Pitri pora Saul ke Samuel usorte loi jai ase

Saul tar baba laga harai juwa gadha khan bisari bole jaise aru napai, aru ekjon noukar pora jaga laga dorshi ke hudibole koise. Ek din age te amar Pitri pora koi diya karne, Samuel mangso laga ekta bhag alag kori kene rakhi kene wait kori thakise, aru Israel pora ki morom kore etu sob etiya Saul uporte ase koi kene ishara dise.

Adhyay 9.

Benjamin jat laga ekjon manuh thakise, tar nam Kish asile; tai Abiel laga putro, Abiel tu Zeror laga putro, Zeror tu Becorath laga putro, Becorath tu Aphiah laga putro asile, ekjon Benjamin jat laga manuh; tai dhuni aru naam thaka ekjon manuh asile. Tar laga ekjon putro thakise, tar nam Saul asile, ekjon sundor jawan manuh; Israel laga manuh khan majote tar pora aru sundor kun bhi nthakise; kandha pora uporte tai sob manuh pora lamba asile.

Saul laga baba Kish laga gadha khan harai jaise, etu karne Kish pora tar putro Saul ke koise, “Noukar khan majote ekjon ke tumi logote loi kene gadha khan bisari bole jabi.” Tai Ephraim laga pahar desh aru Shalishah desh paar hoi kene jaise, kintu tarkhan eitu pa-a nai. Tarkhan Shaalim desh paar kori kene jaise, kintu ta-te gadha khan nthakise. Tai Benjamin desh paar hoise, kintu titia bhi tarkhan eitu pa-a nai.

Tarkhan Zuph desh te punchise, titia Saul pora tar logote thaka noukar ke koise, “Ahibi, ami wapas jai jabo, nohoile moi laga baba gadha khan nimite chinta nakori kene amikhan nimite chinta koribo.”

Kintu noukar pora koise, “Sabi, eitu sheher te amar Pitri laga ekjon manuh ase, taike manyo kore; tai ki koi, eitu sob hosa pora puro hoi. Etiya amikhan ta-te jabo; sayed tai amikhan ke kun rasta loribo lage eitu kobo pare.”

Saul pora tar noukar ke koise, “Kintu jodi amikhan jabo, titia hei manuh ke ki loi anibo? Amikhan laga bosta te roti tu khotom hoise, aru amar Pitri laga manuh nimite kono uphar bhi nai. Amikhan logote ki ase?”

Noukar pora Saul ke aru ekbar jawab di koise, “Sabi, moi logote ekta chutu chandi laga poisa ase. Eitu moi amar Pitri laga manuh ke dibo, titia tai amikhan ke amikhan laga rasta kobo.” (Poila Israel te, kun amar Pitri logote hudibole jai, tai koi, “Ami darshi logote jabo,” kilemane aji laga bhabobadi ke titia darshi koi kene mata thakise.)

Saul pora jawab dise, “Bhal. Ami jabo.” Etu karne tarkhan amar Pitri laga manuh thaka sheher te jaise. Tarkhan sheher te jabole pahar te uthi thaka somoite, pani tulibole bahar te ulai aha jawan maiki khan logote lok paise, aru hudise, “Darshi yate ase naki?”

Tarkhan koise, “Ase. Tumikhan laga age te he ase. Joldi koribi, aji tai sheher te ahhise kilemane manuh khan laga uncha jaga te ekta bolidan ase. Tumikhan sheher te ghusa loge-loge, tai kha-bole uncha jaga te uthi ja-a age te taike pa-bo. Tai naha tak manuh khan nakha-bo, kilemane tai bolidan ke ashirbad dibo lage; titia he alohi khan kha-bo. Etiya uthi jabi—tumikhan taike joldi pa-bo.”

Tarkhan sheher te uthi jaise. Tarkhan ghusa somoite, Samuel uncha jaga te uthi ja-bole tarkhan phale ahhise.

Etiya Saul aha-r age din te, amar Pitri pora Samuel ke eitu dikhai disele:

“Kali eitu somoi nagad, Moi tumi logote Benjamin desh pora ekjon manuh pathabo. Taike Moi laga manuh Israel uporte cholawta hobole tel lagai dibi; tai Moi laga manuh ke Philistine khan laga hath pora bacha-bo, kilemane Moi laga manuh ke Moi dikhise, aru tarkhan laga kanda-a Moi logote punchi jaise.”

Samuel pora Saul ke dikha somoite, amar Pitri pora taike koise, “Moi kowa manuh tu eitu ase; eitu pora Moi laga manuh khan ke shasan koribo.”

Saul pora dorja te Samuel usorte ahhi kene koise, “Daya kori kene moike kobi, darshi laga ghor kote ase.”

Samuel pora jawab dise, “Moi he darshi ase. Moi laga age te uncha jaga te uthi jabi. Aji tumi moi logote kha-bo; phojur te moi tumike pathai dibo aru tumi laga monte ki ase eitu sob tumike kobo. Tin din age te tumi harai diya gadha khan paise, etu karne eitu khan nimite chinta nakoribi. Aru Israel laga sob daam thaka jinis kun karne ase? Eitu tumi aru tumi laga baba laga sob ghor manuh nimite nohoi naki?”

Saul pora jawab dise, “Moi Israel laga sob pora chutu jat, Benjamin jat laga manuh nohoi naki, aru moi laga poribar Benjamin laga sob poribar majote sob pora chutu nohoi naki? Tene hole kele tumi moike eitu kotha koi ase?”

Titia Samuel pora Saul aru tar noukar ke dangor ghor bhitorte loi anise, aru mata alohi khan—titia tis-jon nagad asile—tarkhan laga age jaga te bohai dise. Samuel pora randhoni ke koise, “Moi tumike diya bhag tu loi anibi, ji tu alag rakhibi koi kene moi koisele.” Randhoni pora theng laga mangso aru tar uporte thaka jinis tuli kene Saul laga age te rakhise. Samuel pora koise, “Tumi nimite rakhi thaka jinis tu eitu ase. Kha-bi, kilemane moi eitu alohi khan ke mata somoi pora, eitu din nimite tumi karne rakhi disele.” Etu karne Saul pora hei din te Samuel logote khaise.

Tarkhan uncha jaga pora sheher te namise, aru Samuel pora ghor laga chat te Saul logote kotha korise. Tarkhan phojur-te uthise, aru din ulowa somoite Samuel pora chat te thaka Saul ke matise, “Uthibi, aru moi tumike pathai dibo.” Saul uthise, aru tai duijon, tai aru Samuel, eke logote rasta te ulai jaise. Tarkhan sheher laga shesh phale nami ja-a somoite, Samuel pora Saul ke koise, “Noukar ke age te pathai dibi”—aru tai jaise—“kintu tumi olpo somoi thakibi, titia moi tumike amar Pitri laga kotha kobo pare.”