ନିୟମ-ସିନ୍ଦୁକ ପିତାଙ୍କ ଗୃହକୁ ଆସେ

ସିନ୍ଦୁକ ଭିତରକୁ ଅଣାଯାଏ, ମେଘ ଯାଜକମାନଙ୍କୁ ବାହାରକୁ ଘଉଡ଼ାଇ ଦିଏ, ଏବଂ ଶଲୋମନ ଏପରି ଗୃହ ପାଇଁ ପ୍ରାର୍ଥନା କରନ୍ତି ଯାହା ଆମ ପିତାଙ୍କୁ ଧାରଣ କରିପାରିବ ନାହିଁ ବୋଲି ସେ ସ୍ୱୀକାର କରନ୍ତି। ସେ ମୁଖ୍ୟତଃ ଗୋଟିଏ କଥା ମାଗନ୍ତି: ଇସ୍ରାଏଲ ପାପ କଲେ, ପରାଜିତ ହେଲେ, କିମ୍ବା ବନ୍ଦୀ ହୋଇ ନିଆଗଲେ, ଶୁଣନ୍ତୁ ଓ କ୍ଷମା କରନ୍ତୁ।

ଅଧ୍ୟାୟ 8।

ସେତେବେଳେ ଶଲୋମନ ଇସ୍ରାଏଲର ପ୍ରାଚୀନବର୍ଗଙ୍କୁ, ଅର୍ଥାତ୍‍ ବଂଶସମୂହର ସମସ୍ତ ମୁଖ୍ୟଙ୍କୁ ଓ ଇସ୍ରାଏଲ-ସନ୍ତାନମାନଙ୍କ ପିତୃବଂଶସମୂହର ଅଧିପତିମାନଙ୍କୁ ଦାଉଦ-ନଗର, ଅର୍ଥାତ୍‍ ସିୟୋନରୁ ପିତାଙ୍କ ନିୟମ-ସିନ୍ଦୁକ ଆଣିବା ନିମନ୍ତେ ଯିରୂଶାଲମରେ ରାଜା ଶଲୋମନଙ୍କ ନିକଟରେ ଏକତ୍ର କଲେ। ତେଣୁ ଇସ୍ରାଏଲର ସମସ୍ତ ଲୋକ ସପ୍ତମ ମାସ ଏଥନୀମ୍‍ ମାସର ପର୍ବ ସମୟରେ ରାଜା ଶଲୋମନଙ୍କ ନିକଟରେ ଏକତ୍ର ହେଲେ। ଯେତେବେଳେ ଇସ୍ରାଏଲର ସମସ୍ତ ପ୍ରାଚୀନବର୍ଗ ଆସିଲେ, ସେତେବେଳେ ଯାଜକମାନେ ସିନ୍ଦୁକ ଉଠାଇଲେ, ପୁଣି ସେମାନେ ପିତାଙ୍କ ସିନ୍ଦୁକ, ସମାଗମ-ତମ୍ବୁ ଓ ତମ୍ବୁ ମଧ୍ୟସ୍ଥିତ ସମସ୍ତ ପବିତ୍ର ପାତ୍ର ଆଣିଲେ; ଯାଜକ ଓ ଲେବୀୟମାନେ ସେହିସବୁ ଆଣିଲେ। ପୁଣି ରାଜା ଶଲୋମନ ଓ ତାହାଙ୍କ ସହିତ ଏକତ୍ରିତ ଇସ୍ରାଏଲର ସମଗ୍ର ସମାଜ ସିନ୍ଦୁକ ସମ୍ମୁଖରେ ଠିଆ ହୋଇ ଅଗଣିତ ଓ ଅସଂଖ୍ୟ ମେଷ ଓ ଗୋରୁ ବଳିଦାନ କଲେ। ତହିଁ ଉତ୍ତାରେ ଯାଜକମାନେ ପିତାଙ୍କ ନିୟମ-ସିନ୍ଦୁକ ତାହାର ସ୍ଥାନକୁ, ଅର୍ଥାତ୍‍ ଗୃହର ଅନ୍ତଃସ୍ଥିତ ମହାପବିତ୍ର ସ୍ଥାନକୁ କିରୂବମାନଙ୍କ ପକ୍ଷ ତଳେ ଆଣିଲେ। କାରଣ କିରୂବମାନେ ସିନ୍ଦୁକର ସ୍ଥାନ ଉପରେ ଆପଣାମାନଙ୍କ ପକ୍ଷ ପ୍ରସାରି ସିନ୍ଦୁକ ଓ ତାହାର ସାଙ୍ଗିକୁ ଉପରୁ ଆଚ୍ଛାଦନ କଲେ। ସେହି ସାଙ୍ଗିସବୁ ଏତେ ଲମ୍ବା ଥିଲା ଯେ ତହିଁର ମୁଣ୍ଡ ଅନ୍ତଃକୋଠରୀ ସମ୍ମୁଖସ୍ଥ ପବିତ୍ର ସ୍ଥାନରୁ ଦେଖାଯାଉଥିଲା, ମାତ୍ର ବାହାରୁ ଦେଖାଯାଉ ନ ଥିଲା; ଆଉ ସେହିସବୁ ଆଜି ପର୍ଯ୍ୟନ୍ତ ସେଠାରେ ଅଛି। ଇସ୍ରାଏଲ-ସନ୍ତାନମାନେ ମିସର ଦେଶରୁ ବାହାର ହୋଇ ଆସିବା ସମୟରେ ହୋରେବରେ ପିତା ସେମାନଙ୍କ ସହିତ ଯେଉଁ ନିୟମ ସ୍ଥାପନ କଲେ, ସେଠାରେ ମୋଶା ଯେଉଁ ଦୁଇ ପ୍ରସ୍ତର-ପଟା ରଖିଥିଲେ, କେବଳ ସେହି ଦୁଇ ପଟା ସିନ୍ଦୁକ ମଧ୍ୟରେ ଥିଲା। ଯାଜକମାନେ ପବିତ୍ର ସ୍ଥାନରୁ ବାହାରି ଆସନ୍ତେ, ମେଘ ପିତାଙ୍କ ଗୃହ ପରିପୂର୍ଣ୍ଣ କଲା, ତେଣୁ ସେହି ମେଘ ସକାଶୁ ଯାଜକମାନେ ସେବାକାର୍ଯ୍ୟ କରିବା ନିମନ୍ତେ ଠିଆ ହୋଇ ପାରିଲେ ନାହିଁ, କାରଣ ପିତାଙ୍କ ମହିମା ତାହାଙ୍କ ଗୃହ ପରିପୂର୍ଣ୍ଣ କରିଥିଲା।

