1 Samuẹli 9

9 ¹Ọkùnrin kan wà ní ẹ̀yà Benjamini tí orúkọ rẹ̀ ń jẹ́ Kiṣi, ọmọ Abieli, ọmọ Serori, ọmọ Bekorati, ọmọ Afia, ará Benjamini, ọkùnrin tí ó ní ọrọ̀ àti ọlá. ²Ó ní ọmọkùnrin kan tí orúkọ rẹ̀ ń jẹ́ Saulu, ọ̀dọ́mọkùnrin arẹwà—kò sí ọmọ Israẹli kankan tí ó rẹwà jù ú lọ; láti èjìká rẹ̀ sókè ó ga ju gbogbo ènìyàn lọ.

³Àwọn kẹ́tẹ́kẹ́tẹ́ Kiṣi, baba Saulu, sọnù, Kiṣi sì wí fún Saulu ọmọ rẹ̀ pé, “Mú ọ̀kan nínú àwọn ìránṣẹ́ pẹ̀lú rẹ, kí o sì lọ wá àwọn kẹ́tẹ́kẹ́tẹ́.” ⁴Ó la agbègbè olókè Efraimu àti ilẹ̀ Ṣaliṣa kọjá, ṣùgbọ́n wọn kò rí wọn. Wọ́n la ilẹ̀ Ṣaalimu kọjá, ṣùgbọ́n àwọn kẹ́tẹ́kẹ́tẹ́ náà kò sí níbẹ̀. Ó la ilẹ̀ Benjamini kọjá, ṣùgbọ́n síbẹ̀ wọn kò rí wọn.

⁵Nígbà tí wọ́n dé ilẹ̀ Sufu, Saulu wí fún ìránṣẹ́ tí ó wà pẹ̀lú rẹ̀ pé, “Wá, ẹ jẹ́ kí a padà, kí baba mi má bàa dẹ́kun àníyàn nípa àwọn kẹ́tẹ́kẹ́tẹ́, kí ó sì bẹ̀rẹ̀ sí ní àníyàn nípa wa.”

⁶Ṣùgbọ́n ìránṣẹ́ náà wí pé, “Wò ó, ènìyàn Baba wa kan wà ní ìlú yìí, ẹni tí a bọ̀wọ̀ fún; gbogbo ohun tí ó bá sọ a máa ṣẹ dájúdájú. Ẹ jẹ́ kí a lọ síbẹ̀ nísinsìnyí; bóyá ó lè sọ ọ̀nà tí a ó gbà fún wa.”

⁷Saulu wí fún ìránṣẹ́ rẹ̀ pé, “Ṣùgbọ́n bí a bá lọ, kín ni a ó mú wá fún ọkùnrin náà? Oúnjẹ tí ó wà nínú àpò wa ti tán, kò sì sí ẹ̀bùn fún ènìyàn Baba wa. Kín ni a ní?”

⁸Ìránṣẹ́ náà tún dá Saulu lóhùn pé, “Wò ó, mo ní ẹyọ fàdákà kékeré kan. Èmi ó fi fún ènìyàn Baba wa kí ó lè sọ ọ̀nà wa fún wa.” ⁹(Nígbà àtijọ́ ní Israẹli, ẹnikẹ́ni tí ó bá fẹ́ lọ wádìí lọ́dọ̀ Baba wa a máa wí pé, “Ẹ jẹ́ kí a lọ sọ́dọ̀ aríran,” nítorí wòlíì òde òní ni a ń pè ní aríran nígbà náà.).

¹⁰Saulu dáhùn pé, “Ó dára. Ẹ jẹ́ kí a lọ.” Bẹ́ẹ̀ ni wọ́n lọ sí ìlú tí ènìyàn Baba wa wà. ¹¹Bí wọ́n ti ń gun òkè lọ sí ìlú náà, wọ́n pàdé àwọn ọ̀dọ́bìnrin tí ń jáde wá pọnmi, wọ́n sì béèrè pé, “Ṣé aríran náà wà níhìn-ín?”

¹²Wọ́n dáhùn pé, “Ó wà. Ó wà níwájú yín. Ẹ yára, ó wá sí ìlú lónìí nítorí àwọn ènìyàn ní ẹbọ kan ní ibi gíga. ¹³Bí ẹ bá ṣẹ̀ṣẹ̀ wọ ìlú, ẹ ó rí i kí ó tó gun ibi gíga lọ jẹun. Àwọn ènìyàn kì yóò jẹun títí yóò fi dé, nítorí òun gbọ́dọ̀ súre fún ẹbọ náà; nígbà náà ni àwọn àlejò yóò tó jẹun. Ẹ gòkè lọ nísinsìnyí—ẹ ó rí i lọ́gán.”

