1 Samuel 9

9 ¹Benjaminwui mi akha leisai, awui ming Kishna; ana Abielwui naomayara, Abiel Zerorwui naomayara, Zeror Becorathwui naomayara, Becorath Aphiahwui naomayarana. Ana Benjaminwui mi, kashāng kala khayākakā leikahai mina. ²Ana Saul kaho mayarnao akha lei, azak mathālak kahai yaronnao akhana. Israelwui mi khipākhala ali reimei azak mathāla maleimana; yartui eina thuida ana mi saikorali juimeiserhaowa.

³Saulwui avāva̱ Kishwui gadhābing shimānhaowa. Chiwui vang Kishna awui nao Saulli hānga, "Raobingli akha nala khuilaga gadhābing chi phāvālu." ⁴Ana Ephraimwui kaphungram kala Shalishah ngalei ngareivāhaowa, kha anina chi masamphangthuwa. Anina Shaalim ngalei akāna, kha gadhābing chili maleithuwa. Ana Benjamin ngalei ngareivāhaowa, kha aruila anina chi masamphangthuwa.

⁵Anina Zuph ngaleili vākashung tharan, Saulna ali khangaso rao chili hānga, "Rālu, ini latunghaosa; maningakha iwui avāna gadhābingwui vang malungringda chi horhaida iniwui vang malungringhaora."

⁶Kha raona hānga, "Yanglu, keinung hili khayākakā leikahai ithumwui Avāwui mi akha lei; ana kahahāng saikora ungshungvaichinga. Ara chili vāusa; chithākha inina khi shongfa vārakhala kaji ana inili hānghaora."

⁷Saulna awui raoli hānga, "Kha ini vāakha, mipā chili khi khuirārakhala? Iniwui khaoli kashakazā thuihaira, kala ithumwui Avāwui mipā chili lemmet maleimana. Iniwui khalei khikha lei?"

⁸Raona Saulli ngahānkā luishita, "Yanglu, iwui pāngli lupāsā kateo akha lei. Chi ithumwui Avāwui mipā chili mira, chithākha ana iniwui shongfa chi inili hānghaora." ⁹(Rida Israelli, ithumwui Avāli ngasan khavai vāki kaji akhana, "Matheipa chili vāusa," da hānga, kaja aruihonwui marān chi rida matheipa da hosai.).

¹⁰Saulna ngahānkai, "Phālakhaira. Vāusa." Chithāda anina ithumwui Avāwui mipā khalei keinung chili vāhaowa. ¹¹Anina keinung chishong kaphung vālaga, tara̱ sok khavai zatphok kahai ngalānaobingli samphanga, kala ngahāna, "Matheipa hili leila?"

¹²Athumna hānga, "Lei, ana naniwui rida zathaira. Kathākmeilu, ana aja keinungli rāhaira, kaja mibingna aja kajuipamli pha̱kaphayā akha lei. ¹³Nanina keinung chili vāzangkhaleo eina, ana phazā khavai kajuipamli mavāla eina tangda ali samphangra. Ana marāranglakha eina tangda mibingna maphazāmara, kaja ana pha̱kaphayā chi somiphalungra; chiwui thili maningla ngasotnaobingna phazāra. Ara vāsālu; nanina ali arui samphangra."

¹⁴Anina keinung chili vākai. Anina keinungli kazang tharan, Samuelna kajuipamli vākida aniwui ngaveishong rāhaowa.

¹⁵Saul marāki kaji zimiksho rida, ithumwui Avāna Samuelli hi theingasak sāsai:

¹⁶"Akhama hi atamchangli ina Benjamin ngalei eina mi akha nali chihovāra, kala nana ali iwui mi Israelwui wungnao khavai neomilu; ana iwui mibingli Philistinenaobingwui pāng eina huimira, kaja ina iwui mibingli theihaira, kala athumwui khavao ili rāshunghaira."

¹⁷Samuelna Saulli theilaga, ithumwui Avāna ali hānga, "Ina hāngkahai mipā chi hina; hipāna iwui mibingli khayaira."

¹⁸Saulna ngavei pamli Samuelli vāda hānga, "Marānwui shim kali leikhala, ili kapona hāngmilu."

¹⁹Samuelna ngahānkai, "I marānna. Iwui rida kajuipamli vāsālu. Aja nana ila ngasoda phazāra; ngathor ina nali chihovāra, kala nawui ningli khalei saikora nali hāngmira. ²⁰Kathumthang kāhai nana phākhavā gadhābing chi phāhaira, chiwui vang malung maringalu. Kala Israelwui kharei lan saikora khipāwui, nala nawui avāva̱wui shimkhur saikorawui maningmala?"

²¹Saulna ngahānkai, "I Benjaminwui mi, Israel shangwui ngachaili teomeikap kaji shangwui eina maningmala, kala iwui shimkhur chi Benjamin shimkhurbingwui ngachaili teomeikap kaji maningmala? Chiwui vang khisāda nana ili hithāda hāngkhala?"

²²Chitharan Samuelna Saul kala awui raoli kā alungli khuizanglaga, hokahaibingwui mathāmeikap kaji pamli anili pamngasaka; athum saikora thumrā sha̱khana. ²³Samuelna hangkashe chili hānga, "Ina nali mihai yar, ngatei khavai da ina kahāng kahai chi khuirālu." ²⁴Hangkashe china akhaishāng kala chiwuitungli khalei chi khāngkālaga Saulwui mangāli haikhui. Samuelna hānga, "Yanglu, hi nawui vang haikahai chi hina. Phāzalu, kaja hi mibing hoikahaiwui eina thuida, atam hiwui vang nawui vang ngatei kahaina." Chithāda chithang Saulna Samuella ngasoda phāzai.

²⁵Athumna kajuipamwui eina keinungli latunga, kala Samuelna shimtungli Saulla khararchān sai. ²⁶Athumna ngathorthak thuilaga, ngathor zimik shoknanai Samuelna shimtungli Saulli hokhui, "Ngakarthuilu, kala ina nali chihovāra." Chieina Saul ngakarthuilaga, ana kala Samuel ani ngasoda shongfali shoka. ²⁷Athumna keinungwui ayarshong latung tharan, Samuelna Saulli hānga, "Rao chili rida chihovālu"—chieina ana rida vai—"kha ina nali ithumwui Avāwui tui hāngmi khavai, na kasha̱kha pamsālu."