ታቦት ኣቦና ናብ ኢድ ፍልስጥኤማውያን ወደቐ

እስራኤል ኣብ ውግእ ተሰዓሩ፥ ስለዙይ ንታቦት ኣቦና ኸም ኣፅዋር ገይሮም ኣምፅእዎ። ፍልስጥኤማውያን ግና ኣብ መወዳእታ ሰዓሩ፦ ሰላሳ ሽሕ ሞቱ፥ እቲ ታቦት ተማረኸ፥ ደቂ ኤሊ ተቐትሉ፥ ኤሊ ኸዓ ነቲ ዜና ሰሚዑ ንድሕሪት ተደፍአ። ሓንቲ እትመውት ዘላ ሰበይቲ ድማ፥ ክብሪ ካብ እስራኤል ረሓቐ ኢላ፥ ንወዳ ኢካቦድ ኢላ ሰመየቶ።

ምዕራፍ 4።

ቃል ሳሙኤል ድማ ናብ ኵሉ እስራኤል በፅሐ። እስራኤል ንፍልስጥኤማውያን ክዋግኡ ወፁ፤ ኣብ ኤብንዔዘር ሰፈሩ፤ ፍልስጥኤማውያን ከዓ ኣብ ኣፌቅ ሰፈሩ።

ፍልስጥኤማውያን ኣብ ቅድሚ እስራኤል ተሰለፉ፤ ውግእ ከዓ ተላዕለ፤ እስራኤል ድማ ብፍልስጥኤማውያን ተስዓሩ፤ ንሳቶም ከዓ ኣብቲ ሜዳ ኣስታት ኣርባዕተ ሽሕ ሰብኣይ ቀተሉ። እቶም ህዝቢ ናብ ሰፈር ምስ ተመለሱ፥ ዓበይቲ እስራኤል ከምዙይ በሉ፦ “ኣቦና ስለ ምንታይ ሎሚ ብፍልስጥኤማውያን ኣስዒሩና? ታቦት ኪዳን ኣቦና ካብ ሴሎ ናብ ኣና ነምፅእ፤ ንሱ ናብ ማእኸልና መፂኡ ካብ ፀላእትና ምእንቲ ኼድሕነና።”

እቶም ህዝቢ ድማ ናብ ሴሎ ለኣኹ፤ ታቦት ኪዳን እቲ ኣብ ልዕሊ ኪሩቤል ዝተቐመጠ ኣቦ ሰራዊት ሰማይ ከዓ ካብኡ ኣምፅኡ። ክልቲኦም ደቂ ኤሊ፥ ኣፍኒንን ፊንሃስን፥ ምስ ታቦት ኪዳን ኣቦና ኣብኡ ነበሩ። ታቦት ኪዳን ኣቦና ናብቲ ሰፈር ምስ ኣተወ፥ ኵሎም እስራኤላውያን ምድሪ ክሳዕ እትርዕድ ዓው ኢሎም ኣእወዩ። ፍልስጥኤማውያን ድማ ድምፂ እቲ ኣውያት ሰሚዖም “እዝ ኣብ ሰፈር ዕብራውያን ዝስማዕ ዘሎ ዓብዪ ኣውያት እንታይ እዩ?” ኢሎም ሓተቱ። ሽዑ ታቦት ኣቦና ናብ ሰፈር ከም ዝኣተወ ፈለጡ። ፍልስጥኤማውያን ድማ “ኣምላኽ ናብ ሰፈር ኣትዩ!” ኢሎም ስለ ዝበሉ ፈርሑ። ሽዑ ድማ “ወይለና! ከምዙይ ዝበለ ቅድሚ ሕዚ ተፈፂሙ ኣይፈልጥን። ወይለና! ካብ ኢድ እዞም ሓያላት ኣማልኽቲ መን ከድሕነና እዩ? እዚኣቶም እቶም ኣብ ምድረ በዳ ንግብፃውያን ብዅሉ መቕሰፍቲ ዝወቕዑ ኣማልኽቲ እዮም። ኣቱም ፍልስጥኤማውያን በርትዑ! ሰብኡት ኩኑ፤ እንተዘይኮነ ከምቲ ንሳቶም ዘገልገሉኹም፥ ንስኻትኩም ንዕብራውያን ክተገልግልዎም ኢኹም። ሰብኡት ኩኑ፥ ተዋግኡ! ፍልስጥኤማውያን ተዋግኡ፤ እስራኤል ድማ ተስዓሩ፤ ነፍሲ ወከፍ ከዓ ናብ ድንኳኑ ሃደመ። ብርቱዕ ጥፍኣት ኮነ፤ ካብ እስራኤል ሰላሳ ሽሕ ኣጋር ድማ ወደቑ።” ታቦት ኣቦና ተማረኸ፤ ክልቲኦም ደቂ ኤሊ፥ ኣፍኒንን ፊንሃስን ከዓ ሞቱ።

