1 Wungnaobing 8

8 ¹Chiwui thili Solomonna Israelwui khararnaobing, shang-shangwui wungva̱bing, kala Israelnaobingwui avāva̱ ngarā shimkhurwui khararabing saikorali, Jerusalemli awunga Solomonwui mangāli, Davidwui keinung chiya Zionwui eina ithumwui Avāwui tuingashitwui oko chi akhui khavai kazipkhui. ²Chieina Israelwui mibing saikora Ethanim kachāng, chiya kashine kachāngwui phanitli awunga Solomonli rākazipa. ³Israelwui khararnaobing saikora rā tharan, pāngmonbingna oko chi khuikā, ⁴Pāngmonbing eina Levinaobingna ithumwui Avāwui oko, kazip khavai kachonshim, kala kachonshim alungli khalei kathara khorkhong saikora chi khuiphunga. ⁵Awunga Solomon kala awuili ngasoda rākazip Israelwui yarui saikorana okowui mangāli nganingda, yaola seila mashānkharar mashingkharar kachungkha pha̱phayai. ⁶Chithāda pāngmonbingna ithumwui Avāwui tuingashit oko chi awui pam, tharmathengmeikap kaje shimwui alunga katharapamli khuikāda, cherubimwui angachāng azingli haihai. ⁷Cherubim china okowui pam tungli angachāng hārkahaida, okola thingphānbinglila atungwui eina farora. ⁸Thingphān chi sangnāhaida, alunga mangāli khalei katharapam eina atung theizanga, kha ayarshong eina matheimana; kala chi pamli aja tāshungda leichingra. ⁹Israelnaobing Egypt ngaleiwui eina thānkashok atamli ithumwui Avāna athumli tuingashit kasā Horebli Mosesna sanghaikasā lungphek khani maningla, oko chiwui alungli khikha akhala masanghaimana. ¹⁰Pāngmonbing katharapamwui eina thānshok tharan, muiyāna ithumwui Avāwui shim chi pemhaowa, ¹¹Chieina muiyā chiwui vang pāngmonbingna nganingda otram sākhavai mangatha̱mana; kaja ithumwui Avāwui tekhamateina awui shim chi pemhaowa.

¹²Chiwui thili Solomonna hānga: "Ithumwui Avāna tangkhamang kashā alungli pamra da hānghaisai. ¹³Ina kachangkhata na mashimānda pamkhavai pam, tekhamatei shim akha nawui vang sākāhaira."

¹⁴Israelwui yarui saikora nganingda leilakha, awungana ngareiungda Israelwui yarui saikorali somi. ¹⁵Ana hānga: "Akhalattawui khamor eina ishavā Davidli hāngkahai chi akhalattawui pāng eina ungshungmi kahai Israelwui Vare ithumwui Avāli sochikatranu; ana hithada hānga, ¹⁶Iwui mi Israelli Egyptwui eina thānshok atamwui eina, Israel shang saikorali shim sākhavai iwui mingwui vang keinung akha makapangkhuimana; kha iwui yur Israelwuitungli mungkhavai David chi kapangkhuihaira.

¹⁷Israelwui Vare ithumwui Avāwui ming vang shim akha sākhavai ishavā Davidwui ningli leisai.

¹⁸Kha ithumwui Avāna narao ishāvā Davidli hānga, 'Iwui ming leikhavai shim akha sākā chi nawui ningli leisai; nawui ningli chi leikahai chila nana kaphā sai. ¹⁹Kha na khalattana shim chi masākāmara; kha nawui phasā eina kharā nawui nao china iwui ming leikhavai shim chi sākāra.'

²⁰Kala ithumwui Avāna awui hāngkahai tui chini ungshungphangkasaira; ishāvā Davidwui pam eina ina thuiluikasaida, awui ngashit sākahai athishurda Israelwui wungpamli pamda lei, kala Israelwui Vare ithumwui Avāwui ming leikhavai ina shim akha sākhuihaira. ²¹Chili ina, ithumwui Avāna ithumwui avā ngarāli Egyptwui eina thānshok tharan athumli sākahai tuingashit chi leikahai oko chiwui vang apam akha sākhui."

Avāwui Mangāli Solomonwui Seihā Kasā

²²Solomonna ithumwui Avāwui hanphut mangāli, Israel katonga kakazip chiwui mangāli nganinga, kala kazingramshong awui pāng khāngkāhaowa. ²³Ana hānga: "Ithumwui Avā, Israelwui Vare, kazingram atungshongla okathui azingshongla na kathā Vare katei maleimana, na mangāli ningtongda zata nawui raobingli tuingashit kala makhangachei leikashi mayonmi; ²⁴Nana narao ishāvā Davidli ngashit kahai chi mayonhaira; nawui khamorna hāngkahai chi, aja nawui pāngna ungshungmihaira.

