Euutap Kwandanyo Kobargei Philistiik
Ki konde Philistiik moingetap Kwandanyo ne ki nam kotokyingei Dagon, ago kinyoor kamuktaindennywa kobutyingei ng'wony tai; eng' peetuut ne isubu ko ki il metinnyi ak eunekyik eng' tugatukyetap kurgeet. Ki subu kabwanutik ak nyalilda moingetanooto kong'etee Ashdod koba Gath ak Ekron, agoi kosomei nganaseet age tugul kobagaakta niito.
5 1Ki nam Philistiik moingetap Kwandanyo, ak koip eng' Eben-haezer kwo Ashdod. 2Ki nam Philistiik moingetap Kwandanyo, ak koip kot ko kootap Dagon, ak konde kotokyingei Dagon. 3Ye ki ng'eet piigap Ashdod karon miising', kogobutyi Dagon ng'wony kogutuny eng' taitap moingetap Kwandanyo. Ki nam icheek Dagon ak koweekyi oldanyi. 4Ye ki ng'eetyo karon miising' eng' peetuut ne isubu, kogobutyi Dagon kogeny ng'wony kogutuny eng' taitap moingetap Kwandanyo. Ara ko ki il metinnyi ak eunekyik tuwai, koiilgei eng' tugatukyetap kurgeet; kobatee muustonyi kityo ne ki ng'et. 5Nooto si agoi ra, ma tyech tisiigap Dagon ak tugul che chut kootap Dagon eng' Ashdod tugatukyetap kurgeetap Dagon. 6Ki koromit eutap Kwandanyo miising' eng' piigap Ashdod. Ki ng'em icheek ak kobir kabwanutik, Ashdod ak emotinwekyik che ki mi ole neegitee. 7Ye ki kogeer murenigap Ashdod niito, kole, “Ma nyolu kotebi moingetap Kamuktaindetap Israel ak acheek; nyigiis eunnyi eng' acheek ak eng' Dagon kamuktaindennyo.” 8Ki kuur kiptainigap Philistiik tugul koleenji, “Keyai nee ak moingetap Kamuktaindetap Israel?” Kowol kole, “Oip moingetap Kamuktaindetap Israel kwo Gath.” Ki ip anyun moingetap Kamuktaindetap Israel yooto.
9Ye ki kagoip, konyo eutap Kwandanyo kobargei nganasanooto kora, kobiit potanet ne oo miising'. Ki pir piikyik, che mengech ak che eecheen, ak kobiit kabwanutik eng' icheek. 10Ki iyookto anyun moingetap Kwandanyo kwo Ekron. Ago ye kingo it, koriir piigap Ekron kole, “Kaget moingetap Kamuktaindetap Israel ole kimi si kobar acheek ak piikyok!”
11Ki iyumgei anyun kiptainigap Philistiik tugul koleenji, “Oyookte moingetap Kamuktaindetap Israel koba; ingoweekyigei oldanyi, si ma kobar acheek ak piikyok.” Amu ki tebee potaneetap meet nganaseet komugul; ki koromit eutap Kwandanyo miising' yooto. 12Pichooto che ma kome, ki kibir kabwanutik, ak ki togostoi kateiyet ne po nganaseet kwo kipsengwet.