1 ሳሙኤል 7

7 ¹የቂርያትይዓሪም ሰዎች መጥተው የአባታችንን ታቦት ወሰዱ፤ ኰረብታው ላይ ወዳለው ወደ አሚናዳብ ቤት አመጡት፤ ልጁን አልዓዛርንም የአባታችንን ታቦት እንዲጠብቅ ቀደሱት። ²ታቦቱ በቂርያትይዓሪም ካረፈበት ቀን ጀምሮ ረጅም ጊዜ ዐለፈ፤ ይኸውም ሀያ ዓመት ነበር፤ የእስራኤልም ቤት ሁሉ አለቀሰ፤ አባታችንንም ፈለገ። ³ከዚያም ሳሙኤል ለእስራኤል ቤት ሁሉ እንዲህ አለ፤ “በፍጹም ልባችሁ ወደ አባታችን የምትመለሱ ከሆነ፣ ባዕዳን አማልክትንና አስታሮትን ከመካከላችሁ አስወግዱ፤ ልባችሁን ወደ አባታችን አድርጉ፤ እርሱንም ብቻ አምልኩ፤ እርሱም ከፍልስጥኤማውያን እጅ ያድናችኋል።” ⁴የእስራኤልም ሕዝብ በኣሊምንና አስታሮትን አስወገዱ፤ አባታችንንም ብቻ አመለኩ። ⁵ከዚያም ሳሙኤል እንዲህ አለ፤ “እስራኤልን ሁሉ በሚጽጳ ሰብስቡ፤ እኔም ስለ እናንተ ወደ አባታችን እጸልያለሁ።” ⁶በሚጽጳም ተሰበሰቡ፤ ውሃም ቀድተው በአባታችን ፊት አፈሰሱ፤ በዚያ ቀንም ጦሙን ዋሉ፤ “አባታችንን በድለናል” ብለውም ተናዘዙ። ሳሙኤልም በሚጽጳ እስራኤልን ዳኘ። ^a a v6 በእግዚአብሔር ፊት ውሃ ማፍሰስ የጸሎት፣ የሐዘንና ራስን የማዋረድ ሥርዐታዊ ተግባር ነበር።

⁷ፍልስጥኤማውያንም እስራኤላውያን በሚጽጳ እንደ ተሰበሰቡ ሰሙ፤ የፍልስጥኤም አለቆችም እስራኤልን ለመውጋት ወጡ። እስራኤላውያንም ይህን ሰምተው ፍልስጥኤማውያንን ፈሩ። ⁸እስራኤላውያንም ሳሙኤልን፣ “ከፍልስጥኤማውያን እጅ እንዲያድነን፣ ስለ እኛ ወደ አባታችን መጮኽን አታቋርጥ” አሉት። ⁹ሳሙኤልም የሚጠባ ጠቦት ወስዶ ለአባታችን የሚቃጠል መሥዋዕት አድርጎ አቀረበ። ሳሙኤልም ስለ እስራኤል ወደ አባታችን ጮኸ፤ አባታችንም መለሰለት። ¹⁰ሳሙኤል የሚቃጠለውን መሥዋዕት ባቀረበ ጊዜ፣ ፍልስጥኤማውያን እስራኤልን ለመውጋት ቀረቡ። በዚያ ቀን ግን አባታችን በፍልስጥኤማውያን ላይ በታላቅ ድምፅ ነጐደባቸው፤ ድንጋጤ ውስጥም ጣላቸው፤ በእስራኤልም ፊት ተሸነፉ። ¹¹የእስራኤልም ሰዎች ከሚጽጳ ወጥተው ፍልስጥኤማውያንን አሳደዱ፤ እስከ ቤትካር በታችም ድረስ መቷቸው።

¹²ከዚያም ሳሙኤል ድንጋይ ወስዶ በሚጽጳና በሴን መካከል አቆመው፤ “አባታችን እስከ አሁን ድረስ ረድቶናል” ብሎም አቤንዔዘር ብሎ ሰየመው። ^b b v12 አቤንዔዘር ማለት “የረድኤት ድንጋይ” ማለት ነው፤ ሳሙኤል አባታችን እስከ የት ድረስ እንደ ተሸከማቸው ለማስታወስ አቆመው። ¹³እንዲህም ፍልስጥኤማውያን ተንበረከኩ፤ ዳግመኛም የእስራኤልን ድንበር አልወረሩም፤ ሳሙኤል በሕይወት በኖረበት ዘመን ሁሉ የአባታችን እጅ ፍልስጥኤማውያንን ተቃወመ። ¹⁴ፍልስጥኤማውያን ወስደዋቸው የነበሩ ከተሞች ከአቃሮን እስከ ጌት ድረስ ወደ እስራኤል ተመለሱ፤ እስራኤልም ድንበሩን ከፍልስጥኤማውያን እጅ መለሰ። እስራኤል ከአሞራውያንም ጋራ ሰላም ነበረው።

¹⁵ሳሙኤል በሕይወቱ ዘመን ሁሉ እስራኤልን ዳኘ። ¹⁶በየዓመቱም እየዞረ ቤቴልን፣ ጌልገላንና ሚጽጳን ይጐበኝ ነበር፤ በእነዚህም ስፍራዎች ሁሉ እስራኤልን ይዳኝ ነበር። ¹⁷መኖሪያው ወደ ሆነችውም ወደ ራማ ተመልሶ በዚያ እስራኤልን ዳኘ። በዚያም ለአባታችን መሠዊያ ሠራ።