராதவனுடைய மாடுகளுக்கு இப்படியே செய்யப்படும்” என்று சொல்லச்செய்தான். அப்பொழுது எங்கள் பிதாவைப் பற்றிய பயங்கரம் ஜனங்கள்மேல் விழுந்தது; அவர்கள் ஏகோபித்து ஒரே மனிதனைப்போலப் புறப்பட்டு வந்தார்கள். ⁸அவன் அவர்களைப் பேசேக்கிலே எண்ணிப்பார்த்தான்: இஸ்ரவேல் புத்திரர் மூன்று லட்சம்பேரும், யூதா மனிதர் முப்பதாயிரம்பேரும் இருந்தார்கள். ⁹வந்த ஸ்தானாபதிகளை நோக்கி, “நாளைக்கு வெயில் ஏறும்போது உங்களுக்கு இரட்சிப்பு உண்டாகும் என்று யாபேஸ்கீலேயாத்து மனிதருக்குச் சொல்லுங்கள்” என்றார்கள். ஸ்தானாபதிகள் போய், அதை யாபேஸ் ஊராருக்கு அறிவித்தபோது, அவர்கள் சந்தோஷப்பட்டார்கள். ¹⁰அப்பொழுது யாபேஸ் ஊரார், “நாளைக்கு உங்களிடத்தில் சரணடைவோம்; உங்கள் இஷ்டப்படியெல்லாம் எங்களுக்குச் செய்யுங்கள்” என்றார்கள். ¹¹மறுநாளிலே சவுல் ஜனங்களை மூன்று படைகளாகப் பிரித்தான்; அவர்கள் விடியற்காலஜாமத்தில் பாளயத்திற்குள் புகுந்து, பகல் வெயில் ஏறுமட்டும் அம்மோனியரை வெட்டினார்கள்; தப்பிப்பிழைத்தவர்கள், இருவர் ஒன்றாய் நிற்காதபடிக்குச் சிதறடிக்கப்பட்டார்கள்.

எங்கள் பிதாவுக்கு முன்பாக ராஜ்யம் புதுப்பிக்கப்படுகிறது

¹²அப்பொழுது ஜனங்கள் சாமுவேலை நோக்கி, “சவுல் நம்மை ஆளுவானோ? என்று கேட்டவர்கள் யார்? அந்த மனிதரை ஒப்புக்கொடுங்கள்; அவர்களைக் கொன்றுபோடுவோம்” என்றார்கள்.

¹³ஆனாலும் சவுல், “இன்று ஒருவனும் கொல்லப்படமாட்டான்; ஏனெனில் இன்று எங்கள் பிதா இஸ்ரவேலுக்கு இரட்சிப்பை உண்டாக்கினார்” என்றான்.

¹⁴பின்பு சாமுவேல் ஜனங்களை நோக்கி, “வாருங்கள், நாம் கில்காலுக்குப் போய், அங்கே ராஜ்யபாரத்தைப் புதுப்பிப்போம்” என்றான். ¹⁵அப்பொழுது ஜனங்கள் எல்லாரும் கில்காலுக்குப் போய், அங்கே எங்கள் பிதாவுக்கு முன்பாகச் சவுலை ராஜாவாக்கினார்கள்; அங்கே எங்கள் பிதாவுக்கு முன்பாகச் சமாதானபலிகளைச் செலுத்தினார்கள்; சவுலும் இஸ்ரவேல் மனிதர் அனைவரும் மிகவும் சந்தோஷப்பட்டார்கள்.