1 Samweli 9

9 ¹Palikuwa na mtu wa Benyamini jina lake Kishi, mwana wa Abieli, mwana wa Serori, mwana wa Bekorathi, mwana wa Afia, Mbenyamini, mtu tajiri na mwenye heshima. ²Naye alikuwa na mwana jina lake Sauli, kijana mzuri wa sura—hakuna Mwisraeli aliyekuwa mzuri kumpita; toka mabegani na kupanda juu alikuwa mrefu kuliko watu wote.

³Punda za Kishi, baba yake Sauli, zilipotea, basi Kishi akamwambia Sauli mwanawe, "Mchukue mmoja wa watumishi pamoja nawe, uende kuzitafuta punda." ⁴Akapita katika nchi ya vilima ya Efraimu na nchi ya Shalisha, lakini hawakuzipata. Wakapita katika nchi ya Shaalimu, lakini punda hawakuwako. Akapita katika nchi ya Benyamini, lakini bado hawakuzipata.

⁵Walipofika katika nchi ya Sufu, Sauli akamwambia mtumishi aliyekuwa naye, "Njoo, turudi, baba yangu asije akaacha kuzifikiria punda, akaanza kutufikiria sisi."

⁶Lakini mtumishi akamwambia, "Tazama, katika mji huu yuko mtu wa Baba yetu, mwenye kuheshimiwa; yote asemayo hakika hutimia. Twende huko sasa; huenda akaweza kutuambia njia tuiendeayo."

⁷Sauli akamwambia mtumishi wake, "Lakini kama tukienda, tutamletea nini yule mtu? Mkate katika mifuko yetu umekwisha, wala hatuna zawadi ya kumpelekea mtu wa Baba yetu. Tunacho nini?"

⁸Mtumishi akamjibu Sauli tena, "Tazama, ninacho kipande kidogo cha fedha. Nitampa mtu wa Baba yetu ili atuambie njia yetu." ⁹(Zamani katika Israeli, mtu aliyekwenda kutafuta shauri kwa Baba yetu alikuwa akisema, "Twendeni kwa mwonaji," kwa maana nabii wa siku hizi zamani aliitwa mwonaji.).

¹⁰"Vema," Sauli akajibu. "Twende." Basi wakaenda mjini alikokuwa yule mtu wa Baba yetu. ¹¹Walipokuwa wakipanda kilima kuelekea mjini, wakakutana na wasichana wakitoka nje kuteka maji, wakawauliza, "Je, yule mwonaji yuko hapa?"

¹²"Yuko," wakasema. "Yuko mbele yenu tu. Fanyeni haraka, kwa maana amekuja mjini leo, kwa sababu watu wana dhabihu mahali pa juu. ¹³Mtakapoingia tu mjini mtamwona kabla hajapanda mahali pa juu kula. Watu hawatakula mpaka aje, kwa maana yeye ndiye atakayeibariki dhabihu; ndipo wale walioalikwa watakapokula. Pandeni sasa—mtamwona mara moja."

¹⁴Wakapanda kwenda mjini. Walipokuwa wakiingia, Samweli akaja kuwaelekea, akipanda kuelekea mahali pa juu.

¹⁵Basi siku moja kabla ya Sauli kuja, Baba yetu alikuwa amemfunulia Samweli jambo hili:

¹⁶"Kesho karibu wakati kama huu nitakupelekea mtu kutoka nchi ya Benyamini. Umtie mafuta awe kiongozi juu ya watu wangu Israeli; naye atawaokoa watu wangu na mkono wa Wafilisti, kwa maana nimewaona watu wangu, na kilio chao kimenifikia."

¹⁷Samweli alipomwona Sauli, Baba yetu akamwambia, "Huyu ndiye mtu niliyekuambia habari zake; huyu ndiye atakayewatawala watu wangu."

¹⁸Sauli akamwendea Samweli langoni, akasema, "Tafadhali niambie, nyumba ya mwonaji iko wapi?"

¹⁹"Mimi ndimi mwonaji," Samweli akajibu. "Panda mbele yangu kwenda mahali pa juu. Leo utakula pamoja nami; asubuhi nitakuaga na kukuambia yote yaliyo moyoni mwako. ²⁰Kuhusu punda uliopoteza siku tatu zilizopita, wamekwisha kupatikana, basi usiwahangaikie. Naye ni nani mwenye vyote vinavyotamaniwa katika Israeli, kama si wewe na nyumba yote ya baba yako?"

²¹Sauli akajibu, "Je, mimi si Mbenyamini, wa kabila dogo kuliko yote ya Israeli, na jamaa yangu ni ndogo kuliko jamaa zote za Benyamini? Mbona waniambia neno kama hili?"

²²Ndipo Samweli akamchukua Sauli na mtumishi wake, akawaingiza chumbani, akawaketisha mahali pa juu kati ya wale walioalikwa—wapata thelathini. ²³Samweli akamwambia mpishi, "Lete sehemu ile niliyokupa, ile niliyokuambia uiweke kando." ²⁴Mpishi akainua paja na kilichokuwa juu yake, akakiweka mbele ya Sauli. Samweli akasema, "Tazama, hiki ndicho kilichowekwa kwa ajili yako. Kula, kwa maana kiliwekwa akiba kwa ajili yako kwa nafasi hii, tangu niliposema, 'Nimewaalika watu.'" Basi Sauli akala pamoja na Samweli siku ile.

²⁵Wakashuka kutoka mahali pa juu kuingia mjini, naye Samweli akazungumza na Sauli juu ya dari. ²⁶Wakaamka mapema, na kulipopambazuka Samweli akamwita Sauli juu ya dari, akisema, "Amka, nami nitakuaga." Sauli akaamka, nao wote wawili, yeye na Samweli, wakatoka nje pamoja njiani. ²⁷Walipokuwa wakishuka kuelekea mwisho wa mji, Samweli akamwambia Sauli, "Mwambie mtumishi aende mbele yetu"—naye akaenda—"lakini wewe simama kitambo, ili nikuambie neno la Baba yetu."