1 سموئیل 11

11 ¹پھر ناحاس عمونی نے چڑھائی کی اور یبیس جِلعاد کے مقابل خیمہ زن ہوا۔ یبیس کے سب لوگوں نے ناحاس سے کہا، ”ہمارے ساتھ عہد باندھ، تو ہم تیری خدمت کریں گے۔“

²ناحاس عمونی نے جواب دیا، ”میں تم سے اِس شرط پر عہد باندھوں گا کہ میں ہر ایک کی دہنی آنکھ نکال ڈالوں اور یوں سارے اسرائیل کو رُسوا کروں۔“

³یبیس کے بزرگوں نے اُس سے کہا، ”ہمیں سات دن کی مہلت دے کہ ہم سارے اسرائیل کی حدود میں قاصد بھیجیں۔ اگر کوئی ہمیں نہ بچائے تو ہم تیرے سامنے ہتھیار ڈال دیں گے۔“ ⁴قاصد ساؤل کے جِبعہ میں پہنچے اور لوگوں کو سارا ماجرا سنایا، تو وہ سب بلند آواز سے رونے لگے۔

⁵اُسی وقت ساؤل اپنے بیلوں کے پیچھے کھیت سے چلا آ رہا تھا۔ اُس نے پوچھا، ”لوگوں کو کیا ہوا ہے؟ وہ کیوں رو رہے ہیں؟“ چنانچہ اُنہوں نے یبیس کے لوگوں کی خبر اُسے سنائی۔ ⁶جب ساؤل نے یہ باتیں سنیں تو ہمارے باپ کا روح زور سے اُس پر نازل ہوا، اور اُس کا غصہ سخت بھڑک اٹھا۔ ⁷اُس نے بیلوں کی ایک جوڑی لے کر اُنہیں ٹکڑے ٹکڑے کیا اور قاصدوں کے ہاتھ سارے اسرائیل کی حدود میں بھیج دیا اور کہلا بھیجا، ”جو کوئی ساؤل اور سموئیل کے پیچھے نہ نکلے، اُس کے بیلوں کے ساتھ ایسا ہی کیا جائے گا۔“ تب ہمارے باپ کا خوف لوگوں پر چھا گیا، اور وہ ایک تن ہو کر نکل آئے۔ ⁸اُس نے بزق میں اُن کو گِنا: تین لاکھ اسرائیلی اور تیس ہزار یہوداہ کے مرد تھے۔ ⁹اُنہوں نے آنے والے قاصدوں سے کہا، ”یبیس جِلعاد کے لوگوں سے کہو کہ کل دھوپ تیز ہونے تک تمہیں چھٹکارا مل جائے گا۔“ قاصدوں نے جا کر یبیس کے لوگوں کو یہ بتایا تو وہ خوش ہوئے۔ ¹⁰یبیس کے لوگوں نے کہا، ”کل ہم تمہارے سامنے ہتھیار ڈال دیں گے۔ جو تمہیں اچھا لگے وہ ہمارے ساتھ کرنا۔“ ¹¹دوسرے دن ساؤل نے لوگوں کو تین دستوں میں تقسیم کیا۔ صبح کے پہر اُنہوں نے لشکرگاہ میں گھس کر عمونیوں کو دن کی دھوپ تیز ہونے تک مارا؛ اور جو بچ رہے وہ ایسے تِتّر بِتّر ہو گئے کہ اُن میں سے دو بھی اکٹھے نہ رہے۔

ہمارے باپ کے حضور بادشاہی کی تجدید

¹²لوگوں نے سموئیل سے کہا، ”وہ کون تھا جس نے کہا تھا کہ ’کیا ساؤل ہم پر سلطنت کرے گا؟‘ اُن آدمیوں کو حوالے کر دو کہ ہم اُنہیں مار ڈالیں۔“

¹³لیکن ساؤل نے کہا، ”آج کے دن کوئی قتل نہ کیا جائے گا، کیونکہ آج ہمارے باپ نے اسرائیل کو نجات بخشی ہے۔“

¹⁴سموئیل نے لوگوں سے کہا، ”آؤ، ہم جِلجال کو چلیں اور وہاں سلطنت کی تجدید کریں۔“ ¹⁵چنانچہ سب لوگ جِلجال کو گئے اور وہاں ہمارے باپ کے حضور ساؤل کو بادشاہ بنایا۔ وہاں اُنہوں نے ہمارے باپ کے حضور سلامتی کی قربانیاں چڑھائیں، اور ساؤل اور اسرائیل کے سب مرد بہت خوش ہوئے۔