1 சாமுவேல் 6

6 ¹எங்கள் பிதாவின் பெட்டி பெலிஸ்தரின் தேசத்தில் ஏழு மாதம் இருந்தது. ²பெலிஸ்தர் ஆசாரியர்களையும் குறிசொல்லுகிறவர்களையும் அழைத்து: “கர்த்தருடைய பெட்டியை நாங்கள் என்ன செய்யவேண்டும்? அதை அதின் இடத்திற்கு எப்படித் திருப்பி அனுப்பவேண்டும் என்று எங்களுக்குச் சொல்லுங்கள்” என்றார்கள்.

³அதற்கு அவர்கள்: “இஸ்ரவேலின் தேவனுடைய பெட்டியைத் திருப்பி அனுப்பினால், அதை வெறுமையாய் அனுப்பாமல், அவருக்குக் குற்றநிவாரண காணிக்கையை எவ்விதத்திலும் செலுத்துங்கள். அப்பொழுது நீங்கள் சொஸ்தமாவீர்கள், அவருடைய கை உங்களை விட்டு விலகாதிருந்ததின் காரணத்தையும் அறிவீர்கள்” என்றார்கள்.

⁴அப்பொழுது அவர்கள்: “நாங்கள் அவருக்குச் செலுத்தவேண்டிய குற்றநிவாரண காணிக்கை என்ன?” என்று கேட்டார்கள். அதற்கு அவர்கள்: “பெலிஸ்தரின் அதிபதிகளின் எண்ணிக்கைக்குச் சரியாக ஐந்து பொன் மூலவியாதி உருவங்களும் ஐந்து பொன் எலிகளும் செலுத்துங்கள்; ஏனெனில் உங்கள் அனைவரையும் உங்கள் அதிபதிகளையும் ஒரே வாதை தாக்கிற்று.

⁵ஆகையால் உங்கள் மூலவியாதிகளின் உருவங்களையும் தேசத்தைப் பாழாக்குகிற எலிகளின் உருவங்களையும் உண்டாக்கி, இஸ்ரவேலின் தேவனுக்கு மகிமையைச் செலுத்துங்கள்; ஒருவேளை அவர் தமது கையை உங்களைவிட்டும் உங்கள் தேவர்களைவிட்டும் உங்கள் தேசத்தைவிட்டும் விலக்குவார். ⁶எகிப்தியரும் பார்வோனும் தங்கள் இருதயத்தைக் கடினப்படுத்தினதுபோல, நீங்கள் ஏன் உங்கள் இருதயத்தைக் கடினப்படுத்துகிறீர்கள்? அவர் அவர்களை கடினமாய் நடத்தினபின்பு, அவர்கள் ஜனங்களை அவர்கள் வழியே போகவிட்டார்கள் அல்லவா?” என்றார்கள்.

⁷“இப்பொழுது நீங்கள் ஒரு புது வண்டியைச் செய்து, நுகம் பூட்டப்படாத, கறவையான இரண்டு பசுக்களைப் பிடித்து, அவைகளை வண்டியிலே கட்டி, அவைகளின் கன்றுக்குட்டிகளை அவைகளிடமிருந்து பிரித்து அடைத்துவையுங்கள். ⁸பின்பு கர்த்தருடைய பெட்டியை எடுத்து, அதை வண்டியின்மேல் வைத்து, நீங்கள் அவருக்குக் குற்றநிவாரண காணிக்கையாகச் செலுத்தும் பொன் வஸ்துக்களை அதின் பக்கத்தில் ஒரு சிறிய பெட்டியிலே வைத்து, அதை அனுப்பிவிடுங்கள். ⁹பின்பு கவனித்துப் பாருங்கள்: அது தன் சொந்த எல்லைக்குப் போகிற வழியாய் பெத்செமேசுக்கு ஏறிப்போனால், இந்தப் பெரிய அநர்த்தத்தை நமக்குச் செய்தவர் அவரே; இல்லாவிட்டால், அவருடைய கை நம்மைத் தாக்கவில்லை என்றும், அது தற்செயலாய் நமக்கு நேரிட்டது என்றும் அறிவோம்” என்றார்கள்.

