Amar Pitri pora Saul dwara Israel ke bachai loise
Nahash pora Jabesh-gilead ke shanti dibo koise, kintu sob laga dyna saku nikali kene. Saul, khobor aha homoi hal bai thaka, Atma pora tar ke dhori loise, tai tar goru khan ke kati kene Israel ke mati anise, aru phojur tak Ammon khan ke bhagai dise. Tar birodh kotha kowa manuh khan ke tai mari dibole na koise: aji amar Pitri pora uddhar anise.
11 1Tetiya Ammon laga manuh Nahash uthi kene ahhi Jabesh-gilead birodh te tambu lagaise. Jabesh laga sob manuh khan Nahash ke koise, “Amikhan logot ekta vachan koribi, aru amikhan apuni laga sewa koribo.”
2Ammon laga Nahash pora jawab dise, “Moi tumikhan logot eneka vachan koribo: moi sob manuh laga dyna phale laga suku ulai dibo, aru Israel sob uporte sorom anibo.”
3Jabesh laga bura manuh khan pora tar ke koise, “Amikhan ke sat din dibi, titia amikhan Israel laga sob desh te khobor diya manuh khan pathabo. Jodi kun pora amikhan ke nabachai, tene hole amikhan nijor ke apuni laga hath te di dibo.” 4Khobor diya manuh khan Saul laga Gibeah te punchise, aru ki hoise eitu manuh khan ke koise, aru taikhan sob jor pora kandise.
5Thik hei somoite Saul kheti pora tar laga bail khan laga pichete ahhise. Tai hudise, “Manuh khan ke ki hoise? Taikhan kile kandi ase?” Tetiya taikhan Jabesh laga manuh khan laga khobor tar ke koise. 6Jitia Saul eitu kotha khan hunise, amar Pitri laga Atma tar uporte joldi ahhi girise; aru tar khong bisi jwolise. 7Tai duita bail loi kene, tukra tukra kori katise, aru khobor diya manuh khan dwara Israel laga sob desh te pathai dise: “Kun manuh Saul aru Samuel laga pichete naiarbo, tar laga bail khan ke eneka kora hobo.” Tetiya amar Pitri laga bhoi manuh khan uporte girise, aru taikhan ekjon manuh nisena ulai ahhise. 8Tai Bezek te taikhan ke ginti korise: Israel laga manuh tin lakh, aru Judah laga manuh tis hajar thakise. 9Kun khobor diya manuh khan ahhise, taikhan ke koise, “Jabesh-gilead laga manuh khan ke kobi: Kali, jitia suryo gorom hobo, titia tumikhan ke bachai lobo.” Khobor diya manuh khan jai kene Jabesh laga manuh khan ke koise, aru taikhan khushi hoise. 10Jabesh laga manuh khan koise, “Kali amikhan nijor ke apuni laga hath te di dibo; apuni ki itcha kore, amikhan ke eneka koribi.” 11Dusera din te Saul manuh khan ke tinta bhag te bhag korise. Phojurte taikhan tambu bhitorte ghusi kene Ammon laga manuh khan ke din gorom nohua tak morai dise; aru bachi juwa khan eneka chitina hoise, duijon bhi eke logote thaka nai.
Amar Pitri laga usor te rajyo notun korise
12Manuh khan Samuel ke koise, “Kun pora koise, ‘Saul pora amikhan uporte raj koribo?’ Hei manuh khan ke amikhan hath te di dibi—amikhan taikhan ke morai dibo.”
13Kintu Saul koise, “Aji kun ke bhi mora nohobo, kilemane aji amar Pitri pora Israel ke bachai loise.”
14Samuel manuh khan ke koise, “Ahhibi, amikhan Gilgal te jabo, aru ta te rajyo ke notun koribo.” 15Sob manuh khan Gilgal te jai kene ta te amar Pitri laga usor te Saul ke raja bonaise. Ta te taikhan amar Pitri laga usor te shanti laga bolidan dise, aru Saul aru Israel laga sob manuh khan bisi khushi korise.