1 Samyèl 9 FHB Father's Heart Bible™

9 ¹Te gen yon nonm nan branch fanmi Benjamen yo ki te rele Kich. Se te pitit Abyèl, Abyèl se te pitit Zewò, Zewò se te pitit Bekora, Bekora se te pitit Afija. Yo tout te moun branch Benjamen. Kich te yon nonm ki te rich e ki te gen anpil konsiderasyon. ²Li te gen yon pitit gason yo te rele Sayil, yon jenn gason ki bèl anpil. Pa t gen yon moun nan pèp Izrayèl la ki te pi bèl pase l. Depi nan zepòl li moute, li te pi wo pase tout moun.

³Bourik Kich, papa Sayil la, te pèdi. Kich di Sayil, pitit gason l lan: “Pran yonn nan domestik yo avè w, al chèche bourik yo.” ⁴Li travèse mòn Efrayim yo ak peyi Chalicha a, men yo pa jwenn yo. Yo pase nan peyi Chalim lan, men bourik yo pa t la. Li travèse peyi Benjamen an, men yo pa jwenn yo toujou.

⁵Lè yo rive nan peyi Zouf la, Sayil di domestik ki te avè l la: “Vini non, ann tounen, osinon papa m ap sispann enkyete l pou bourik yo, l ap konmanse enkyete l pou nou.”

⁶Men domestik la di l: “Gade, gen yon moun Papa nou nan lavil sa a, yon moun yo respekte anpil. Tou sa li di rive vre. Ann al la koulye a. Petèt l a ka di nou ki chemen pou nou pran.”

⁷Sayil di domestik li a: “Men si nou ale, kisa nou ka pote bay nonm nan? Pen ki te nan sak nou yo fini, nou pa gen okenn kado pou moun Papa nou an. Kisa nou genyen?”

⁸Domestik la reponn Sayil ankò: “Gade, mwen gen yon ti pyès ajan. M a bay moun Papa nou an li pou l ka di nou ki chemen pou nou pran.” ⁹(Nan tan lontan nan peyi Izrayèl, lè yon moun t ap al konsilte Papa nou, li te konn di: “Ann al jwenn divinò a,” paske moun yo rele pwofèt jòdi a, se divinò yo te konn rele l nan tan sa a.)

¹⁰Sayil reponn li: “Nou byen di. Ann ale.” Se konsa yo ale nan lavil kote moun Papa nou an te ye a. ¹¹Pandan yo t ap moute mòn nan pou rive nan lavil la, yo kontre ak kèk jenn fi ki t ap soti vin chèche dlo. Yo mande yo: “Èske divinò a la?”

¹²Medam yo reponn: “Wi, li la. Li jis devan nou. Fè vit, li vin nan lavil la jòdi a paske pèp la gen yon ofrann pou l ofri kote yo fè sèvis sou tèt mòn nan. ¹³Kou nou antre nan lavil la, n a jwenn li anvan l moute kote yo fè sèvis sou tèt mòn nan pou l manje. Pèp la p'ap manje toutotan li pa rive, paske se li ki pou beni ofrann nan. Se apre sa envite yo va manje. Moute koulye a, n a jwenn li lamenm.”

¹⁴Yo moute nan lavil la. Antan yo t ap antre, Samyèl vin kontre ak yo, li t apral kote yo fè sèvis sou tèt mòn nan.

¹⁵Enben, jou anvan Sayil te rive a, Papa nou te fè Samyèl konnen bagay sa a:

¹⁶“Denmen, vè lè sa a, m ap voye yon nonm soti nan peyi Benjamen ba ou. W a vide lwil sou tèt li pou mete l chèf sou pèp mwen an, pèp Izrayèl la. L a delivre pèp mwen an anba men moun Filisti yo, paske mwen wè pèp mwen an, rèl yo rive jwenn mwen.”

¹⁷Lè Samyèl wè Sayil, Papa nou di l: “Men nonm mwen te pale ou la a. Se li menm ki pral gouvènen pèp mwen an.”

¹⁸Sayil pwoche bò kote Samyèl nan papòt lavil la, li di l: “Tanpri, di m ki kote kay divinò a ye.”

¹⁹Samyèl reponn li: “Se mwen menm ki divinò a. Moute devan m kote yo fè sèvis sou tèt mòn nan. Jòdi a, n a manje ansanm avè m. Denmen maten m a kite ou ale, m a di ou tou sa ki nan kè ou. ²⁰Pou bourik ou te pèdi twa jou de sa yo, yo jwenn yo deja. Ou pa bezwen enkyete ou pou yo. Epitou, pou ki moun tout bon bagay ki genyen nan peyi Izrayèl la ye, si se pa pou ou menm ak tout fanmi papa ou?”

²¹Sayil reponn: “Èske mwen pa yon moun branch Benjamen, branch ki pi piti nan pèp Izrayèl la? Èske fanmi mwen an pa pi piti nan tout fanmi branch Benjamen yo? Poukisa w ap di m bagay konsa?”

²²Lè sa a, Samyèl pran Sayil ak domestik li a, li mennen yo antre nan gwo sal la, li fè yo chita nan plas donè a devan tout envite yo, ki te vè trant moun. ²³Samyèl di kizinye a: “Pote moso vyann mwen te ba ou a, sa mwen te di ou mete apa a.” ²⁴Kizinye a pran jigo a ak tou sa ki te sou li, li mete l devan Sayil. Samyèl di: “Men sa yo te sere pou ou a. Manje, paske se pou okazyon sa a yo te mete l apa pou ou, depi lè mwen te envite moun sa yo.” Se konsa, Sayil manje ansanm ak Samyèl jou sa a.

²⁵Yo desann soti kote yo fè sèvis sou tèt mòn nan, yo antre nan lavil la. Samyèl pale ak Sayil sou tèt kay la. ²⁶Yo leve granmaten. Lè bajou kase, Samyèl rele Sayil ki te sou tèt kay la: “Leve non, m a kite ou ale.” Sayil leve, epi yo toulede, li menm ak Samyèl, soti ansanm nan lari a. ²⁷Pandan yo t ap desann nan bò pòtay lavil la, Samyèl di Sayil: “Di domestik la pran devan” — epi li pran devan — “men ou menm, rete yon ti moman, pou m ka fè ou konnen pawòl Papa nou.”