آتامیزین الی فئلئسطلی‌لرئن ضئدّئنه
فئلئسطلی‌لر اسئر آلدیقلاری آتامیزین ساندیغینی داگونون یانیندا قویدولار و ائکی دفه اؤز تاریلارینی اوزو اوسته یره دوشموش گؤردولر؛ ائکئنجی دفه باشی و الری آستانادا قیریلمیشدی. شئشلر و واهئمه ساندیغین دالینجا اَشدوددان گَته، گَتدن عِقرونا گلدی، تا کی هر شهر اوندان قورتولماق اوچون یالواردی.
5 1فئلئسطلی‌لر آتامیزین ساندیغینی اسئر آلمیشدیلار و اونو اِبِنعِزِردن اَشدودا گتئردئلر. 2فئلئسطلی‌لر آتامیزین ساندیغینی گؤتوروب داگونون معبدئنه گتئردئلر و اونو داگونون یانیندا قویدولار. 3اَشدود خالقی سحر تزدن قالخاندا، گؤردولر کی، داگون آتامیزین ساندیغینین قاباغیندا اوزو اوسته یره دوشوب. اونلار داگونو گؤتوروب گئنه اؤز یرئنده قویدولار. 4صاباحیسی سحر تزدن قالخاندا، داگون گئنه آتامیزین ساندیغینین قاباغیندا اوزو اوسته یره دوشموشدو. بو دفه اونون باشی و هر ائکی الی قیریلیب آستانادا دوشموشدو؛ آنجاق بدنی قالمیشدی. 5بونا گؤره ده بو گونه قدر داگونون کاهئنلری و اَشدودداکی داگونون معبدئنه گئرنلرئن هامیسی داگونون آستاناسینی آیاقلامازلار. 6آتامیزین الی اَشدود خالقینین اوستونه آغیرلاشدی. او، اونلاری داغیتدی و هم اَشدودا، هم ده اونون اطرافینداکی تورپاغا شئشلر چیخاردی. 7اَشدود کئشئلری بونو گؤرنده ددئلر: «ائسرایئلئن تاریسینین ساندیغی بئزئم یانیمیزدا قالماسین، چونکی اونون الی هم بئزئم، هم ده تاریمیز داگونون اوستونده آغیردیر.» 8اونلار بوتون فئلئسطلی آغالارینی چاغیریب سوروشدولار: «ائسرایئلئن تاریسینین ساندیغینی نه اده بئله‌رئک؟» اونلار جاواب وردئلر: «ائسرایئلئن تاریسینین ساندیغینی گَته آپارین.» بله‌جه ائسرایئلئن تاریسینین ساندیغینی اورایا آپاردیلار.
9اونو کؤچوردوکدن سونرا، آتامیزین الی او شهرئن ده ضئدّئنه گلدی و چوخ بؤیوک بئر ولوله سالدی. او، شهرئن خالقینی، بؤیویئندن کئچئیئنه کئمی ووردو و اونلارین بدنئنده شئشلر چیخدی. 10بله‌جه آتامیزین ساندیغینی عِقرونا گؤندَردئلر. آمّا ساندیق چاتان کئمی عِقرون خالقی فریاد ادئب ددئلر: «ائسرایئلئن تاریسینین ساندیغینی بئزئم یانیمیزا گتئرئبلر کی، بئزی و خالقیمیزی اؤلدورسونلر!»
11بله‌جه بوتون فئلئسطلی آغالارینی ییغیب ددئلر: «ائسرایئلئن تاریسینین ساندیغینی گؤندَ‌رئن گتسئن؛ قوی اؤز یرئنه قاییتسین کی، بئزی و خالقیمیزی اؤلدورمه‌سئن.» چونکی بوتون شهری اؤلوم ولوله‌سی بوروموشدو؛ آتامیزین الی اورادا چوخ آغیر ائدی. 12اؤلمه‌ینلرئن بدنئنده شئشلر چیخدی و شهرئن کؤمک فریادی گؤیه قالخدی.
