1 Samuẹli 8

8 ¹Nígbà tí Samuẹli dàgbà, ó fi àwọn ọmọ rẹ̀ jẹ onídàájọ́ lórí Israẹli. ²Àkọ́bí rẹ̀ ni Joẹli, èkejì rẹ̀ sì ni Abijah; wọ́n ń ṣe onídàájọ́ ní Beerṣeba. ³Àwọn ọmọ rẹ̀ kò rìn ní ọ̀nà rẹ̀, ṣùgbọ́n wọ́n lépa èrè àìṣòótọ́, wọ́n gba àbẹ̀tẹ́lẹ̀, wọ́n sì yí ìdájọ́ òdodo padà.

⁴Nígbà náà ni gbogbo àwọn àgbàgbà Israẹli kójọpọ̀, wọ́n sì tọ Samuẹli wá ní Ramah. ⁵Wọ́n sọ fún un pé, “Ẹ ti dàgbà, àwọn ọmọ yín kò sì rìn ní ọ̀nà yín. Nísinsìnyí, ẹ fi ọba kan jẹ láti máa ṣàkóso wa, gẹ́gẹ́ bí gbogbo àwọn orílẹ̀-èdè.” ⁶Inú Samuẹli kò dùn nígbà tí wọ́n wí pé, “Fún wa ní ọba kan láti máa ṣàkóso wa,” ó sì gbàdúrà sí Baba wa.

⁷Nígbà náà ni Baba wa sọ fún Samuẹli pé, “Fetí sí àwọn ènìyàn náà nínú gbogbo ohun tí wọ́n sọ fún ọ; wọn kò kọ̀ ọ́ sílẹ̀; èmi ni wọ́n kọ̀ sílẹ̀ gẹ́gẹ́ bí ọba wọn. ⁸Gẹ́gẹ́ bí wọ́n ti ṣe láti ìgbà tí mo ti mú wọn jáde kúrò ní Ejibiti títí di òní—tí wọ́n ti kọ̀ mí sílẹ̀, tí wọ́n sì ń sin àwọn ọlọ́run mìíràn—bẹ́ẹ̀ ni wọ́n ń ṣe sí ọ. ⁹Nísinsìnyí, fetí sí wọn, ṣùgbọ́n kìlọ̀ fún wọn gidigidi, kí o sì sọ fún wọn bí ọba wọn yóò ṣe máa ṣàkóso.”

Samuẹli Kìlọ̀ Nípa Ìwà Ọba

¹⁰Báyìí ni Samuẹli sọ gbogbo ọ̀rọ̀ Baba wa fún àwọn ènìyàn tí ń béèrè ọba lọ́wọ́ rẹ̀. ¹¹Ó wí pé, “Èyí ni ohun tí ọba tí yóò jọba lé yín lórí yóò ṣe: yóò mú àwọn ọmọkùnrin yín fún kẹ̀kẹ́ ogun rẹ̀ àti fún ẹ̀ṣọ́ ẹṣin rẹ̀, láti máa sáré níwájú wọn. ¹²Yóò yan àwọn olórí ẹgbẹ̀rún àti olórí àádọ́ta fún ara rẹ̀, àwọn mìíràn láti máa tu ilẹ̀ rẹ̀ tí wọ́n sì ń kórè oko rẹ̀, àwọn mìíràn láti máa ṣe ohun ìjà rẹ̀ àti ẹ̀rọ kẹ̀kẹ́ ogun rẹ̀. ¹³Yóò mú àwọn ọmọbìnrin yín láti máa ṣe tùràrí, àti láti máa ṣe oúnjẹ, àti láti máa dín búrẹ́dì. ¹⁴Yóò mú àwọn oko yín tí ó dára jù, ọgbà àjàrà yín, àti ọgbà olifi yín, yóò sì fi wọ́n fún àwọn ìránṣẹ́ rẹ̀. ¹⁵Yóò mú ìdámẹ́wàá ọkà yín àti ti ọgbà àjàrà yín, yóò sì fi wọ́n fún àwọn ìjòyè àti àwọn ìránṣẹ́ rẹ̀. ¹⁶Yóò mú àwọn ìránṣẹ́kùnrin àti ìránṣẹ́bìnrin yín, àwọn ọ̀dọ́mọkùnrin yín tí ó dára jù, àti àwọn kẹ́tẹ́kẹ́tẹ́ yín fún iṣẹ́ rẹ̀. ¹⁷Yóò mú ìdámẹ́wàá agbo ẹran yín, ẹ̀yin fúnra yín yóò sì di ẹrú rẹ̀. ¹⁸Nígbà tí ọjọ́ náà bá dé, ẹ̀yin yóò kígbe nítorí ọba tí ẹ yàn fún ara yín, ṣùgbọ́n Baba wa kì yóò dá yín lóhùn ní ọjọ́ náà.”

¹⁹Ṣùgbọ́n àwọn ènìyàn náà kọ̀ láti fetí sí Samuẹli. Wọ́n wí pé, “Rárá! Àwa fẹ́ ọba kan lé wa lórí, ²⁰kí àwa lè dàbí gbogbo àwọn orílẹ̀-èdè, kí ọba wa máa ṣàkóso wa, kí ó máa síwájú wa, kí ó sì máa jà ní ogun wa.”

²¹Nígbà tí Samuẹli gbọ́ gbogbo ọ̀rọ̀ àwọn ènìyàn náà, ó tún wọn sọ níwájú Baba wa.

²²Baba wa sọ fún Samuẹli pé, “Fetí sí wọn; fún wọn ní ọba kan.” Nígbà náà ni Samuẹli sọ fún àwọn ọkùnrin Israẹli pé, “Ẹ lọ, olúkúlùkù sí ìlú ara rẹ̀.”