1 Samuel 4

4 ¹Samuelwui tui Israel saikorali rāhaowa. Israelnaobing Philistinenaobingli ngarar khavai thāhaowa, kala Ebenezerli rairum sai; Philistinenaobing Aphekli rairum sai.

²Philistinenaobingna Israelli ngarar khavai yangngasunga; rai ngayaovāda Philistinenaobingna Israelli yuihaida, raiphungli mi thing mati sha̱kha shaothata. ³Raimibing rāmrahli latunga tharan, Israelwui khararnaobingna hānga, "Khisāda aja ithumwui Avāna Philistinenaobingli ithumli yuihaida ngasakhaokhala? Ithumwui Avāwui tuingashit oko Shilohwui eina khuiunghaosa; chithākha ana ithumwui ngachaili rāhaida ithumli yangkashebingwui eina kanmira."

⁴Chieina mibingna Shilohli chihoda cherubimwuitungli pamda khalei saikorawui Avāwui tuingashit oko chi khuirāhaira. Eliwui naomayara khani, Hophni eina Phinehas, ithumwui Avāwui tuingashit oko ngasoda apam chili leisai. ⁵Ithumwui Avāwui tuingashit oko rāmrahli azanga tharan, Israel saikorana kayākha panglāk eina vaoda, ngalei nganuka. ⁶Philistinenaobingna khavaokhon chi shālaga hānga, "Hebrewnaobingwui rāmrahli khavaokhon reikhamatai hi khikhala?" Chieina ithumwui Avāwui oko rāmrahli azanghaowa kaji athumna theihaowa. ⁷Philistinenaobing ngacheehaowa, kaja athumna hānga, "Vare akha rāmrahli rāhaira!" Chieina athumna hānga, "Ithum shimānki; kaja thuikahai atamli hikathā mashoklakranga. ⁸Ithum shimānki! Hi vare kapangpangabingwui pāngwui eina khipāna ithumli huimira? Hi varebing chi, lamhāngli Egyptnaobingli kazātkashi saikora eina sāthat kahai varebing china. ⁹O Philistinenaobing, yāng kālu! Mimānga sālu, chi maningsi kaje athumna nathumli otram ngatha̱khami thāda nathumna Hebrewnaobingli otram ngatha̱ra. Mimānga sālu kala ngararlu! ¹⁰Philistinenaobing ngarara; Israel mayuithuda kachāyām eina awui shimli yāmhaowa. Mi kayākha kachungkha thihaowa; Israelwui phei eina kazata raimibing thing thumrā pitāhaowa." ¹¹Ithumwui Avāwui oko ngapaithuihaowa, kala Eliwui naomayara khani, Hophni eina Phinehas, thihaowa.

Eli Tāhaowa kala Masot Thuihaowa

¹²Chithang kachon serkahai kala kuili chifa neokahai Benjaminwui mi akhana rai eina yongthuilaga Shilohli vāhaowa. ^a a v12 Kachon serkhai kala kuili chifa neokahai chi, thuikahai atamli mibingna wukkakhanang reikhamatai kala chapngachā chitheiwui pongna. ¹³Vākashung tharan, Eli shongfa pheili awui pamli pamda yangpama, kaja ithumwui Avāwui oko chiwui vang awui ning kathira. Mipā china keinungli azangda unghānga, kala keinung saikorana khonzārhaowa. ¹⁴Elina khonzār chi shālaga hānga, "Khonkazār hi khikhala?" Chieina mipā china hengsāda rāhaida Elili unghānga.

¹⁵Eli zingkum hangchikoda chishat kāhairasai, kala awui mikla kayākha māmāchahaira matheirarthuwa. ¹⁶Mipā china Elili hānga, "Ina rai lungli eina rāhaira, aja rai eina yongthuihaira." Elina ngahāna, "Inaomayara, khi shokkahaikhala?"

¹⁷Paomena ngahānkai, "Israelnaobing Philistinenaobingwui mangāli yāmhaowa; kala raimibingwui alungli kachungkha pitāhaowa; kala nanaomayara khani Hophni eina Phinehas thihaira; kala ithumwui Avāwui oko ngapaithuihaowa."

¹⁸Ana ithumwui Avāwui oko kahāng tharan, Elina ngaveipheili awui pam eina khanukshong pitāda, akahung sātekmida thihaowa; kaja a rarhaida ritnai. Ana Israelli zingkum hangmati mungsai.

¹⁹Awui arihāva̱ Phinehaswui preiva̱ nao vaida naosak atam nganailakhairasai. Ithumwui Avāwui oko khuihaira kala ashāni eina agahara thihaira da kashā tharan, ana ngakhumsangda nao pharai, kaja kachotna ali kheizata. ²⁰Ana kathi mayuk eina pida leilakha, awui ngalemli leikahai sha̱naobingna hānga, "Mangacheealu, kaja nana mayarnao akha pharāhaira." Kha ana mangahānkāmana, lah ali matheimana. ²¹Ithumwui Avāwui oko khuihaira kala ashāni eina agahara thihairawui vang ana nao chiwui aming Ichabod phokmida hānga, "Tekhamatei Israelwui eina thuihaira." ^b b v21 Ichabod kaho ming chiwui kakhalat "tekhamatei maleimana" china—ithumwui Avāwui tekhamatei chi oko ngasoda Israelwui eina thuihaira da ava̱na chapngachā kahaina. ²²Ana hānga, "Tekhamatei Israelwui eina thuihaira, kaja ithumwui Avāwui oko khuihaira."