Phang cheei haoeibü Choba ka sepeida
Samueleibü shousi shuongei besa shijung haukei, kheijinei jaishou shuongei matjembü shuong thüka Choba che pienla ngakei. Seneibü Bouei Samuel to, mütshuongei hao asungletkei, Samuel to aying dogo lenkei. Samuelei Chobaei ai leilabü—shousi, shousinyi, lü, hoba pendou tegübü anbou che—kho lenletkei, lausikei mütshuongei touje tükde dogo laukei.
8 1Tou Samuel jai leanjinei, haoei haoeibü shousi shuong Israel thüka matjembü shuong pienkei. 2Haoeibü shaangbü shou Joel kikei hoba haoeibü nyiboubü Abija kikei; haosiei Beershebaa matjembei. 3Haoeibü shousi shuongei haoeibü lamnyu phai asepei, lausikei dishonbü besa shijung haukei, nam lekei, hoba ngühmai khüpeikei.
4Hobaje Israelbü jaishou pendou liko yoshaikei hoba Ramaa Samuel jungto loukei. 5Haoenei hao to laukei, “Nyi jai leankei, hoba kaibü shousi shuongei kaibü lamnyu phai asepei. Tou, phang pendou tegü, kün songdakla shanga Choba che pienashi.” 6Haoenei, “Kün songdakla shanga Choba che kün la kubü,” dogo laubü kho Samuel la amaibükei, hoba haoei seneibü Bou to welaukei.
7Hobaje seneibü Bouei Samuel to lenkei, “Mütshuongei ka to laubü pendou leashi; haoenei no asungletkei; lausikei haoenei ngo haoeneibü Choba lela asungletkei. 8Ngei haoen Ijep ka leian loubü chalou ka tat sühko, haoenei ngo inletkei hoba lubü mühghaü shuong khangenkei, kho tegü haoenei no la kümda. 9Tou haoen ngüh leashi, lausikei haoen to maisho lenashi hoba haoeneibü Choba lai songdakla haoen to lenashi.”
Samuelei Choba lamnyu shanga maisho lenda
10Kheijinei Samuelei Choba che hao ka sühbü mütshuong to seneibü Boueibü ngüh pendou lenkei. 11Haoei laukei, “Kan thüka songdaklabü Chobaei ho tegü kümlabü: haoei kaneibü shousi shuong haoeibü kailong hoba koli sepai shanga lelabü, hoba haoen thedanga laanglabü. 12Haoei himshuong shanga hajar thüka hoba anjinsem thüka lajamleibou shuong pienlabü, atei haoeibü sek laütila hoba haoeibü youshou latla, hoba ateije haoeibü insiaubu hoba kailong peisilei kümla. 13Haoei kaneibü yaksa shousi onang kümbü shuong, thungbü shuong hoba shausiyung kümbü shuong shanga lelabü. 14Haoei kaneibü sek, semlühlaak hoba oliv bamang maiboutham lelabü, hoba khübü haoeibü khangenbü shuong la kulabü. 15Haoei kaneibü youshou hoba semlüh ka an phejan lelabü, hoba kho haoeibü yaangenbü shuong hoba khangenbü shuong la kulabü. 16Haoei kaneibü sambü shuong hoba sambüsao shuong, heshou shuong maiboutham, hoba gadu shuong haoeibü kümsilei shanga lelabü. 17Haoei kaneibü sanshuong ka an phejan lelabü, hoba kan lolo haoeibü aaola lelabü. 18Kho chalou loulaje, kanei jembü shanga pienbü Choba shanga kanei ngeklabü, lausikei kho chaloua seneibü Bouei kan to ajongailabü.”
19Lausikei mütshuongei Samuel to ngüha alekei. Haoenei laukei, “Aying! Künei kün thüka Choba che wanthung, 20künei phang pendou phatko yeila shanga küneibü Chobaei kün songdaklabü, kün leian longlabü hoba küneibü lason wapyolabü.”
21Ladang Samuelei mütshuongeibü ngüh pendou ditkei, haoei kho seneibü Bou thedanga paikei.
22Seneibü Bouei Samuel to laukei, “Haoeneibü ngüha leashi; haoen la Choba che kuashi.” Kheijinei Samuelei Israel mütshuong to laukei, “Mütpem weko lulueibü sangnyu to hauashi.”
