1 ሳሙኤል 9

9 ¹ቂስ የሚባል አንድ የብንያም ሰው ነበረ፤ እርሱም የአብኤል ልጅ ነበር፤ አብኤል የጸሮር ልጅ፣ ጸሮር የበኮራት ልጅ፣ በኮራት የአፊያ ልጅ ነበር፤ አፊያም ብንያማዊ ነበር፤ ቂስም የተከበረ ባለጠጋ ሰው ነበር። ²ሳኦል የሚባል ልጅም ነበረው፤ መልከ መልካም ጎልማሳ ነበር፤ ከእስራኤላውያን መካከል ከእርሱ ይልቅ መልከ መልካም የሆነ አልነበረም፤ ከትከሻው ጀምሮ ከሕዝቡ ሁሉ ይረዝም ነበር።

³የሳኦል አባት የቂስ አህዮች ጠፉ፤ ቂስም ልጁን ሳኦልን፣ “ከብላቴኖቹ አንዱን ይዘህ ሄደህ አህዮቹን ፈልግ” አለው። ⁴የኤፍሬምን ተራራማ አገር አቋርጦ የሻሊሻንም ምድር አለፈ፤ ነገር ግን አላገኟቸውም። የሻዓሊምንም ምድር አለፉ፤ አህዮቹ ግን በዚያ አልነበሩም። የብንያምንም ምድር አቋረጠ፤ ዳሩ ግን አላገኟቸውም።

⁵ወደ ጹፍ ምድር በደረሱ ጊዜ ሳኦል ከእርሱ ጋር ለነበረው ብላቴና፣ “ና፣ እንመለስ፤ አለዚያ አባቴ ስለ አህዮቹ መጨነቁን ትቶ ስለ እኛ ይጨነቃል” አለው።

⁶ብላቴናው ግን፣ “እነሆ፣ በዚህ ከተማ የተከበረ የአባታችን ሰው አለ፤ የሚናገረው ሁሉ በርግጥ ይፈጸማል። አሁን ወደዚያ እንሂድ፤ ምናልባት የምንሄድበትን መንገድ ይነግረን ይሆናል” አለ።

⁷ሳኦልም ብላቴናውን፣ “ብንሄድ ግን ለሰውዬው ምን እናመጣለን? በከረጢቶቻችን የነበረው እንጀራ አልቋል፤ ለአባታችን ሰውም የምንሰጠው ስጦታ የለም። ምን አለን?” አለው።

⁸ብላቴናውም እንደገና ሳኦልን መልሶ፣ “እነሆ፣ ትንሽ የብር ሳንቲም አለኝ፤ መንገዳችንን እንዲነግረን ለአባታችን ሰው እሰጠዋለሁ” አለው። ⁹(በቀድሞ ዘመን በእስራኤል ውስጥ አባታችንን ለመጠየቅ የሚሄድ ሁሉ፣ “ወደ ባለ ራእዩ እንሂድ” ይል ነበር፤ ዛሬ ነቢይ የሚባለው በዚያን ጊዜ ባለ ራእይ ይባል ነበርና።)

¹⁰ሳኦልም፣ “መልካም፤ እንሂድ” ብሎ መለሰ። ስለዚህ የአባታችን ሰው ወደ ነበረበት ከተማ ሄዱ። ¹¹ወደ ከተማዪቱ የሚወስደውን ኰረብታ ሲወጡ ውኃ ለመቅዳት የወጡ ወጣት ሴቶችን አገኙ፤ “ባለ ራእዩ እዚህ አለ?” ብለውም ጠየቁ።

¹²እነርሱም፣ “አለ፤ እነሆ ከፊትህ ነው። ፍጠን፤ ሕዝቡ ዛሬ በኰረብታው መስገጃ ላይ መሥዋዕት ስላላቸው ወደ ከተማዪቱ መጥቷል። ¹³ከተማዪቱ እንደገባችሁ ወዲያውኑ ወደ ኰረብታው መስገጃ ለመብላት ከመውጣቱ በፊት ታገኙታላችሁ። እርሱ መሥዋዕቱን መባረክ ስላለበት ሕዝቡ እስኪመጣ ድረስ አይበላም፤ ከዚያ በኋላ ተጋባዦቹ ይበላሉ። አሁን ውጡ፤ ወዲያውኑ ታገኙታላችሁ” አሉ።

