Yur Akhana Awui Awungali Horhai
Samuel-wui naona phalamkaphok khui, hai maramna ramnaowui ngalānghaina, ramkharing kachida kharā ngasana kathā kharāt ngaroma da phasha. Ithumwui Avāna Samuel-li, athumna maphāngkhuiwui kaji-va Samuel mani, āi ni da khangkatui. Samuel-na kathāna ngasa kahaira-va, naonao, naonganu, lui, kachida kharā-li chiwon kharāt, da hangsang shai, ayo miphungna mangshang sai.
8 1Samuel kasar ngasākahai tharan, ana awui naomayarabingli Israelwuitungli bichar kasābing sāngasaka. 2Awui naochizai Joelna, kala awui kakhane Abijahna; athumna Beer-shebali bichar sāmi. 3Awui naomayarabingna awui shongfa mashurmana, kha makhamashunga tongkazāli kharomvāda, pheizā khuiya, kala mashun khayeithuiya.
4Chitharān Israelwui khararnao saikora rākazipserlaga Ramahli Samuelwuili vai. 5Athumna ali hānga, "Na kasar ngasāhaira, kala nawui naomayarabingna nawui shongfa mashurmana. Ara miyur saikora thāda ithumli mungkhavai awunga akha kapangkhuilu." 6Kha, "Ithumli mungkhavai awunga akha khamilu," da athumna hāng tharan, chi Samuelna mayāngaimana; kala ana ithumwui Avāli seihā sai.
7Chitharān ithumwui Avāna Samuelli hānga, "Mibingna nali kahāng saikora nganālu; athumna nali makhalanmana, kha athumwui awunga thāda ili khalanhaira. 8Ina athumli Egyptwui eina thānshokkahai eina aja eina tangda, athumna ili horhaida khangatei varebingli otram ngatha̱ya; tākam eina athumna nalila sāra. 9Ara athumli nganālu, kha khangaronda athumli hāngmachinlu, kala athumwui awungana kathada athumli mungrakhala kaji athumli hānglu."
Samuelna Awungawui Shongfawui Pongli Hāngmachin
10Chithāda sāda Samuelna ali awunga khami khavai kapophoka mibing chili ithumwui Avāwui tui saikora hāngchithei. 11Ana hānga, "Nathumwuitungli khamunga awungana hithāda ot sāra: awui mangāli samzatkhavai, ana nathumwui naomayarabingli awui siguigari eina sigui katongabing sākhavai khuira. 12Ana akhalattawui vang thing-thingwui kala hangphangā-ngāwui kathānabing kapangkhuira, kaikhava awui lui vākhavai kala awui theishirai hātkakhui khavai, kala kaikhava awui raiwui khutlai kala siguigariwui akapbing sākhavai kapangkhuira. 13Ana nathumwui naongalāva̱ ngarāli nganamkaphā otyur kasābing, zā kasābing, kala khamui kasābing sākhavai khuira. 14Ana nathumwui mathāmeikap kaji lui, drakhā yāmgui, kala olive yāmgui khuilaga awui raobingli mira. 15Ana nathumwui kashakazā kala drakhā yāmguiwui tithe khuilaga awui otva̱bing kala awui raobingli mira. 16Ana nathumwui pāng eina rao mayarnaobing kala rao sha̱naobing, mathāmeikap yaronnaobing, kala gadhābingli awui otwui vang khuira. 17Ana nathumwui yaobingwui tithe khuira, kala nathum khalatta awui raonao ngasāra. 18Chithang tharan, nathum khalattawui vang kapangkhui kahai awunga chiwui vang eina nathumna vaora, kha chithang ithumwui Avāna nathumli mangahānkāmara."
19Kha mibingna Samuelwui kahāng manganāsangmana. Athumna hānga, "Ngga! Ithumwuitungli awunga akha leira, 20chithāda yur saikorawui thāda ithumla ngasāra; kala ithumwui awungana ithumli mungda, ithumwui mangāli shokthanglaga, ithumwui rai ngararmira."
21Samuelna mibingwui tui saikora shālaga, chi ithumwui Avāwui mangāli hāngsera.
22Ithumwui Avāna Samuelli hānga, "Athumwui kahāng nganālu; athumwuitungli awunga akha phāsanglu." Chieina Samuelna Israelwui mibingli hānga, "Nathum kachichāramli ungulu."
