Tata wetu wásita Sawulu masi hanga kakala pfumu
Samwela wázunzila masi hana mutwa wa Sawulu hanga wusodwa wa Tata wetu, amana wámuheka yi bikhwidimba bitatu; Kitembu kya Tata wetu kikubwíla hana thandu yandi amana wabíkula. Ku manima, muna tangwa básola yandi ku thwala ya batu boosu, bámubwana waswama mu kati dya bima. Bahika bahyula: Mu khi phila mutu yina kalenda tuhulusa?
Tata wetu kisi zonza mu mavese 18, 22
10 1Amana Samwela wábonga mulangi wa masi, wázunzila mawu hana mutwa wa Sawulu, wámuyamba, amana wuzimbudi: «Ka Tata wetu ku wákusita masi, mu kukukhitula pfumu hana kimvwama kyandi? 2Buthwena, ha wukatuka kwena meni, watúndakana yi bayakala bodi ku dizyamu dya Lasheli ku Zelesa, muna mulambu wa Benzyame. Bazímbula: “Baphunda bana wásanda bamonikini; tata waku kena hika yi kyadi kya baphunda ko, kaasi buthwena wenina yi kyadi kyaku, wisi hyula: ‘Biki yihanga kikuma kya mwana wama?’”
3Muna kuna, wenda ku nti wa Tabola, kuna bayakala batatu, bana bisi kwenda kwena Tata wetu ku Beteli, bakutúndakana; wumosi yi bana ba bakhombu batatu, wumosi yi mapha matatu, amana wumosi yi kilekwa kya vinu. 4Bákuheka mboti amana bákuheka mapha modi, mana watámbula kwena bawu.
5Amana watula ku Gibeya dya Tata wetu, kuna kibuka kya basodi ba Baphilusi kyenina; ha wukoti mu hata, watúndakana yi kibuka kya bambikudi, bana bisi tuluka ku homa hazangama yi nzenze, yi ngoma, yi hongi, yi lukumbu ku thwala ya bawu, bisi bikula. 6Kitembu kya Tata wetu kikubwíla ni ngolu hana thandu yaku, amana wabíkula hamosi yi bawu amana wakítuka mutu wunkaka. 7Ha bikhwidimba byabi byakutúla kwena ngeyi, hanga mana walenda hanga, mukuma Tata wetu kenina yi ngeyi. 8Tuluka ku thwala yama ku Giligala. Kyedika yitúluka kwena ngeyi hanga yatambika bimenga bya kuyoka amana bimenga bya ngemba. Hingila bilumbu tsambwadi tii yikuna yitula kwena ngeyi, amana yikukamba mana wafwana hanga.»
Bikhwidimba bya Tata byásalama
9Ha Sawulu kákatuka kwena Samwela, Tata wetu wásoba mbundu yandi, amana bikhwidimba byabi byosu byásalama muna tangwa dina. 10Ku Gibeya, kibuka kya bambikudi kyámutundakana, Kitembu kya Tata wetu kyámubwila ni ngolu, amana wábikula hana kati dya bawu. 11Batu boosu bana bámuzaya theti bámumona wisi bikula hamosi yi bambikudi, amana batu báhyula bamosi yi bakwawu: «Biki byásalama kwena mwana Kisi? Keti Sawulu phi kenina hana kati dya bambikudi?»
12Mutu mosi wa kuna wáhyula: «Nati kenina tata wawu?» Yihana dyákituka kingana: «Keti Sawulu phi kenina hana kati dya bambikudi?» a a v12 Khyula yina “nati kenina tata wawu?” yisongidila ni bambikudi bafwaniku kala yi butuka dya mupfundila; mutu wosu kalenda tambula Kitembu. 13Ha kámanisa kubikula, wénda ku homa hazangama.
14Nkhasi wa Sawulu wámuhyula yandi yi musadi wandi: «Ku biki lwákwenda?» Wávutula: «Mu kusanda baphunda, amana buna tumonini ni bakálaku kuna, twísa kwena Samwela.»
15Nkhasi wa Sawulu wuzimbudi: «Ngilomba, nkhamba mana Samwela kazimbudi kwena ngeyi.»
16Sawulu wuzimbudi kwena nkhasi wandi: «Katukwikisi ni baphunda bamonikini.» Kaasi Sawulu kakambaku nkhasi wandi mana Samwela kázimbula mu mambu ma kipfumu.
Tata wetu wásonga kyamvu wandi wuna kásola
17Amana Samwela wátedisa batu kwena Tata wetu ku Misipa,
18wuzimbudi kwena bisi Kiseledi: «Mama mana Tata wetu wa Kiseledi kazimbula: “Meni yánata Kiseledi tuka ku Ngiphiti amana yálutabula mu moku ma Bisi Ngiphiti yi mu moku ma bipfumu byosu bina byálunyokisa.”
19Kaasi buthwena benu lwámulosila Tata wenu, yandi mosi wisi luhulula mu biwayi byenu byosu yi mu phasi zenu, amana lwámuzimbula: “Loni, heka kyamvu hana thandu yetu.” Buthwena, lutelamenu ku thwala ya Tata wetu mu bikanda yi mu mabuta ma benu.» b b v19 Kulomba kwa Kiseledi kyamvu wa muthu, mu kyedika, kwákala mu kulosa luyalu lwa lungongu lwa Tata wawu lwa kubayala.
20Ha Samwela kánata bikanda byosu bya Kiseledi ku thwala, kanda dya Benzyame dyásolama mu zeki. 21Wánata kanda dya Benzyame ku thwala mu mabuta; buta dya Matili dyásolama, amana Sawulu mwana Kisi wásolama. Bámusanda, kaasi bálendaku kumumona.
22Yihana báhyula Tata wetu mu mbala yikwawu: «Keti mutu watula vwa?» Amana Tata wetu wávutula: «Kenina wásweka hana kati dya bilekwa.»
23Bátina amana bámubonga kuna. Buna kátelama hana kati dya batu, wáluta batu boosu tuka ha mahembu kutombuka. 24Samwela wuzimbudi kwena batu boosu: «Keti lumwene mutu wuna Tata wetu kásola? Ka mutu ku wufwanani yi yandi hana kati dya batu boosu.» Batu boosu bákalunga: «Kyamvu kazinga!»
25Samwela wásamuna batu mikuku mya kipfumu, wámisonika mu mukanda, wátula wawu ku thwala ya Tata wetu. Amana Samwela wáhitika batu boosu, kosu mutu ku nzu yandi. 26Sawulu phi wénda ku nzu yandi ku Gibeya, amana bayakala ba ngolu, bana Tata wetu kásimba mbundu zawu, bénda hamosi yi yandi. 27Kaasi batu bahika bakonda mupfunu bazimbudi: «Buweti mutu yandu kalenda kutuhulula?» Bámulewula, bámunataku kabu. Kaasi Sawulu kázimbulaku kima.
