ithumwui Avāwui Pāng Philistinenaobingwuitungli
Philistine-na ithumwui Avāwui manggkhong lāzai sha Dagonwui ngatonli tha, kaniyang chida athumwui vare-va kadali amai kazik leida phangshi; kaniyang-kha-li akui kala akhut kachat sha serkhong khakaphangli leira. Manggkhong Ashdod-tanga Gath, Gath-tanga Ekron lhungra kachida muimat kala ngachee shokra, ramnao kachidana ava kathui zangkhavai da kaphungshi.
5 1Philistinenaobingna ithumwui Avāwui oko chi ngapaikakhuiya, kala athumna Ebenezer eina Ashdodli khuirai. 2Philistinenaobingna ithumwui Avāwui oko chi khuida, Dagonwui shimli khuizanglaga, Dagonwui ngalemli haihai. 3Ashdodwui mibingna ngathorthakva̱ ngakarkathui tharan, Dagon ithumwui Avāwui oko mangāli ngaleili amai mashunzangda poktitlaga leisai. Athumna Dagon chi khuida apamli shunluishita. 4Athumna ngathorthakva̱ ngakarkathui tharan, Dagon ithumwui Avāwui oko mangāli ngaleili amai mashunzangda latluida pitāhaowa. Chithang akui kala apāng khanini khamā za̱laga khāmongpheili tātunghaida leisai; aphasā maningla taisai. 5Chiwui vang eina aja eina tangda Ashdodli Dagonwui pāngmonbing kala Dagonwui shimli zangkabing saikorana Dagonwui khāmongphei mapha̱paimana. 6Ithumwui Avāwui pāng Ashdodwui mibingwuitungli ritlak eina tāhaowa. Ana Ashdod kala chiwui kuikhamareili khalei leiretbingli shimān ngasakta, athumli moksā eina ngaphita. 7Ashdodwui mibingna hi theilaga, athumna hānga, "Israelwui Varewui oko chi hili mapamsangpaimana; awui pāng ithumwuitungli kala ithumwui vare Dagonwuitungli mararlaka." 8Athumna Philistinewui wungnaobing saikorali hokhuilaga ngahāna, "Israelwui Varewui oko chi ithumna khi sārakhala?" "Israelwui Varewui oko chi Gathli khuivālu," da athumna hānga. Chieina athumna Israelwui Varewui oko chi apam chili khuivā.
9Athumna chi khuikahaiwui thili, ithumwui Avāwui pāng keinung chiwuitunglila tāhaowa, chieina hakmahālak eina khangachee tarākha shoka. Ana chiwui naoshinaobing eina kasarnaobing mibing saikorali sāthata, kala moksā athumwui alungli shokngasaka. 10Chieina athumna ithumwui Avāwui oko chi Ekronli chihovāhaowa. Kha oko chi vāshung tharan, Ekronwui mibingna vaoda hānga, "Ithum kala ithumwui mibingli shaothat khavai athumna Israelwui Varewui oko chi ithumli khuirāhaira!"
11Chieina athumna Philistinewui wungnaobing saikorali kazipkhuilaga hānga, "Israelwui Varewui oko chi hanmihaolu; apamli unghaoranu, chithākha ithum kala ithumwui mibingli mashaothatmara." Kathiwui khangacheena keinung katonga chi singkhuihaowa; ithumwui Avāwui pāng apam chili ritlak eina razaserhaowa. 12Mathikahaibingli moksā ngaphitta, kala keinung chiwui ngachon khavai khavao kazingramshong kāshunghaowa.
