ሓደ ህዝቢ ካብ ንጉሱ ይግለስ

ደቂ ሳሙኤል ጉቦ ተቐበሉ፤ ስለዙይ ዓበይቲ ከምቲ ዅሎም ኣህዛብ ዝገዝኦም ንጉስ ለመኑ። ኣቦና ድማ ንሳሙኤል ነቲ ዝተነዓቐ ንሱ እምበር ሳሙኤል ከም ዘይኮነ ነገሮ። ሳሙኤል ከዓ ንጉስ እንታይ ከም ዝወስድ፥ ደቆም፥ ኣዋልዶም፥ ገራሁ፥ ዓስራት ኵሉ፥ ኣፀቢቑ ነገሮም፤ እቲ ህዝቢ ግና ገና እወ በሉ።

ምዕራፍ 8።

ሳሙኤል ምስ ኣረገ፥ ንደቁ ኣብ ልዕሊ እስራኤል ፈራዶ ገይሩ ሾሞም። በዅሪ ወዱ ኢዩኤል፥ ካልኣዩ ኸዓ ኣብያ ነበረ፤ ኣብ ቤርሳቤህ ድማ ፈራዶ ኾይኖም የገልግሉ ነበሩ። ደቁ ግና ብመንገዱ ኣይከዱን፤ ደድሕሪ ረብሓ ዓመፃ ሰዓቡ፥ መማለጃ ተቐበሉ፥ ንፍርዲ ኸዓ ኣጣመምዎ።

ሽዑ ዓበይቲ እስራኤል ኵሎም ተኣኪቦም፥ ኣብ ራማ ናብ ሳሙኤል መፁ። ንሳቶም ድማ ከምዙይ በልዎ፦ “ንስኻ ኣሪግካ ኢኻ፤ ደቅኻ ድማ ብመንገድኻ ኣይከዱን እዮም። ሕዚ ኸዓ ከምቲ ዅሎም ኣህዛብ፥ ዝገዝአና ንጉስ ሹመልና።” “ዝገዝአና ንጉስ ሃበና” ምስ በሉ ኸዓ፥ እዝ ነገርዙይ ኣብ ኣዒንቲ ሳሙኤል ክፉእ ኮነ፤ ሳሙኤል ድማ ናብ ኣቦና ፀለየ።

ኣቦና ድማ ንሳሙኤል ከምዙይ በሎ፦ “ነቲ ህዝቢ በቲ ዝብሉኻ ዅሉ ስምዖም፤ ንዓኻ ኣይኮኑን ዝነዓቑ፥ ኣነ ኣብ ልዕሊኦም ከይነግስ ደኣ ንዒቖምኒ እዮም። ካብታ ኻብ ግብፂ ዘውፃእኽዎም መዓልቲ ጀሚሮም ክሳዕ ሎሚ፥ ንኻልኦት ኣማልኽቲ እናኣገልገሉ ንዓይ ከም ዝሓደጉ፥ ንዓኻ እውን ከምኡ ይገብሩ ኣለዉ። ሕዚ ኸዓ ስምዖም፤ ኣበርቲዕካ ግና ኣጠንቅቆም፤ እቲ ኣብ ልዕሊኦም ዝነግስ ንጉስ ብኸመይ ከም ዝገዝኦም ድማ ንገሮም።”

ሳሙኤል ብዛዕባ መገዲ እቲ ንጉስ የጠንቅቕ

ሳሙኤል ድማ ነቶም ንጉስ ዝለመንዎ ህዝቢ፥ ኵሉ ቓል ኣቦና ነገሮም። ከምዙይ ኢሉ ኸዓ በሎም፦ “እቲ ኣብ ልዕሌኹም ዝነግስ ንጉስ ዝገብሮ እዙይ እዩ፦ ንደቅኹም ወሲዱ ኣብ ሰረገላታቱን ኣብ ፈረሰኛታቱን ይሽይሞም፤ ቀቅድሚ ሰረገላታቱ ኽጐዩ ድማ ይገብሮም። ንርእሱ ኸዓ ኣሕሉቕ ሽሕን ኣሕሉቕ ሓምሳን ገይሩ ይሽይሞም፤ ገሊኦም ግራቱ ኽሓርሱን እኽሊ ኽዓፅዱን፥ ገሊኦም ድማ ኣፅዋር ውግኡን ኣቕሑ ሰረገላኡን ክሰርሑ ይገብሮም። ኣዋልድኩም ድማ ሽቶ ዝሰርሓ፥ መግቢ ዝሰርሓ፥ ባኒ ዝስንክታ ክኾና ይወስደን። ዘዝበለፀ ግራትኩም፥ ኣታኽልቲ ወይንኹምን ኣታኽልቲ ኣውሊዕኩምን ወሲዱ፥ ንባሮቱ ይህቦም። ካብ እኽልኹምን ካብ ኣታኽልቲ ወይንኹምን ዓስራት ወሲዱ፥ ንሹመኛታቱን ንባሮቱን ይህቦ። ባሮትኩም፥ ኣግራድኩም፥ ዝበለፀ መንእሰያትኩምን ኣእዱግኩምን ድማ ወሲዱ፥ ንስራሕ የውዕሎም። ካብ ኣባጊዕኹም ዓስራት ይወስድ፤ ንስኻትኩም ባዕልኹም ድማ ባሮቱ ክትኮኑ ኢኹም። በታ መዓልቲ እቲኣ ኸዓ፥ ብሰሪ እቲ ንባዕልኹም ዝሓረኹምዎ ንጉስ ክተእውዩ ኢኹም፤ ኣቦና ግና በታ መዓልቲ እቲኣ ኣይክምልሰልኩምን እዩ።”

እቲ ህዝቢ ግና ቃል ሳሙኤል ክሰምዕ ኣበየ። ከምዙይ ኢሎም ከዓ በሉ፦ “ኣይፋል! ኣብ ልዕሌና ዝነግስ ንጉስ ንደሊ ኣለና፥ ሽዑ ኸም ኵሎም ኣህዛብ ክንኸውን ኢና፤ ንጉስና ኸዓ ይገዝአና፥ ኣብ ቅድሜና ወፂኡ ይምርሓና፥ ውግእና ድማ ይዋጋእ።”

ሳሙኤል ኵሉ ቓል እቲ ህዝቢ ምስ ሰምዐ፥ ኣብ እዝኒ ኣቦና ደገሞ።

ኣቦና ድማ ንሳሙኤል “ስምዖም፤ ንጉስ ድማ ሃቦም” በሎ። ሽዑ ሳሙኤል ንሰብ እስራኤል “ኪዱ፥ ነፍሲ ወከፍ ናብ ዓዱ” በሎም።