¹⁴ወደ ከተማዪቱም ወጡ። በገቡ ጊዜ ሳሙኤል ወደ ኰረብታው መስገጃ ሊወጣ እያለ ወደ እነርሱ መጣ።

¹⁵ሳኦል ከመምጣቱ በፊት ባለው ቀን አባታችን ይህን ለሳሙኤል ገልጦ ነበር፤

¹⁶“ነገ እንደዛሬው ሰዓት ከብንያም ምድር አንድ ሰው እልክልሃለሁ፤ በሕዝቤ በእስራኤል ላይ አለቃ አድርገህ ቅባው፤ እርሱም ሕዝቤን ከፍልስጥኤማውያን እጅ ያድናል፤ ሕዝቤን አይቻለሁና፤ ጩኸታቸውም ወደ እኔ ደርሷል” ብሎ ነበር።

¹⁷ሳሙኤልም ሳኦልን ባየ ጊዜ አባታችን፣ “የነገርኩህ ሰው እነሆ ይህ ነው፤ ይህ ሰው በሕዝቤ ላይ ይገዛል” አለው።

¹⁸ሳኦልም በበሩ አጠገብ ወደ ሳሙኤል ቀርቦ፣ “እባክህ የባለ ራእዩ ቤት የት እንደ ሆነ ንገረኝ” አለው።

¹⁹ሳሙኤልም መልሶ፣ “ባለ ራእዩ እኔ ነኝ። ቀድመኸኝ ወደ ኰረብታው መስገጃ ውጣ፤ ዛሬ ከእኔ ጋር ትበላለህ፤ ነገ ጥዋት በልብህ ያለውን ሁሉ ነግሬህ እሸኝሃለሁ። ²⁰ከሦስት ቀን በፊት የጠፉብህ አህዮች ተገኝተዋል፤ ስለዚህ ስለ እነርሱ አትጨነቅ። እስራኤል የሚከጅለው ሁሉ የማን ነው? ለአንተና ለአባትህ ቤት ሁሉ አይደለምን?” አለ።

²¹ሳኦልም መልሶ፣ “እኔ ከእስራኤል ነገዶች ሁሉ ከሚያንሰው ከብንያም ነገድ የሆንሁ ብንያማዊ አይደለሁምን? ጎሳዬስ ከብንያም ጎሳዎች ሁሉ ያነሰ አይደለምን? ታዲያ ስለ ምን እንዲህ ትለኛለህ?” አለ።

²²ከዚያም ሳሙኤል ሳኦልንና ብላቴናውን ወደ አዳራሹ አስገብቶ፣ ከተጋበዙት እንግዶች መካከል በቀዳሚው ስፍራ አስቀመጣቸው፤ እንግዶቹም ሠላሳ ያህል ነበሩ። ²³ሳሙኤልም ምግብ አዘጋጁን፣ “እንድታስቀምጠው የነገርኩህን የሰጠሁህን ድርሻ አምጣ” አለው። ²⁴ምግብ አዘጋጁም ታፋውንና በላዩ የነበረውን አንሥቶ በሳኦል ፊት አስቀመጠ። ሳሙኤልም፣ “የተቀመጠልህ እነሆ ይህ ነው፤ ብላ፤ እነዚህን እንግዶች ከጠራሁበት ጊዜ ጀምሮ ለዚህ ወቅት ተጠብቆልሃልና” አለ። ስለዚህ ሳኦል በዚያ ቀን ከሳሙኤል ጋር በላ።

²⁵ከኰረብታው መስገጃም ወደ ከተማዪቱ ወረዱ፤ ሳሙኤልም በሰገነቱ ላይ ከሳኦል ጋር ተነጋገረ። ²⁶ማልደውም ተነሡ፤ ሲነጋም ሳሙኤል ሳኦልን ወደ ሰገነቱ ጠርቶ፣ “ተነሥ፤ እሸኝሃለሁ” አለው። ሳኦልም ተነሣ፤ ሁለቱም እርሱና ሳሙኤል በአንድነት ወደ አደባባዩ ወጡ። ²⁷ወደ ከተማዪቱ ዳርቻ ሲወርዱ ሳሙኤል ሳኦልን፣ “ብላቴናው ቀድሞን ይሂድ” አለው፤ እርሱም ሄደ፤ “አንተ ግን የአባታችንን ቃል እነግርህ ዘንድ ጥቂት ቆይ” አለው።