1 ሳሙኤል 6

6 ¹የአባታችን ታቦት በፍልስጥኤማውያን ምድር ሰባት ወር ቈየ። ²ፍልስጥኤማውያንም ካህናትንና ሟርተኞችን ጠርተው፣ “ከእግዚአብሔር ታቦት ጋራ ምን እናድርግ? ወደ ስፍራው እንዴት እንደምንመልሰው ንገሩን” አሉ።

³እነርሱም እንዲህ አሉ፤ “የእስራኤልን አምላክ ታቦት የምትመልሱ ከሆነ፣ ባዶውን አትመልሱት፤ ነገር ግን የበደል መሥዋዕት በእርግጥ መልሱለት። በዚያን ጊዜ ትፈወሳላችሁ፤ እጁ ከእናንተ ለምን እንዳልራቀም ታውቃላችሁ።”

⁴እነርሱም፣ “የምንመልስለትስ የበደል መሥዋዕት ምንድን ነው?” ብለው ጠየቁ። እነርሱም መልሰው፣ “እንደ ፍልስጥኤማውያን ገዦች ቍጥር አምስት የወርቅ ዕባጮችና አምስት የወርቅ አይጦች፤ ምክንያቱም አንድ ዐይነት መቅሠፍት በሁላችሁና በገዦቻችሁ ላይ ወርዷል” አሉ።

⁵“የዕባጮቻችሁንና ምድሪቱን የሚያጠፉትን አይጦች ምስል ሥሩ፤ ለእስራኤልም አምላክ ክብርን ስጡ። ምናልባት እጁን ከእናንተ፣ ከአማልክቶቻችሁና ከምድራችሁ ላይ ያነሣ ይሆናል። ⁶ግብፃውያንና ፈርዖን ልባቸውን እንዳደነደኑ እናንተ ለምን ልባችሁን ታደነድናላችሁ? እርሱ በጭከና ከያዛቸው በኋላ፣ በመጨረሻ ሕዝቡን በመንገዳቸው እንዲሄዱ አልለቀቋቸውምን?”

⁷“እንግዲህ አዲስ ጋሪ፣ ቀንበርም ያልተጫኑ የሚያጠቡ ሁለት ላሞች ውሰዱ። ላሞቹን በጋሪው ላይ እሰሩ፤ ጥጆቻቸውን ግን ከእነርሱ ለይታችሁ በበረት አግቡ። ⁸የእግዚአብሔርን ታቦት ወስዳችሁ በጋሪው ላይ አኑሩት፤ ለበደል መሥዋዕት የምትመልሱለትን የወርቅ ዕቃዎች በአጠገቡ ባለ ሣጥን ውስጥ አኑሩ። ከዚያም ሰዳችሁት ይሂድ። ⁹ተመልከቱ፤ በገዛ ግዛቱ መንገድ ወደ ቤትሳሚስ ቢወጣ፣ ይህን ታላቅ መዓት ያመጣብን እርሱ ነው። ያለዚያ ግን እጁ እንዳልመታን፣ ነገሩ በአጋጣሚ እንደ ሆነ እናውቃለን።”

¹⁰ሰዎቹም እንዲሁ አደረጉ፤ የሚያጠቡ ሁለት ላሞች ወስደው በጋሪው ላይ አሰሩ፤ ጥጆቻቸውን ግን በቤት ውስጥ አገቡ። ¹¹የአባታችንን ታቦት፣ የወርቅ አይጦችንና የዕባጮቻቸውን ምስል የያዘውን ሣጥን በጋሪው ላይ አኖሩ። ¹²ላሞቹም በአንድ መንገድ ጸንተው እያገሱ ወደ ቤትሳሚስ ቀጥ ብለው ሄዱ፤ ወደ ቀኝም ሆነ ወደ ግራ አልዘነበሉም። የፍልስጥኤም ገዦችም እስከ ቤትሳሚስ ድንበር ድረስ ተከተሏቸው። ¹³የቤትሳሚስ ሰዎች በሸለቆው ውስጥ ስንዴ ሲያጭዱ፣ ቀና ብለው ታቦቱን አዩ፤ ባዩትም ጊዜ ደስ አላቸው። ¹⁴ጋሪውም በቤትሳሚስ ወዳለው ወደ ኢያሱ እርሻ ደርሶ፣ በአንድ ትልቅ ድንጋይ አጠገብ ቆመ። የጋሪውንም እንጨት ፈልጠው ላሞቹን ለአባታችን የሚቃጠል መሥዋዕት አድርገው አቀረቡ። ¹⁵ሌዋውያኑም የአባታችንን ታቦትና የወርቅ ዕቃዎችን የያዘውን በአጠገቡ ያለውን ሣጥን አውርደው በትልቁ ድንጋይ ላይ አኖሩ። በዚያም ቀን የቤትሳሚስ ሰዎች ለአባታችን የሚቃጠሉ መሥዋዕቶችንና ሌሎች መሥዋዕቶችን አቀረቡ። ¹⁶የፍልስጥኤም አምስቱ ገዦችም ይህን ሁሉ ዐይተው በዚያኑ ቀን ወደ አቃሮን ተመለሱ። ¹⁷ፍልስጥኤማውያን ለአባታችን የበደል መሥዋዕት አድርገው የመለሱት የወርቅ ዕባጮች እነዚህ ናቸው፤ ለአዛጦት፣ ለጋዛ፣ ለአስቀሎና፣ ለጌትና ለአቃሮን እያንዳንዳቸው አንድ አንድ። ¹⁸የወርቅ አይጦችም እንደ አምስቱ ገዦች የፍልስጥኤም ከተሞች ሁሉ ቍጥር ነበሩ፤ የተመሸጉ ከተሞችም ሆኑ ቅጥር የሌላቸው መንደሮች። የአባታችንን ታቦት ያኖሩባት ያች ትልቅ ድንጋይ እስከ ዛሬ ድረስ በቤትሳሚሱ ኢያሱ እርሻ ውስጥ ምስክር ሆና ትገኛለች። ¹⁹አባታችን ግን ከቤትሳሚስ ሰዎች መካከል አንዳንዶቹን የኪዳኑን ታቦት ውስጥ በመመልከታቸው መታ፤ ከእነርሱም ሰባ ሰዎች ገደለ። ሕዝቡም እንዲህ በታላቅ መቅሠፍት ስለ መታቸው አለቀሱ። ²⁰የቤትሳሚስ ሰዎችም፣ “በአባታችን፣ በዚህ ቅዱስ አምላክ ፊት ሊቆም የሚችል ማን ነው? ታቦቱስ ከእኛ ዘንድ ተነሥቶ ወደ ማን ይውጣ?” አሉ።

²¹ወደ ቂርያትይዓሪም ሰዎችም መልእክተኞችን ልከው፣ “ፍልስጥኤማውያን የአባታችንን ታቦት መልሰዋል፤ ወርዳችሁ ወደ እናንተ አውጡት” አሉ።