1 ሳሙኤል 8

8 ¹ሳሙኤል በሸመገለ ጊዜ፣ ልጆቹን በእስራኤል ላይ ዳኞች አድርጎ ሾማቸው። ²የበኵር ልጁ ኢዮኤል፣ ሁለተኛውም አብያ ነበር፤ በቤርሳቤህም ዳኞች ሆነው አገለገሉ። ³ልጆቹ ግን በመንገዱ አልተመላለሱም፤ ነገር ግን ወደ ዓመፀኛ ትርፍ ዘወር አሉ፤ ጉቦ ተቀበሉ፤ ፍርድንም አጣመሙ።

⁴ከዚያም የእስራኤል ሽማግሌዎች ሁሉ ተሰብስበው ወደ ራማ ወደ ሳሙኤል መጡ። ⁵እንዲህም አሉት፤ “አንተ ሸምግለሃል፤ ልጆችህም በመንገድህ አይመላለሱም። አሁን እንደ አሕዛብ ሁሉ የሚገዛን ንጉሥ ሹምልን።” ⁶“የሚገዛን ንጉሥ ስጠን” ባሉት ጊዜ ሳሙኤል ደስ አላለውም፤ ወደ አባታችንም ጸለየ።

⁷አባታችንም ሳሙኤልን እንዲህ አለው፤ “ሕዝቡ በሚሉህ ሁሉ ቃላቸውን ስማ፤ የናቁት አንተን አይደለም፤ ንጉሣቸው እንዳልሆን እኔን ናቁ እንጂ። ⁸ከግብፅ ካወጣኋቸው ቀን ጀምሮ እስከ ዛሬ ድረስ፣ ትተውኝ ሌሎች አማልክትን እንዳገለገሉ፣ አንተንም እንዲሁ ያደርጉብሃል። ⁹አሁንም ቃላቸውን ስማ፤ ነገር ግን አጥብቀህ አስጠንቅቃቸው፤ የሚነግሥባቸውም ንጉሥ እንዴት እንደሚገዛቸው ንገራቸው።”

ሳሙኤል ስለ ንጉሡ መንገድ አስጠነቀቀ

¹⁰ሳሙኤልም ንጉሥ የለመኑትን ሕዝብ የአባታችንን ቃል ሁሉ ነገራቸው። ¹¹እንዲህም አለ፤ “የሚነግሥባችሁ ንጉሥ የሚያደርገው ይህ ነው፤ ወንዶች ልጆቻችሁን ወስዶ ለሰረገሎቹና ለፈረሰኞቹ ያደርጋቸዋል፤ በሰረገሎቹም ፊት ይሮጣሉ። ¹²የሺህ አለቆችና የኀምሳ አለቆች አድርጎ ይሾማቸዋል፤ ከፊሉን መሬቱን እንዲያርሱና መከሩን እንዲያጭዱ፣ ከፊሉንም የጦር መሣሪያውንና የሰረገላውን ዕቃ እንዲሠሩ ያደርጋል። ¹³ሴቶች ልጆቻችሁን ቅመም ቀማሚዎች፣ ምግብ ሠሪዎችና እንጀራ ጋጋሪዎች ያደርጋቸው ዘንድ ይወስዳቸዋል። ¹⁴የተሻሉትን እርሻዎቻችሁን፣ የወይን አትክልቶቻችሁንና የወይራ አትክልቶቻችሁን ወስዶ ለአገልጋዮቹ ይሰጣል። ¹⁵ከእህላችሁና ከወይን ፍሬያችሁም ዐሥራት ወስዶ ለሹማምቱና ለአገልጋዮቹ ይሰጣል። ¹⁶ወንዶችና ሴቶች አገልጋዮቻችሁን፣ የተመረጡ ጐበዛዝቶቻችሁንና አህዮቻችሁን ለሥራው ይወስዳል። ¹⁷ከመንጎቻችሁ ዐሥራት ይወስዳል፤ እናንተም ራሳችሁ ባሪያዎቹ ትሆናላችሁ። ¹⁸ያም ቀን በመጣ ጊዜ፣ ለራሳችሁ ስለ መረጣችሁት ንጉሥ ትጮኻላችሁ፤ ነገር ግን አባታችን በዚያ ቀን አይመልስላችሁም።”

¹⁹ሕዝቡ ግን የሳሙኤልን ቃል ለመስማት እምቢ አሉ። እንዲህም አሉ፤ “አይሆንም! በእኛ ላይ ንጉሥ ይኑረን፤ ²⁰እንደ አሕዛብ ሁሉ እንሆን ዘንድ፣ ንጉሣችንም ይገዛን፤ በፊታችን ወጥቶ ይምራን፤ ሰልፋችንንም ይዋጋልን።”

²¹ሳሙኤልም የሕዝቡን ቃል ሁሉ ሰምቶ ለአባታችን ነገረው።

²²አባታችንም ሳሙኤልን፣ “ቃላቸውን ስማ፤ ንጉሥም ሹምላቸው” አለው። ሳሙኤልም የእስራኤልን ሰዎች፣ “እያንዳንዳችሁ ወደየከተማችሁ ሂዱ” አላቸው።