Rũrĩrĩ Rũgatiganĩria Mũthamaki Waruo

Ariũ a Samũeli maamũkagĩra mahaki, nĩ ũndũ ũcio athuuri makooria mũthamaki o ta wa ndũrĩrĩ iria ingĩ. Ithe witũ eera Samũeli atĩ arĩa mareganĩte nake nĩ we, ti Samũeli. Samũeli agataarĩria ũrĩa mũthamaki agaatunya, ariũ, airĩtu, mĩgũnda, gĩcunjĩ gĩa ikũmi kĩa indo ciothe, no andũ magacooka moige ĩĩ.

Gĩcunjĩ 8.

Na rĩrĩa Samueli aakũrire, agĩtua aariũ aake atuĩri a ciira a Isiraeli. Mũũriũ wake irigithaathi aarĩ Joeli, naguo wa keerĩ aarĩ Abija; nao maarĩ atuĩri a ciira kũu Birishiba. No aariũ aake matiarũmĩrĩire mĩthiĩre yake, no nĩmaathingatire uumithio wa maheeni, makĩoya mahaki, na makĩogomia kĩhooto.

Nao athuuri oothe a Isiraeli magĩcookanĩrĩra hamwe, magĩũka kũrĩ Samueli kũu Rama. Makĩmwĩra atĩrĩ, “Wee nĩũkũrĩte, na aariũ aaku matirũmagĩrĩra mĩthiĩre yaku. Rĩu tũtuĩre mũthamaki wa gũtwatha, o ta ndũũrĩrĩ icio ciothe.” Samueli ndaakenire rĩrĩa moigire atĩrĩ, “Tũhe mũthamaki wa gũtwatha,” nake akĩhooya Ithe witũ.

Nake Ithe witũ akĩĩra Samueli atĩrĩ, “Thikĩrĩria mũgambo wa andũ acio maũndũinĩ mothe marĩa magũkwĩra; ti wee maaregete, no nĩ niĩ maaregete nduĩke mũthamaki wao. O ta ũrĩa meekĩte, kuuma rĩrĩa ndaamarutire bũrũri wa Misiri nginya ũmũthĩ, makĩndiganĩria, magĩtungatĩra ngai ingĩ—ũguo noguo mareka wee. Rĩu-rĩ, mathikĩrĩrie; no ũmataare na hinya, na ũmeere mĩthiĩre ya mũthamaki ũrĩa ũkaamaatha.”

Samueli Akaania Ũhoro wa Mĩthiĩre ya Mũthamaki

Nĩ ũndũ ũcio Samueli akĩĩra andũ acio maamwĩtagia mũthamaki ndeto ciothe cia Ithe witũ. Akĩmeera atĩrĩ, “Ũũ nĩguo mũthamaki ũrĩa ũkaamwatha akeeka: nĩakoya aariũ anyu amatue a ngaari ciake cia ita na ahaici a mbarathi ciake, matengeragĩre mbere ya ngaari ciake cia ita. Nĩakeeamũrĩra atongoria a ikundi cia ngiri na cia mĩrongo ĩtaano, amwe marĩmage mũgũnda wake na magethage magetha make, na arĩa angĩ mathondekage indo ciake cia mbaara na indo cia ngaari ciake cia ita. Nĩakoya airĩĩtu anyu matuĩke athondeki a maguta manungi wega, na aruga irio, na aruga mĩgate. Nĩakoya mĩgũnda yanyu ĩrĩa mĩega mũno, na mĩgũnda ya mĩthabibũ, na ya mĩtamaiyũ, acihe ndungata ciake. Nĩakoya gĩcunjĩ kĩa ikũmi kĩa ngano yanyu na kĩa mĩthabibũ yanyu, akĩhe anene aake na ndungata ciake. Nĩakoya ndungata cianyu cia arũme na cia atumia, na aanake anyu arĩa ega mũno, na ndigiri cianyu, atũmĩre wĩra wake. Nĩakoya gĩcunjĩ kĩa ikũmi kĩa ndũũru cianyu, na inyuĩ ene nĩmũgaatuĩka ngombo ciake. Na mũthenya ũcio wakinya, nĩmũgaakaya nĩ ũndũ wa mũthamaki ũcio mwĩthuurĩire, no Ithe witũ ndakaamũcookeria mũthenya ũcio.”

No andũ acio makĩrega kũigua Samueli. Makiuga atĩrĩ, “Aca! Ithuĩ twĩendeire mũthamaki wa gũtwatha, nĩguo tũhaanane na ndũũrĩrĩ icio ciothe, mũthamaki witũ atwathage, atũtongoragie, na atũrũĩrĩre mbaara ciitũ.”

Rĩrĩa Samueli aiguire ndeto ciothe cia andũ acio, agĩciuga rĩngĩ mbere ya Ithe witũ.

Nake Ithe witũ akĩĩra Samueli atĩrĩ, “Mathikĩrĩrie; ũmahe mũthamaki.” Nake Samueli akĩĩra andũ a Isiraeli atĩrĩ, “Thiĩi, o mũndũ itũũra rĩake.”