Ithumwui Avāna Saulwui mangā eina Israelli huimi
Nahash-na Jabesh-gilead-li, mi kachidawui mik yachang wuilui kasā ngalāmi-wui shamkhui thui. Saul-na lui rai leida pao shālhung kha, Manglāna ava khui, awui shiri kakap sha Israel-li kho, kala ngahongli Ammon-mi zatshong. Ana awui khangapnganaimi mathat: tharan ithumwui Avāna ngalungkhavai khuilaksai.
11 1Chieina Ammonpa Nahashna khavāda Jabesh-gileadli rairum vasai. Jabeshwui mi saikorana Nahashli hānga, "Ithumla ngarumkha sālu, kala ithumna nali otram ngatha̱ra."
2Ammonpa Nahashna ngahānkai, "Ina nathumla hi ngarumkha sāra: mi ava̱va̱wui yāpang mik latshoklaga Israel saikorali maishi ngasakra."
3Jabeshwui khararnaobingna ali hānga, "Israelwui leiret saikorali paomebing chihovā khavai ithumli shinithang khamilu. Ithumli kanshokmi makhalei akha, ithum nawuili hamsangra." 4Paomebingna Saulwui Gibe-ahli khavāda, mibingli shokkahai saikora unghānga, kala athum saikorana panglāk eina chapa.
5Chitharan Saulna awui mukkābing khanuklila luiwui eina rāhaowa. Ana hānga, "Mibingli khi shokhairakhala? Khi sāda athum chapkhala?" Chieina athumna Jabeshwui mibingwui pao ali unghānga. 6Saulna tuibing hi kashā eina, ithumwui Avāwui Manglā ali zangmi; awui malungkhavāt panglāk eina leihaowa. 7Ana mukkā kharit akha khuilaga, amarimrim sāthatlaga, paomebing eina Israelwui leiret saikorali chihovai: "Kachikathāna Saul eina Samuelwui khanuklila mashokkharā akha, awui mukkāli hithāda sāra." Chieina ithumwui Avāwui khangachee mibingli rāhaowa, kala athum mi akha thāda shokkharā. 8Ana Bezekli athumli mashinga: Israelnaobing lakh kathum kala Judahwui mi thing thumrā kāshunga. 9Athumna rākahai paomebingli hānga, "Jabesh-gileadwui mibingli hānglu: Akhama, ngashun kasā tharan, nathumli kanshokra." Paomebingna vāda Jabeshwui mibingli unghānga, kala athum ringphāhaowa. 10Jabeshwui mibingna hānga, "Akhama ithum nawuili hamsangra; nawui ningkachāng athishurda ithumli sālu." 11Akhamathang Saulna mibingli khum kathum khailaga, ngathor rāmrahli zanga, kala ngashun kasā tangda Ammonnaobingli sāthata; kataibing chi ngapha̱haowa, mi khani ngarumda maleimana.
Ithumwui Avāwui miktāli wungram onphalung
12Mibingna Samuelli hānga, "'Saulna ithumwuitungli mungrala?' da khipāna hāngkhala? Mibing chi khuirālu; ithumna athumli shaothatra."
13Kha Saulna hānga, "Aja mi akhala masāthatpaimara, kaja aja ithumwui Avāna Israelli huikhami sāhaira."
14Samuelna mibingli hānga, "Rālu, ithum Gilgalli vāusa, kala apam chili wungram onphalungsa." 15Mi saikorana Gilgalli vai, kala apam chili ithumwui Avāwui mangāli Saulli awunga sāhaowa. Apam chili athumna ithumwui Avāwui mangāli chingri kachigatbing pha̱phayai, kala Saul eina Israelwui mi saikorana panglāk eina ringphāhaowa.