²⁵Chiwui vang eina ara, ithumwui Avā, Israelwui Vare, narao ishāvā Davidli nana, 'Nawui naomayarabingna, na iwui mangāli zatkahai thāda iwui mangāli zatkhavai athumwui apong nganātitkhuiakha, Israelwui wungpamkhongli iwui mangāli kapama, nawui mahut mi mavātlakmara,' da ngashit kahai chi phaningungmichinglu. ²⁶Kala ara, ithumwui Avā, Israelwui Vare, narao ishāvā Davidli nana hāngkahai tui chi ungshungmilu.

²⁷Kha ithumwui Avāna okathuili kachangkhat ngasopamkachangrala? Yanglu, kazingram kala juikhamatai kazingramnakha na chi teonai; chieina ina sāhaikahai shim hina kayākhakha teomei! ²⁸Chithālala, iwui Avā, narao iwui seihā kasā kala kapoli phaninglu; aja narao iwui nawui mangāli seihā sāda kapo, iwui khangakao kala seihā kasā chi kashāmilu.

²⁹'Iwui ming apam chili leira,' da nana hāngkahai shim hishong nawui mik ngayā ngashun kathei sāda leiranu; apam hishong narao iwui seihā sāda kapo chi kashāmilu. ³⁰Narao iwui kala nawui yur Israelnaobingna apam hishong seihā sāda kapo chi kashāmilu; nawui pamkhavai kazingram eina kashāmilu, kala nana kashā tharan, kapheomilu.

³¹Kachikathā mi akhana awui khongnainaoli morei sāda, ngashit sāphalungra, shim hili nawui hanphut mangāli mingzai khavai kharā tharan, ³²chithākha kazingram eina kashāmilu, ot sāmilu. Nawui raobingli bichar sāmilu: khayonali yonngasaka, awui apong chi awui kuiwui tungli phungngasaka, kala khamashungali mashunga da shānkhuida, awui khamashung khangarongwui athishurda sāman milu.

³³Nawui yur Israelnaobingna nali morei sākahaiwui vang, yangkashena athumli yuihaida tharan, chithākha nashong latluida, nawui ming hāngphata, kala shim hili seihā sāda nali kapo tharan, ³⁴chithākha kazingram eina kashāmilu, nawui yur Israelnaobingwui morei pheomida, nana athumwui avā ngarāli mikahai ngaleili athumli latunngasakmilu.

³⁵Athumna nawui mangāli morei sākahaiwui vang kazing shungkhamhaida kazing maromila, kala athumna shim hishong ngareiungda seihā sāda, namingli hāngphata, kala nana rekakharek tharan athum moreiwui eina ngareiungakha, ³⁶nana kazingramli shākāmida, narao, nawui mi Israelwui morei chi kapheomilu; athumna kazatkhavai lam kaphā chi nana tamchitheihai tharan, nawui mibingli shimlui khavai mikahai nawui ngaleili kazing rommilu.

³⁷Ngalei chili zāt kasak rā tharan nilala, sākazat nilala, majing katāk kala zingkumshāt nilala, khaoh kala khaohsomna shimān khangasak nilala; yangkashena athumwui ngavei mirinli kuinamda hairai nilala; mimaokaza̱ khangatatei kazātyur kakazā atamda nilala, ³⁸mi akhana nilala, nawui mi Israel saikorana nilala, kachiva̱na akhalattawui ningwui kakhanang theida, shim hishong ngareiungda pāng katingda, nali seihā saakha; ³⁹nawui pam kazingramli shākāmida, kapheomilu, kala sāmilu; kala mi kachiva̱li kachichāwui apong saikora athishurda milu; kaja nana awui ning thei, namāngna miwui naomayara ngarā kachiva̱wui ning katheina; ⁴⁰chithāda nana ithumwui avāva̱ ngarāli mikahai ngalei chitungli athum ringda leilakha, nali ngacheera.

⁴¹Chi tākam eina, nawui mi Israel makhaninga yur katei akha, kha namingwui vang eina ngalei katāva̱wui eina rākahaina, ⁴²kaja athumna nawui ming reikhamatai chi, nawui pangshap kahai pāng kala khāngkā kahai pāng chiwui pao shāra; ana rālaga shim hishong seihā kasā tharan, ⁴³nawui pam kazingramli shākāmida, kala yur kateina khangakao saikora chi sāmilu; chithāda nawui mi Israelnaobing thāda, okathuili khalei miyur saikorana namingli theida nali ngacheera, kala ina sākahai shim hina naming leihai kaji chi theira.

⁴⁴Nawui mibingna athumwui yangkashebingli rai sākhavai zatphok tharan, nana athumli chihovā apong kachiva̱li, kala nana hākhui kahai keinung kala namingwui vang ina sākahai shim hishong ngareiungda ithumwui Avāli seihā sā tharan, ⁴⁵athumwui seihā kasā kala kapo chi nana kazingramli shākāmida athumli khangachonmilu.