¹⁴Wọ́n gòkè lọ sí ìlú náà. Bí wọ́n ti ń wọlé, Samuẹli bọ̀ wá pàdé wọn, tí ó ń gun ibi gíga lọ.

¹⁵Ní ọjọ́ kan ṣáájú kí Saulu tó dé, Baba wa ti fi èyí hàn Samuẹli pé:

¹⁶“Ní nǹkan bí àkókò yìí lọ́la, èmi ó rán ọkùnrin kan sí ọ láti ilẹ̀ Benjamini wá. Fi òróró yàn án ní olórí lórí àwọn ènìyàn mi Israẹli; òun ni yóò gba àwọn ènìyàn mi là kúrò lọ́wọ́ àwọn Filistini, nítorí mo ti rí àwọn ènìyàn mi, igbe wọn sì ti dé ọ̀dọ̀ mi.”

¹⁷Nígbà tí Samuẹli rí Saulu, Baba wa sọ fún un pé, “Ọkùnrin tí mo sọ nípa rẹ̀ nìyí; èyí ni yóò máa darí àwọn ènìyàn mi.”

¹⁸Saulu súnmọ́ Samuẹli ní ẹnu ibodè, ó sì wí pé, “Jọ̀wọ́ sọ ibi tí ilé aríran náà wà fún mi.”

¹⁹Samuẹli dáhùn pé, “Èmi ni aríran náà. Gòkè lọ ṣáájú mi sí ibi gíga. Lónìí ìwọ ó bá mi jẹun; ní òwúrọ̀ èmi ó jẹ́ kí o máa lọ, èmi ó sì sọ gbogbo ohun tí ó wà ní ọkàn rẹ fún ọ. ²⁰Àwọn kẹ́tẹ́kẹ́tẹ́ tí o sọnù ní ọjọ́ mẹ́ta sẹ́yìn ni a ti rí, nítorí náà má ṣe àníyàn nípa wọn. Ta ni ó sì ni gbogbo ohun ìníyebíye Israẹli, bí kò ṣe ìwọ àti gbogbo ilé baba rẹ?”

²¹Saulu dáhùn pé, “Èmi kì í ha ṣe ará Benjamini, láti inú ẹ̀yà tí ó kéré jù ní Israẹli, tí ìdílé mi sì jẹ́ èyí tí ó kéré jù nínú àwọn ìdílé Benjamini? Èéṣe tí ìwọ fi sọ èyí fún mi?”

²²Nígbà náà ni Samuẹli mú Saulu àti ìránṣẹ́ rẹ̀ wá sínú gbọ̀ngàn, ó sì fi wọ́n jókòó ní orí àwọn àlejò tí a pè—tí ó tó ọgbọ̀n ènìyàn. ²³Samuẹli wí fún alásè pé, “Mú ìpín tí mo fi fún ọ wá, èyí tí mo sọ pé kí o yà sọ́tọ̀.” ²⁴Alásè náà gbé itan àti ohun tí ó wà lórí rẹ̀, ó sì gbé e ka iwájú Saulu. Samuẹli wí pé, “Ohun tí a pa mọ́ fún ọ nìyí. Jẹun, nítorí a yà á sọ́tọ̀ fún ọ fún ayeye yìí, láti ìgbà tí mo ti pe àwọn àlejò wọ̀nyí.” Bẹ́ẹ̀ ni Saulu bá Samuẹli jẹun ní ọjọ́ náà.

²⁵Wọ́n sọ̀kalẹ̀ láti ibi gíga wá sínú ìlú, Samuẹli sì bá Saulu sọ̀rọ̀ lórí òrùlé. ²⁶Wọ́n dìde ní kùtùkùtù, ní àfẹ̀mọ́júmọ́ Samuẹli pe Saulu lórí òrùlé pé, “Dìde, kí èmi ó jẹ́ kí o máa lọ.” Saulu dìde, àwọn méjèèjì, òun àti Samuẹli, jọ jáde sí òde. ²⁷Bí wọ́n ti ń sọ̀kalẹ̀ lọ sí ìpẹ̀kun ìlú náà, Samuẹli wí fún Saulu pé, “Jẹ́ kí ìránṣẹ́ náà máa lọ ṣáájú”—ó sì lọ—“ṣùgbọ́n ìwọ dúró díẹ̀, kí èmi ó lè sọ ọ̀rọ̀ Baba wa fún ọ.”