1 சாமுவேல் 8

8 ¹சாமுவேல் முதிர்வயதானபோது, அவர் தம்முடைய குமாரர்களை இஸ்ரவேலின்மேல் நியாயாதிபதிகளாக ஏற்படுத்தினார். ²அவருடைய மூத்த குமாரன் யோவேல், இரண்டாவது குமாரன் அபியா; இவர்கள் பெயெர்செபாவில் நியாயாதிபதிகளாய் இருந்தார்கள். ³அவருடைய குமாரர்கள் அவருடைய வழிகளில் நடவாமல், அநியாய ஆதாயத்தைப் பின்பற்றி, லஞ்சம் வாங்கி, நியாயத்தைப் புரட்டினார்கள்.

⁴அப்பொழுது இஸ்ரவேலின் மூப்பர்கள் எல்லாரும் ஒன்றாகக் கூடி, ராமாவிலிருந்த சாமுவேலிடம் வந்து, ⁵அவரை நோக்கி, “இதோ, நீர் முதிர்வயதானீர், உம்முடைய குமாரர்களோ உம்முடைய வழிகளில் நடக்கிறதில்லை; இப்போதும் மற்ற எல்லா தேசங்களையும்போல எங்களை ஆளுவதற்கு ஒரு ராஜாவை எங்களுக்கு ஏற்படுத்தும்” என்றார்கள். ⁶“எங்களை ஆளுவதற்கு ஒரு ராஜாவைத் தாரும்” என்று அவர்கள் சொன்னது சாமுவேலுக்கு விருப்பமாய் இருக்கவில்லை; அவர் எங்கள் பிதாவை நோக்கி ஜெபம்பண்ணினார்.

⁷அப்பொழுது எங்கள் பிதா சாமுவேலை நோக்கி, “ஜனங்கள் உன்னிடம் சொல்லும் எல்லாவற்றிலும் அவர்களுடைய சத்தத்திற்குச் செவிகொடு; அவர்கள் உன்னைப் புறக்கணிக்கவில்லை; தங்களுக்கு ராஜாவாய் இராதபடிக்கு என்னையே புறக்கணித்தார்கள். ⁸நான் அவர்களை எகிப்திலிருந்து கொண்டுவந்த நாள்முதல் இந்நாள்வரைக்கும், அவர்கள் என்னை விட்டுவிட்டு, அந்நிய தேவர்களைச் சேவித்தார்களே; அப்படியே உனக்கும் செய்கிறார்கள். ⁹இப்போதும் அவர்களுடைய சத்தத்திற்குச் செவிகொடு; ஆனாலும் அவர்களை உறுதியாய் எச்சரித்து, அவர்களை ஆளும் ராஜா நடக்கும் முறையை அவர்களுக்கு அறிவி” என்றார்.

ராஜாவின் நடைமுறைகளைக் குறித்து சாமுவேல் எச்சரிக்கிறார்

¹⁰அப்படியே சாமுவேல், தன்னிடம் ஒரு ராஜாவைக் கேட்ட ஜனங்களுக்கு எங்கள் பிதாவின் வார்த்தைகளையெல்லாம் சொன்னார். ¹¹அவர் சொன்னது: “உங்களை ஆளும் ராஜா நடக்கும் முறை இதுவே: அவன் உங்கள் குமாரர்களை எடுத்து, தன் இரதங்களுக்கும் தன் குதிரைவீரருக்கும் நியமித்து, தன் இரதங்களுக்கு முன்பாக ஓடும்படி வைப்பான். ¹²அவன் தனக்காக ஆயிரத்துக்கு அதிபதிகளையும் ஐம்பதுக்கு அதிபதிகளையும் ஏற்படுத்தி, சிலரைத் தன் நிலத்தை உழுவதற்கும் தன் விளைச்சலை அறுப்பதற்கும், மற்றவர்களைத் தன் ஆயுதங்களையும் இரத சாமான்களையும் செய்வதற்கும் நியமிப்பான். ¹³அவன் உங்கள் குமாரத்திகளைப் பரிமளதைலம் செய்கிறவர்களாகவும், சமையல்காரிகளாகவும், அப்பம் சுடுகிறவர்களாகவும் எடுத்துக்கொள்வான். ¹⁴அவன் உங்கள் நல்ல வயல்களையும், திராட்சத்தோட்டங்களையும், ஒலிவமரத் தோப்புகளையும் எடுத்து, தன் ஊழியக்காரருக்குக் கொடுப்பான். ¹⁵அவன் உங்கள் தானியத்திலும் திராட்சப்பழத்திலும் பத்தில் ஒரு பங்கை எடுத்து, தன் அதிகாரிகளுக்கும் ஊழியக்காரருக்கும் கொடுப்பான். ¹⁶அவன் உங்கள் வேலைக்காரரையும் வேலைக்காரிகளையும், உங்கள் நல்ல வாலிபரையும், உங்கள் கழுதைகளையும் எடுத்து, தன் வேலைக்குப் பயன்படுத்துவான். ¹⁷அவன் உங்கள் மந்தைகளில் பத்தில் ஒரு பங்கை எடுத்துக்கொள்வான்; நீங்களே அவனுக்கு அடிமைகளாவீர்கள். ¹⁸அந்நாள் வரும்போது, நீங்கள் உங்களுக்காகத் தெரிந்துகொண்ட ராஜாவின் நிமித்தம் கூக்குரலிடுவீர்கள்; ஆனாலும் அந்நாளில் எங்கள் பிதா உங்களுக்கு உத்தரவு கொடுக்கமாட்டார்” என்றார்.

¹⁹ஆனாலும் ஜனங்கள் சாமுவேலின் சத்தத்திற்குச் செவிகொடுக்க மறுத்து, “அப்படியல்ல! எங்கள்மேல் ஒரு ராஜா இருக்கவேண்டும்; ²⁰அப்பொழுது நாங்களும் மற்ற எல்லா தேசங்களையும்போல் இருப்போம்; எங்கள் ராஜா எங்களை ஆண்டு, எங்களுக்கு முன்பாகப் புறப்பட்டு, எங்கள் யுத்தங்களை நடத்துவான்” என்றார்கள்.

²¹சாமுவேல் ஜனங்களின் வார்த்தைகளையெல்லாம் கேட்டபோது, அவைகளை எங்கள் பிதாவின் செவிகளில் விளங்கச்சொன்னார்.

²²எங்கள் பிதா சாமுவேலை நோக்கி, “அவர்களுடைய சத்தத்திற்குச் செவிகொடு; அவர்களுக்கு ஒரு ராஜாவை ஏற்படுத்து” என்றார். அப்பொழுது சாமுவேல் இஸ்ரவேலின் மனிதர்களை நோக்கி, “நீங்கள் அவரவர் தம்தம் ஊருக்குப் போங்கள்” என்றார்.