Koku kwa Tata wetu ha thandu ya Bafilisiti
Bafilisiti básya mukunzu wa Tata wetu bina bákwata bela-bela yi Dangoni, amana mbala zodi bámona nzambi wa bawu wábwa mbunzu ha tsi; mu mbala ya zodi mutwa wandi yi moku mandi mátoluka mábwa ha mwelu. Mputa yi kubanga byálanda mukunzu tuka ku Asidodi, ku Ngati, tii ku Ekroni, tii yi kosu mbanza yálomba ni bakatula wawu.
5 1Bafilisiti bábonga mukunzu wa Tata wetu, amana bawu bánata wawu tuka ku Ebeneza ku Asidodi. 2Bafilisiti bábonga mukunzu wa Tata wetu, bákota ni wawu mu nzu ya Dangoni, amana básya wawu bela-bela yi Dangoni. 3Kunima, bisi Asidodi bu bátelama muna suka kya kilumbu kyálanda, bámona Dangoni wábwa, mbunzu ha tsi, ku thwala ya mukunzu wa Tata wetu. Bábonga Dangoni amana básya yandi hika homa handi. 4Muna suka kya kilumbu kyálanda, bu bátelama hika, bámona Dangoni wábwa hika, mbunzu ha tsi, ku thwala ya mukunzu wa Tata wetu. Muna tangwa dina, mutwa wandi yi moku mandi modi mátoluka, mábwa ha mwelu; kaka nitu yandi yásala. 5Kikuma kya bwabuna, tii yi lelu, banganga ba Dangoni yi boosu bana bisi kota mu nzu ya Dangoni ku Asidodi, badyatilaku ha mwelu wa Dangoni. 6Koku kwa Tata wetu kwabwa yi zitu ha thandu ya bisi Asidodi. Wábanyokuna amana wábabeta ni mputa—Asidodi yi kinzunga kyandi kyosu. 7Bayakala ba Asidodi bu bámona bwabuna, bázimbula: «Mukunzu wa Nzambi wa Kiseledi wafwaniku kunanga yi betu; koku kwandi kwena ngolu ha thandu yetu yi ha thandu ya Dangoni, nzambi wetu.» 8Bátedisa bapfumu boosu ba Bafilisiti amana bábahyula: «Biki tufwani sadila yi mukunzu wa Nzambi wa Kiseledi?» Bawu bávutula: «Natenu mukunzu wa Nzambi wa Kiseledi ku Ngati.» Buna bánata mukunzu wa Nzambi wa Kiseledi kwakuna.
9Kunima dya kunata wawu, koku kwa Tata wetu kwisa phi ha thandu ya mbanza meni yina, amana kwábwisa bweya bwa lawu. Wábeta bisi mbanza, bana yi bambuta, amana mputa zábwa ha thandu ya bawu. 10Buna bahitika mukunzu wa Tata wetu ku Ekeloni. Kaasi bu wátula, bisi Ekeloni bákalunga: «Banatini mukunzu wa Nzambi wa Kiseledi kwena betu, hanga batuhonda betu yi batu betu!»
11Buna bákhokika bapfumu boosu ba Bafilisiti amana bázimbula: «Katulenu mukunzu wa Nzambi wa Kiseledi, wavutuka homa handi, hanga watuhondaku betu yi batu betu.» Bweya bwa lufwa bwábakwata mu mbanza yosu; koku kwa Tata wetu kwákala zitu dya lawu kwakuna. 12Batu bana kábafwaku, bábetama ni mputa, amana kindanda kya lusadisu kya mbanza kyátombuka ku zilu.