⁴⁶Athumna nashong morei sāda—kaja morei makasā mi akhala maleimana—chieina nana malungvāthaida athumli yangkashewui pāngli horsangmihaida, ana athumli yangkashewui ngaleili tālala nailala tukthuihaiakha;

⁴⁷chithālala athumli tukvā kahai ngalei chili athumna ning ngateida, kala ngareiungda tukkakhuibingwui ngaleili nali kapona, "Ithumna morei sāhaira, khangui ot sāhaira, makhayāwui ot sāhaira," da hāngakha; ⁴⁸kala athumli tukkakhuibingwui ngaleili leilakha, ning saikora kala manglā saikora eina nali ngareiungda, kala nana athumwui avāva̱ ngarāli mikahai ngalei chishong, nana hākhui kahai keinung, kala namingwui vang ina sākahai shim hishong ngareiungda seihā saakha, ⁴⁹nawui pam kazingramli shākāmida, athumwui seihā kasā kala kapo chi shāmida, athumli khangachonmilu; ⁵⁰nawui mangāli morei kasā nawui mibing chili pheomilu, nali khayon kasā athumwui salāng saikora chila pheomilu; kala tukkakhuibingwui mangāli athumli lumashan samphang ngasakmilu, chithāda tukkakhuibing china athumli lumashanmiranu; ⁵¹kaja athumna nana Egyptwui eina, mari sharkha̱wui eina khuishokmi kahai nawui mibing kala nawui shimluina. ⁵²Naraowui kapo kala nawui mi Israelwui kapo chili nawui mik kathei sāda leiranu, kala athumna nali ngakao chitharan shāmiranu. ⁵³Kaja, O Proho Avā, ithumwui shāvā ngarāli Egyptwui eina nana khuirā tharan, nawui rao Moses eina nana hāngkahai athishurda, nana athumli okathuiwui mi saikorawui eina nawui shimlui khavai phaishok ngateihaira."

Solomonna Kazip Katongali Somi

⁵⁴Solomonna ithumwui Avāli seihā kasā kala kapo saikora hi pheikupchanghailaga, ana pāng kazingramshong khāngkāda khuktizanglaga ithumwui Avā hanphutwui mangāwui eina ngakarthuiya. ⁵⁵Ana nganinglaga akhon panglāk eina Israel kazip katongali somida hithāda hānga:

⁵⁶"Awui ngashit kahai athishurda awui mi Israelli ngasāmkakhui mikahai ithumwui Avāli soranu! Awui rao Moses eina ngashit kahai kaphā saikorawui eina, tui akha lah manganaithuimana. ⁵⁷Ithumwui Avā ithumwui shāvā ngarāli ngasomi kahai thāda ithumli ngasomiranu; ana ithumli horchao kahai masāmara, mahorhaimara, ⁵⁸awui shongfa saikorali zatkhavai, kala ithumwui shāvā ngarāli ana kaso kahai awui ningkhami, ain, kala bichar mayon khavai, ana ithumwui ning awuishong ngareiung ngasakranu. ⁵⁹Kala ithumwui Avā mangāli ina kapo sāda iwui tui hi, ngashun ngayā awuili nganailakhaoranu, chiwui vang ana awui rao kala awui mi Israelwui mashun thangkachiwui kaji athishurda khangachonmiranu, ⁶⁰chithāda okathuiwui mi saikorana ithumwui Avā chi Varelaka, kala khangatei maleimana da theira.

⁶¹Chiwui vang eina, aja thada awui ainli kazata kala awui ningkhami mayonda, nathumna ithumwui Avāli ningtongda phaninglu."

Avāli Tharchigat Kahai Shim

⁶²Chiwui thili awunga kala awungali ngasoda Israel saikorana ithumwui Avā mangāli pha̱kaphayā chigata. ⁶³Solomonna ithumwui Avāli ningyatchigat, mukvā 22,000 kala yao 120,000 chigata. Chithāda sāda awunga kala Israelnaobing saikorana ithumwui Avā shim chi tharchigata. ⁶⁴Chithang ngalāngda awungana ithumwui Avā shim mangāli khalei yāngkhupwui alungshong chi tharchigata; kaja apam chili ana rikkatā kachigat, tharāzāt kachigat, kala ningyatchigatwui athao chigata, kaja ithumwui Avā mangāli khalei pithraiwui hanphut chi rikkatā kachigat, tharāzāt kachigat, kala ningyatchigatwui athao ngazinahaida mapha̱paithuwa.

⁶⁵Chieina Hamath zangkhavai eina Egypt Kong tāshungda khalei haklak kahai kazip, Israel saikora awungali ngasoda, Solomonna ithumwui Avā mangāli ngashun shinithang, chieina tharāluishitta shinithang phanit sai; katonga ngashun tharāda matina. ^a a v65 Hamath vāzang khavai atungshong katāva̱li kala Egypt Kong khamazeshong katāva̱li ngalei chiwui shongzā katonga chutkakhuina, chiwui vang Israelwui apam saikorawui eina mibing rāsera. ⁶⁶Kachishatathang ana mibingli shiunserhaowa. Athumna awungali somida, awui rao David kala awui mi Israelli ithumwui Avā kaphā sākhamiwui vang ringphāhaoda ning mathānda kachichāwui kachonshimli unghaowa.