زمونږ پلار د ساؤل په وسيله اِسرائيل خلاصوى

ناحاش يابيش جلعاد ته د هرې ښۍ سترګې په بيه سوله وړاندې کړه. ساؤل، چې د خبر رسېدو پر مهال يې قلبه کوله، روح ونيو، خپل غوايان يې ټوټې ټوټې کړل ترڅو اسرائيل راوبلي، او تر سهاره يې عمونيان مات کړل. هغه د خپلو نيوکه کوونکو له وژلو انکار وکړ: نن زموږ پلار ژغورنه راوړه.

څپرکی 11.

نو ناحاش عمونى راغلو او د يبيش جِلعاد په مقابله کښې يې خېمې ودرولې. د يبيش ټولو خلقو ناحاش ته ووئيل چې، ”زمونږ سره لوظ وکړه، نو مونږ به ستا خدمت کوو.“

ناحاش عمونى جواب ورکړو چې، ”زۀ به تاسو سره په دې شرط لوظ وکړم چې د هر يو ښى سترګه به درباسم او په ټول اِسرائيل باندې به بدنامى راولم.“

د يبيش مشرانو هغۀ ته ووئيل چې، ”مونږ ته اووۀ ورځې مُهلت راکړه چې د ټول اِسرائيل په علاقه کښې قاصدان ولېږو. کۀ چا مونږ خلاص نۀ کړو، نو مونږ به تا ته تسليم شُو.“ قاصدان د ساؤل جِبعه ته ورسېدل او خلقو ته يې د پېښې خبر ورکړو، نو ټولو په لوړ آواز وژړل.

هم په دغه وخت ساؤل د خپلو غوايانو نه وروستو د پټى نه راغلو. هغۀ وپوښتل چې، ”خلقو ته څۀ شوى دى؟ ولې ژاړى؟“ نو هغوئ ورته د يبيش د خلقو خبر ورکړو. کله چې ساؤل دا خبرې واورېدلې، نو د زمونږ پلار روح په هغۀ باندې په زور سره راغلو او د هغۀ غصه ډېره زياته شوه. هغۀ د غوايانو يوه جوړه واخسته، ټوټې ټوټې يې کړل او د قاصدانو په وسيله يې د ټول اِسرائيل په علاقه کښې ولېږل چې، ”څوک چې د ساؤل او سموئيل په پسې رانۀ وزى، د هغۀ غوايانو سره به همدغسې کيږى.“ نو د زمونږ پلار وېره په خلقو باندې راغله او هغوئ د يو سړى په شان راووتل. هغۀ هغوئ په بازق کښې وشمارل، درې لکه اِسرائيلى او دېرش زره د يهوداه سړى وُو. هغوئ هغه قاصدانو ته چې راغلى وُو ووئيل چې، ”د يبيش جِلعاد خلقو ته ووايئ چې، سبا به تاسو ته د لمر د تودوخې په وخت کښې خلاصون درکړے شى.“ قاصدان لاړل او د يبيش خلقو ته يې خبر ورکړو، نو هغوئ خوشحاله شول. د يبيش خلقو ووئيل چې، ”سبا به مونږ تا ته تسليم شُو. چې څۀ دې خوښه وى، هغه زمونږ سره وکړه.“ بله ورځ ساؤل خلق په درېو ډلو وويشل. د سحر په وخت کښې هغوئ د دوښمن په خېمو کښې ننوتل او عمونيان يې د ورځې د تودوخې پورې ووژل. څوک چې پاتې شول هغه داسې تِت پِرک شول چې دوه کسان هم يو ځائ پاتې نۀ شول.

د زمونږ پلار په مخکښې بادشاهى بيا نوې شوه

خلقو سموئيل ته ووئيل چې، ”چا وئيل چې، ’آيا ساؤل به زمونږ بادشاهى کوى؟‘ هغه خلق مونږ ته راحواله کړه، مونږ به هغوئ ووژنو.“

خو ساؤل ووئيل چې، ”نن به هيڅوک ونۀ وژلے شى، ځکه چې نن زمونږ پلار اِسرائيل ته خلاصون راوړو.“

سموئيل خلقو ته ووئيل چې، ”راشئ چې جِلجال ته لاړ شُو او هلته بادشاهى بيا نوې کړو.“ ټول خلق جِلجال ته لاړل او هلته يې د زمونږ پلار په حضور کښې ساؤل بادشاه کړو. هلته هغوئ د زمونږ پلار په حضور کښې د سلامتۍ قربانۍ وکړې، او ساؤل او د اِسرائيل ټول سړى ډېر خوشحاله شول.