1 Samuel 10

10 ¹Chieina Samuelna thaokhong chi khuida Saulwui akuili heirorda, amaya̱ya, kala hānga, "Ithumwui Avāna awui shimluikatwui khamunga sākhavai nali tharchisinkhamina maningmalā? ²Aja nana iwui eina thuihai tharan, Benjaminwui leiret Zelzahli khalei Rachelwui chikhur shakhali nana mi khani samphangra. Athumna hāngra: 'Nana phākahai gadhābing chi samphanghaira; nawui avāva̱na athumwui pongli maningkhānluimana, ara nali ningkhānda, "Iwui naowui vang ina khi sārakhala?" da hānghaira.'

³Apam chiwui eina, Taborwui shirimthingli vālu, chili Bethelli ithumwui Avāshong kāvāda leikahai mi kathumna nali samphangra; akhana yaonao kachigat kathum khuira, akhana khamui kathum khuira, kala akhana drakhāra̱ sāhuikhao akha khuira. ⁴Athumna nali shālam milaga khamui khani mira, kala nana athumwui eina chi khuisangra.

⁵Chiwui thili nana ithumwui Avāwui Gibe-ahli rāra, chili Philistinewui raimipam leira; keinungli vāzangkhaleoda, athumwui mangāli tingteilā, timbrel, sipa̱, kala lyre khongda, kajuipamwui eina tungda marānda rākahai marān kachungkha nali samphangra. ⁶Ithumwui Avāwui Manglāna nawuitungli rārorra; nala athumla ngasoda marānra kala mi khangatei akha ngasāra. ⁷Hi machutkakhuibing nawuili rā tharan, nawui pāngna phākahai chi sālu, kaja ithumwui Avā nala ngasodalei. ⁸Ili rida Gilgalli tāhaolu. Ina kachangkhata nawuili tungda rikkatā kachigat chigatkhavai kala ningyatchigatwui pha̱kaphayā chigatkhavai rāra. Ina nawuili rālaga nana khi sāra kaji nali hāngranglakha eina tangda shinithang ngarailu."

Avāwui Machutkakhuibing Shokkahai

⁹Saulna Samuelwui eina ngareiungda thuihai tharan, ithumwui Avāna awui malung onmi, kala hi machutkakhuibing saikora chithang shokkahaina. ¹⁰Gibe-ahli marān kachungkhana ali samphanga, ithumwui Avāwui Manglāna awuitungli rārorhaowa, kala ana athumwui ngachaili marāna. ¹¹Ali ayāla theikahaibing saikorana ana marānbingla ngasoda marānpamda chi theilaga, mibingna akha eina akha ngahān ngaroka, "Kishwui naomayarali khi shokkahaikhala? Saulla marānbingwui ngachaili leila?"

¹²Chili mi akhana ngahāna, "Athumwui avā khipākhala?" Chieina hi chānjam akha ngasāhaowa: "Saulla marānbingwui ngachaili leila?" ^a a v12 'Athumwui avā khipākhala?' da ngahānkhami hina, marānbing sākhavai khangatei shimkhur maratmana da chitheimi—khipānakha Manglā chi phāser ngasakra. ¹³Ana marānkup kahaiwui thili, ana kajuipamli kāhaowa.

¹⁴Saulwui avāgatona ali kala awui raoli ngahāna, "Nani kali vāhaokhala?" "Gadhābing phākhavai," da ana hānga. "Athum maleisā chi theilaga, inina Samuelli rāhaira."

¹⁵Saulwui avāgatona hānga, "Ili kapona, Samuelna nali khi hāngkahai chi hāngmilu."

¹⁶Saulna awui avāgatoli hānga, "Gadhābing samphanghaira da ana inili kachangkhata hānga." Kha Samuelna mungwui pongli hāngkahai chi Saulna awui avāgatoli mahāngmana.

Avāna Awui Kapangkakhui Awunga Phongmi

¹⁷Chieina Samuelna mibingli Mizpahli ithumwui Avāli hokhuiya,

¹⁸ana Israelnaobingli hānga, "Israelwui ithumwui Avāna kahāngna: 'Ina Israelli Egyptwui eina thānshokkhame, kala nathumli Egyptnaobingwui pāng eina kala nathumli rekakhareka khalei wungram saikorawui pāng eina kankhui.'

¹⁹Kha aja nathumna nathumwui Avāli khalanhaira, ana khalatta nathumli nathumwui kakhanang kala ningkachot saikorawui eina huikhamena, kala ali hānga, 'Maningmana, ithumwuitungli awunga akha sangmilu.' Ara nathum khalatta ithumwui Avāwui mangāli shangbing kala shimkhurbingwui athishurda khuirālu." ^b b v19 Israelna miwui awunga akha kapoi chi, awui lungli, athumwuitungli athumwui Avā khalattawui leikashi khalei khamung chi khalankashi otna.

²⁰Samuelna Israelwui shang saikorali khuirā tharan, kalā eina Benjaminwui shangli tāhaowa. ²¹Ana Benjaminwui shangli shimkhurwui athishurda khuirā; Matric shimkhurli tāhaowa, chiwui thili Kishwui naomayara Saulli tāhaowa. Athumna ali phāvai, kha ali masamphangthuwa.

²²Chieina athumna ithumwui Avāli latluida ngahāna, "Mipā chi hili rāhairala?" Chieina ithumwui Avāna hānga, "Ana otromwui ngachaili ngathumda lei."

²³Athumna yongvāda ali chi pamwui eina khuisera. Ana mibingwui ngachaili nganing tharan, mibingli ana ayartui eina thuida juimeisera. ²⁴Samuelna mi saikorali hānga, "Ithumwui Avāna kapang kahai mi chi yanglu? Mi saikorawui ngachaili ali thāda khipākha maleimana." Mi saikorana, "Awunga okpeimeiranu!" da vaowa.

²⁵Samuelna mibingli awunga khamungwui shiyan-chikan hānga, chi lairik akhalui akhali kapilaga, ithumwui Avāwui mangāli haihai. Chiwui thili Samuelna mi saikorali kachichā shimli chihounghaowa. ²⁶Saulla Gibeahli khalei awui shimli unghaowa, kala ithumwui Avāna aning sāza̱ kahai raikapingbing ali ngasoda vāhaowa. ²⁷Kha achei-arei makathei mi kaikhana hānga, "Mipā hina ithumli kathāda huimirakhala?" Athumna ali yangkharinga, kala ali saman khikha mamithuwa. Kha Saulna khikha mahāngmana.