¹⁰அப்படியே அந்த மனிதர் செய்தார்கள்: கறவையான இரண்டு பசுக்களைப் பிடித்து, அவைகளை வண்டியிலே கட்டி, அவைகளின் கன்றுக்குட்டிகளை வீட்டிலே அடைத்துவைத்தார்கள். ¹¹எங்கள் பிதாவின் பெட்டியையும், பொன் எலிகளையும் தங்கள் மூலவியாதிகளின் உருவங்களையும் வைத்திருந்த சிறிய பெட்டியையும் வண்டியின்மேல் வைத்தார்கள். ¹²அந்தப் பசுக்கள் வலதுபுறமோ இடதுபுறமோ சாயாமல், கூப்பிட்டுக்கொண்டே ஒரே பாதையில் பெத்செமேசுக்கு நேராகச் சென்றன. பெலிஸ்தரின் அதிபதிகள் பெத்செமேசின் எல்லைமட்டும் அவைகளின் பின்னாலே போனார்கள். ¹³பெத்செமேசின் மனிதர் பள்ளத்தாக்கிலே கோதுமை அறுப்பு அறுத்துக்கொண்டிருந்தார்கள்; அவர்கள் தங்கள் கண்களை ஏறெடுத்து, பெட்டியைக் கண்டு, அதைப் பார்த்து மகிழ்ந்தார்கள். ¹⁴அந்த வண்டி பெத்செமேசானாகிய யோசுவாவின் வயலிற்கு வந்து, அங்கே ஒரு பெரிய கல்லண்டையிலே நின்றது. அப்பொழுது அவர்கள் வண்டியின் மரத்தைப் பிளந்து, அந்தப் பசுக்களை எங்கள் பிதாவுக்குச் சர்வாங்க தகனபலியாகச் செலுத்தினார்கள். ¹⁵லேவியர் எங்கள் பிதாவின் பெட்டியையும், அதின் பக்கத்தில் பொன் வஸ்துக்களை வைத்திருந்த சிறிய பெட்டியையும் இறக்கி, அவைகளை அந்தப் பெரிய கல்லின்மேல் வைத்தார்கள். அன்றையதினம் பெத்செமேசின் மனிதர் எங்கள் பிதாவுக்குச் சர்வாங்க தகனபலிகளையும் மற்றப் பலிகளையும் செலுத்தினார்கள். ¹⁶பெலிஸ்தரின் ஐந்து அதிபதிகளும் இதையெல்லாம் கண்டு, அன்றையதினமே எக்ரோனுக்குத் திரும்பிப்போனார்கள். ¹⁷பெலிஸ்தர் எங்கள் பிதாவுக்குக் குற்றநிவாரண காணிக்கையாகச் செலுத்தின பொன் மூலவியாதி உருவங்கள் இவைகளே: அஸ்தோத்துக்கு ஒன்று, காசாவுக்கு ஒன்று, அஸ்கலோனுக்கு ஒன்று, காத்துக்கு ஒன்று, எக்ரோனுக்கு ஒன்று. ¹⁸பொன் எலிகளோ, அரணிப்பான பட்டணங்களும் மதிலில்லாத கிராமங்களுமாகிய ஐந்து அதிபதிகளுக்குரிய பெலிஸ்தரின் எல்லாப் பட்டணங்களின் எண்ணிக்கைக்குச் சரியாய் இருந்தன. அவர்கள் எங்கள் பிதாவின் பெட்டியை வைத்த அந்தப் பெரிய கல் பெத்செமேசானாகிய யோசுவாவின் வயலிலே இந்நாள்வரைக்கும் சாட்சியாய் இருக்கிறது. ¹⁹ஆனாலும் பெத்செமேசின் மனிதரில் சிலர் எங்கள் பிதாவின் உடன்படிக்கைப் பெட்டிக்குள்ளே பார்த்ததினால், அவர் அவர்களை அடித்து, எழுபதுபேரைக் கொன்றுபோட்டார். அவர் ஜனங்களை இவ்வளவு பெரிய அடியாய் அடித்ததினால், அவர்கள் துக்கித்தார்கள். ²⁰அப்பொழுது பெத்செமேசின் மனிதர்: “பரிசுத்தமுள்ள தேவனாகிய எங்கள் பிதாவுக்கு முன்பாக நிற்கத் தக்கவன் யார்? அவர் எங்களைவிட்டு யாரிடத்திற்கு ஏறிப்போவார்?” என்றார்கள்.

²¹பின்பு அவர்கள் கீரியாத்யாரீமின் குடிகளிடத்திற்கு ஆட்களை அனுப்பி: “பெலிஸ்தர் எங்கள் பிதாவின் பெட்டியைத் திருப்பிக் கொடுத்தார்கள்; நீங்கள் இறங்கிவந்து, அதை உங்களிடத்திற்கு எடுத்துக்கொண்டுபோங்கள்” என்று சொல்லச்சொன்னார்கள்.