ኤሊ ወደቐ፥ ክብሪ ድማ ተልዓለ

ሓደ ብንያማዊ ከዓ በታ መዓልቲ እቲኣ ካብ ሰለፍ ውግእ ናብ ሴሎ ጐየየ፤ ክዳኑ ተቐዲዱ፥ ኣብ ርእሱ ኸዓ ዶሮና ነበረ። ^a ምስ በፅሐ፥ ኤሊ ኣብ መንበሩ ኣብ ጥቓ መንገዲ ኾፍ ኢሉ ይጥምት ነበረ፤ ልቡ ድማ ምእንቲ ታቦት ኣቦና ይርዕድ ነበረ። እቲ ሰብኣይ ናብ ከተማ ኣትዩ ነገሮም፤ ኵሎም ሰብ እታ ከተማ ኸዓ ኣእወዩ። ኤሊ ድማ ድምፂ እቲ ኣውያት ምስ ሰምዐ፥ “እዝ ወኻዕታ እዙይ እንታይ እዩ?” ኢሉ ሓተተ። ሽዑ እቲ ሰብኣይ ቀልጢፉ መፂኡ ንኤሊ ነገሮ።

ኤሊ ወዲ ተስዓን ሸሞንተን ዓመት ነበረ፤ ኣዒንቱ ድማ ፈዚዘን ክርኢ ኣይከኣለን። እቲ ሰብኣይ ንኤሊ “ኣነ ካብ ውግእ መፂአ፥ ሎሚ ኸዓ ካብ ሰለፍ ውግእ ሃዲመ” በሎ። ኤሊ ድማ “ኣታ ወደይ፥ እንታይ ኮነ?” ኢሉ ሓተተ።

እቲ ልኡኽ ከዓ ከምዙይ ኢሉ መለሰ፦ “እስራኤል ካብ ቅድሚ ፍልስጥኤማውያን ሃደሙ፤ ኣብ ማእኸል እቶም ህዝቢ ድማ ብርቱዕ ጥፍኣት ኮነ፤ ክልቲኦም ደቅኻ ኣፍኒንን ፊንሃስን ከዓ ሞይቶም እዮም፤ ታቦት ኣቦናውን ተማሪኹ።”

ንታቦት ኣቦና ምስ ጠቐሰ፥ ኤሊ ኣብ ጥቓ ደገ ኻብ መንበሩ ንድሕሪት ወደቐ፤ ክሳዱ ተሰበረ፥ ሞተ ኸዓ፤ ኣሪጉ ከቢዱን ነበረ እሞ። ንእስራኤል ኣርብዓ ዓመት መሪሑ ነበረ።

ሰበይቲ ወዱ፥ ሰበይቲ ፊንሃስ ድማ፥ ጠኒሳ ምውላድ ቀሪቡ ነበረ። ታቦት ኣቦና ከም ዝተማረኸ፥ ሓሙኣን ሰብኣያን ከም ዝሞቱ ምስ ሰምዐት፥ ፃዕሪ ወሊድ ስለ ዝሓዛ ተደፊኣ ወለደት። ክትመውት እንተላ፥ እተን ኣብ ጥቓኣ ዝነበራ ኣንስቲ “ወዲ ወሊድኺ ኢኺ እሞ ኣይትፍርሒ” በላኣ። ንሳ ግና ኣይመለሰትን፥ ኣየቕለበትን ከዓ። ነቲ ቍልዓ ድማ “ክብሪ ካብ እስራኤል ተልዒሉ” ኢላ፥ “ኢካቦድ” ኢላ ሰመየቶ፤ እዙይ ከዓ ብዛዕባ ምምራኽ ታቦት ኣቦናን ብዛዕባ ሓሙኣን ሰብኣያን ነበረ። ^b ንሳ ድማ “ክብሪ ካብ እስራኤል ተልዒሉ እዩ፥ ታቦት ኣቦና ተማሪኹ እዩ እሞ” በለት።