ኣቦ ንዝተነስሐ እስራኤል የድሕን

ድሕሪ ዕስራ ዓመት ሳሙኤል ንእስራኤል ነቶም ባዕዳን ኣማልኽቲ ብምሉእ ልቦም ኣልዮም ናብ ኣቦና ክምለሱ ነገሮም። ኣብ ምፅጳ ተኣኪቦም ፆሙ፥ ተናዘዙ ከዓ፤ ፍልስጥኤማውያን ምስ ወረርዎም ድማ ኣቦና ኣብ ልዕሊኦም ኣንጐድጐደ። ሳሙኤል ከዓ ኤብንዔዘር ዝበሃል እምኒ ኣቝሙ፦ ክሳዕ ሕዚ ኣቦና ረዲኡና።

ምዕራፍ 7።

ሰብ ቅርያት የዓሪም መፂኦም ንታቦት ኣቦና ወሲዶም፥ ናብታ ኣብ ኰረብታ ዘላ ቤት ኣሚናዳብ ኣምፅእዎ፤ ንወዱ ኣልኣዛር ድማ ነቲ ታቦት ኣቦና ክሕሉ ቀደስዎ። እታ ታቦት ኣብ ቅርያት የዓሪም ካብ ዝዓረፈትላ መዓልቲ ጀሚሩ፥ ነዊሕ ዘመን ሓለፈ፤ ዕስራ ዓመትውን ኮነ፤ ኵሉ ቤት እስራኤል ከዓ ሓዘነ፤ ንኣቦናውን ይደልዮ ነበረ። ሳሙኤል ድማ ንኵሉ ቤት እስራኤል ከምዙይ ኢሉ ተዛረቦም፦ “ብምሉእ ልብኹም ናብ ኣቦና እንተ ተመሊስኩም፥ ነቶም ባዕዳን ኣማልኽትን ነተን ኣስታሮትን ካብ ማእኸልኩም ኣርሕቑ፤ ልብኹም ናብ ኣቦና ኣቕንዑ፥ ንእኡ ጥራሕ ኣምልኹ፤ ንሱ ከዓ ካብ ፍልስጥኤማውያን ከድሕነኩም እዩ።” ደቂ እስራኤል ድማ ነቶም በዓሊምን ነተን ኣስታሮትን ኣወገዱ፤ ንኣቦና ጥራሕ ከዓ ኣምለኹ። ሳሙኤል ድማ “ንኵሉ እስራኤል ኣብ ምፅጳ ኣክብዎም፤ ኣነ ኸዓ ምእንታኹም ናብ ኣቦና ክፅሊ እየ” በለ። ኣብ ምፅጳ ተኣኪቦም ድማ ማይ ቀድሑ፤ ኣብ ቅድሚ ኣቦና ኸዓ ኣፍሰስዎ፤ በታ መዓልቲ እቲኣ ፆሙ፤ “ንኣቦና በዲልና ኢና” ኢሎምውን ተናዘዙ። ሳሙኤል ከዓ ኣብ ምፅጳ ንእስራኤል ፈረዶም። ^a

ፍልስጥኤማውያን ደቂ እስራኤል ኣብ ምፅጳ ኸም ዝተኣከቡ ምስ ሰምዑ፥ ኣሕሉቕ ፍልስጥኤማውያን ናብ እስራኤል ደዪቦም ወረርዎም። ደቂ እስራኤል ድማ ምስ ሰምዑ ንፍልስጥኤማውያን ፈርሕዎም። ደቂ እስራኤል ድማ ንሳሙኤል “ካብ ኢድ ፍልስጥኤማውያን ምእንቲ ኸድሕነና፥ ምእንታና ናብ ኣቦና ምጥራዕ ኣይተቛርፅ” በልዎ። ሳሙኤል ድማ ሓደ ዝጠቡ ገንሸል ወሲዱ፥ ንኣቦና ምሉእ ዝቃፀል መስዋእቲ ገይሩ ኣቕረቦ። ሳሙኤል ምእንቲ እስራኤል ናብ ኣቦና ጠርዐ፤ ኣቦናውን መለሰሉ። ሳሙኤል ነቲ ዝቃፀል መስዋእቲ እናቕረበ እንተሎ፥ ፍልስጥኤማውያን ንእስራኤል ክዋግእዎም ቀረቡ። በታ መዓልቲ እቲኣ ግና ኣቦና ኣብ ልዕሊ ፍልስጥኤማውያን ብዓብዪ ድምፂ ኣንጐድጐደ፤ ኣደንገፆም ከዓ፤ ኣብ ቅድሚ እስራኤልውን ተስዓሩ። ሰብ እስራኤል ድማ ካብ ምፅጳ ወፂኦም ንፍልስጥኤማውያን ሰዓብዎም፤ ክሳዕ ታሕቲ ቤትካር ከዓ ወቕዕዎም።

ሳሙኤል ድማ ሓደ እምኒ ወሲዱ፥ ኣብ መንጎ ምፅጳን ሴንን ኣቝሙ፤ “ክሳዕ ሕዚ ኣቦና ረዲኡና” ኢሉ ኸዓ ኤብንዔዘር ኢሉ ሰመዮ። ^b ከምዙይ ፍልስጥኤማውያን ተዋረዱ፤ ናብ ዶብ እስራኤልውን ከምብሓድሽ ኣይወረሩን፤ ኢድ ኣቦና ድማ ብዅሉ ዘመን ሳሙኤል ፀረ ፍልስጥኤማውያን ኮነት። እተን ፍልስጥኤማውያን ዝወሰድወን ከተማታት፥ ካብ ኣቃሮን ክሳዕ ጌት፥ ንእስራኤል ተመልሳ፤ እስራኤል ድማ ዶቡ ካብ ኢድ ፍልስጥኤማውያን መለሰ። ኣብ መንጎ እስራኤልን ኣሞራውያንን ከዓ ሰላም ኮነ።

ሳሙኤል ብዅሉ ዘመን ህይወቱ ንእስራኤል ፈረዶም። ዓመት ዓመት ድማ እናዞረ ናብ ቤቴልን ጌልገላን ምፅጳን ይኸይድ፤ ኣብዝ ኵሉ ቦታታት እዙይ ከዓ ንእስራኤል ይፈርዶም ነበረ። ናብ ቤቱ ናብ ራማ ተመሊሱ ድማ ኣብኡ ንእስራኤል ይፈርዶም ነበረ። ኣብኡ ኸዓ ንኣቦና መሰውኢ ሰርሐ።