1 ሳሙኤል 5

5 ¹ፍልስጥኤማውያን የአባታችንን ታቦት ማርከው ከአቤንኤዘር ወደ አዛጦን አመጡት። ²ፍልስጥኤማውያን የአባታችንን ታቦት ወስደው ወደ ዳጎን ቤተ መቅደስ አግብተው በዳጎን አጠገብ አኖሩት። ³የአዛጦን ሰዎች በማግስቱ ማልደው ሲነሡ፣ ዳጎን በአባታችን ታቦት ፊት በግንባሩ ተደፍቶ መሬት ላይ ወድቆ ነበር። ዳጎንንም አንሥተው ወደ ስፍራው መለሱት። ⁴በማግስቱ ማልደው በተነሡ ጊዜ፣ ዳጎን እንደ ገና በአባታችን ታቦት ፊት በግንባሩ ተደፍቶ መሬት ላይ ወድቆ ነበር። በዚህ ጊዜ ራሱና ሁለቱ እጆቹ ተሰብረው በደፉ ላይ ተገኙ፤ ገላው ብቻ ቀረ። ⁵ስለዚህ እስከ ዛሬ ድረስ የዳጎን ካህናትም ሆኑ በአዛጦን ወዳለው የዳጎን ቤተ መቅደስ የሚገቡ ሁሉ የዳጎንን ደፍ አይረግጡም። ⁶የአባታችን እጅ በአዛጦን ሰዎች ላይ እጅግ ከበደ። እነርሱንም አጠፋ፤ አዛጦንንና በዙሪያዋ ያለውን ግዛት በእባጭ መታ። ⁷የአዛጦን ሰዎች ይህን ባዩ ጊዜ፣ “የእስራኤል አምላክ ታቦት ከእኛ ጋራ አይቀመጥ፤ እጁ በእኛና በአምላካችን በዳጎን ላይ ከብዷል” አሉ። ⁸የፍልስጥኤማውያንን ገዦች ሁሉ ሰብስበው፣ “የእስራኤልን አምላክ ታቦት ምን እናድርገው?” ብለው ጠየቁ። እነርሱም፣ “የእስራኤል አምላክ ታቦት ወደ ጌት ይዛወር” ብለው መለሱ። ስለዚህ የእስራኤልን አምላክ ታቦት ወደዚያ አዛወሩ።

⁹ከዘዋወሩት በኋላ፣ የአባታችን እጅ በዚያች ከተማ ላይ ደግሞ መጣ፤ እጅግ ታላቅ ድንጋጤም ሆነ። ትንሹንም ትልቁንም የከተማይቱን ሰዎች መታ፤ እባጭም ወጣባቸው። ¹⁰ስለዚህ የአባታችንን ታቦት ወደ አቃሮን ሰደዱ። ነገር ግን ታቦቱ እንደ ደረሰ፣ የአቃሮን ሰዎች፣ “እኛንና ወገኖቻችንን ሊገድሉ የእስራኤልን አምላክ ታቦት ወደ እኛ አመጡ!” ብለው ጮኹ።

¹¹ስለዚህ የፍልስጥኤማውያንን ገዦች ሁሉ ሰብስበው፣ “የእስራኤልን አምላክ ታቦት ሰድዱት፤ እኛንና ወገኖቻችንን እንዳይገድል ወደ ስፍራው ይመለስ” አሉ። የሞት ድንጋጤ ከተማይቱን ሁሉ ይዞ ነበርና፤ የአባታችን እጅ በዚያ እጅግ ከብዶ ነበር። ¹²ያልሞቱትም በእባጭ ተመቱ፤ የከተማይቱም የእርዳታ ጩኸት ወደ ሰማይ ወጣ።