ኣቦና ንእስራኤል ብሳኦል ኣቢሉ የድሕኖ

ናዖስ ንኢያቢስ ገለዓድ ነፍሲ ወከፍ የማናይ ዓይኖም ብምንቛር ሰላም ኣቕረበሎም። ሳኦል እቲ ወረ ምስ መፀ ደድሕሪ ኣብዑሩ ኻብ ግራ ይመፅእ ነበረ፤ መንፈስ ኣቦና ኣብ ልዕሊኡ ወረደ፥ ንኣብዑሩ ቘራሪፁ ንእስራኤል ፀውዐ፥ ንደቂ ኣሞን ድማ ክሳዕ ንግሆ ሰዓሮም። ነቶም ዝነቐፍዎ ኽቐትል ኣበየ፦ ኣቦና ሎሚ ንእስራኤል ኣድሒኑ።

ምዕራፍ 11።

ሽዑ ናዖስ በዓል ኣሞን ደዪቡ ኣብ ኢያቢስ ገለዓድ ሰፈረ። ኵሎም ሰብ ኢያቢስ ድማ ንናዖስ “ምሳና ኺዳን ተኣታቶ፥ ንሕናውን ክንግዛአልካ ኢና” በልዎ።

ናዖስ በዓል ኣሞን ድማ “ብኸምዙይ ኺዳን ምሳኻትኩም ክኣቱ እየ፦ ናይ ነፍሲ ወከፍ የማናይ ዓይኒ ክነቍር፥ ኣብ ልዕሊ ኵሉ እስራኤልውን ውርደት ከምፅእ እየ” ኢሉ መለሰ።

ዓበይቲ ኢያቢስ ድማ “ናብ ኵሉ ወሰን እስራኤል ልኡኻት ክንሰድድ ሸውዓተ መዓልቲ ሃቡና፤ ዘድሕነና እንተ ዘይተረኽበ ኸዓ፥ ናባኻ ክንወፅእ ኢና” በልዎ። እቶም ልኡኻት ናብ ጊብዓ ሳኦል በፂሖም፥ ነቲ ዝኾነ ነገር ነቶም ህዝቢ ነገርዎም፤ ኵሎም ድማ ዓው ኢሎም በኸዩ።

ሽዑ ሳኦል ደድሕሪ ኣብዑሩ ኻብ ግራ መፀ፤ “ነዞም ህዝቢ እንታይ ኴኖም? ስለ ምንታይከ ይበኽዩ ኣለዉ?” ድማ በለ። ንሳቶም ከዓ ነቲ ወረ ሰብ ኢያቢስ ነገርዎ። ሳኦል እዘን ቃላት እዚኣተን ምስ ሰምዐ፥ መንፈስ ኣቦና ኣብ ልዕሊኡ ወረደ፤ ኵራኡ ድማ የመና ነደደ። ፅምዲ ኣብዑር ወሲዱ ድማ በብኽፍሉ ቘራረፆም፤ ብልኡኻት ኣቢሉ ኸዓ ናብ ኵሉ ወሰን እስራኤል ሰዲዱ ከምዙይ በለ፦ “ደድሕሪ ሳኦልን ሳሙኤልን ዘይወፀ ዘበለ፥ ኣብዑሩ ኸምዙይ ክግበር እዩ።” ሽዑ ፍርሓት ኣቦና ኣብ ልዕሊ እቲ ህዝቢ ወደቐ፤ ከም ሓደ ሰብ ኮይኖም ድማ ወፁ። ኣብ ቤዜቅ ድማ ቈፀሮም፤ ደቂ እስራኤል ሰለስተ ሚእቲ ሺሕ፥ ሰብ ይሁዳ ኸዓ ሰላሳ ሺሕ ነበሩ። ነቶም ዝመፁ ልኡኻት ድማ ከምዙይ በልዎም፦ “ንሰብ ኢያቢስ ገለዓድ ‘ፅባሕ ፀሓይ ምስ ረስነት፥ ምድሓን ክትረኽቡ ኢኹም’ በልዎም።” እቶም ልኡኻት ከዓ ኸይዶም ንሰብ ኢያቢስ ነገርዎም፤ ንሳቶም ድማ ተሓጐሱ። ሰብ ኢያቢስ ድማ “ፅባሕ ናባኻ ክንወፅእ ኢና፤ ከምቲ ዝሰናኣካ ዘበለ ኸዓ ግበረልና” በሉ። ንፅባሒቱ ድማ ሳኦል ነቲ ህዝቢ ኣብ ሰለስተ ኽፍሊ መቐሎም፤ ኣብ ሓለዋ ወጋሕታ ኸዓ ናብ ሰፈር ኣትዮም ንደቂ ኣሞን ክሳዕ ሃሩር መዓልቲ ቀተልዎም። እቶም ዝተረፉ ድማ ክልተ ኾይኖም ሓቢሮም ከይተረፉ ፋሕ በሉ።

እቲ መንግስቲ ኣብ ቅድሚ ኣቦና ተሓደሰ

እቲ ህዝቢ ድማ ንሳሙኤል “‘ሳኦል ኣብ ልዕሌና ኽነግስዶ እዩ?’ ኢሉ ዝበለ መን እዩ? ነቶም ሰባት ኣምፅኡልና፥ ክንቀትሎም ኢና” በልዎ።

ሳኦል ግና “ኣቦና ሎሚ ንእስራኤል ኣድሒኑ እዩ እሞ፥ ሎሚ ሓደ እኳ ኣይቕተልን እዩ” በለ።

ሳሙኤል ድማ ነቲ ህዝቢ “ንዑ፥ ናብ ጌልገላ ንኺድ እሞ ኣብኣ ነቲ መንግስቲ ንሓድሶ” በሎም። ኵሉ እቲ ህዝቢ ድማ ናብ ጌልገላ ኸይዱ፥ ኣብኣ ኣብ ቅድሚ ኣቦና ንሳኦል ኣንገስዎ። ኣብኣ ኸዓ ኣብ ቅድሚ ኣቦና መስዋእቲ ምስጋና ሰውኡ፤ ሳኦልን ኵሎም ሰብ እስራኤልን ድማ የመና ተሓጐሱ።