ସେତେବେଳେ ଶଲୋମନ କହିଲେ, “ଆମ୍ଭମାନଙ୍କ ପିତା ଘୋର ଅନ୍ଧକାରରେ ବାସ କରିବେ ବୋଲି କହିଅଛନ୍ତି। ମୁଁ ନିଶ୍ଚୟ ତୁମ୍ଭ ନିମନ୍ତେ ଗୋଟିଏ ଉନ୍ନତ ଗୃହ ନିର୍ମାଣ କରିଅଛି, ତୁମ୍ଭ ଅନନ୍ତକାଳ ବାସ କରିବାର ଏକ ସ୍ଥାନ।”

ଏଉତ୍ତାରେ ରାଜା ବୁଲି ପଡ଼ି ଇସ୍ରାଏଲର ସମଗ୍ର ସମାଜକୁ ଆଶୀର୍ବାଦ କଲେ, ପୁଣି ଇସ୍ରାଏଲର ସମଗ୍ର ସମାଜ ଠିଆ ହୋଇ ରହିଲେ। ଆଉ ସେ କହିଲେ, “ଇସ୍ରାଏଲର ଈଶ୍ଵର ଆମ୍ଭମାନଙ୍କ ପିତା ଧନ୍ୟ ହେଉନ୍ତୁ, ଯେ ଆପଣା ମୁଖରେ ମୋʼ ପିତା ଦାଉଦଙ୍କୁ ଏହି କଥା କହିଥିଲେ ଓ ଆପଣା ହସ୍ତରେ ତାହା ସଫଳ କଲେ, ଯଥା, ଆମ୍ଭେ ଆପଣା ଲୋକ ଇସ୍ରାଏଲକୁ ମିସରରୁ ବାହାର କରି ଆଣିବା ଦିନଠାରୁ ଆମ୍ଭ ନାମ ନିମନ୍ତେ ଏକ ଗୃହ ନିର୍ମାଣ କରିବା ପାଇଁ ଇସ୍ରାଏଲର ସମସ୍ତ ବଂଶ ମଧ୍ୟରୁ କୌଣସି ନଗର ମନୋନୀତ କଲୁ ନାହିଁ; ମାତ୍ର ଆପଣା ଲୋକ ଇସ୍ରାଏଲ ଉପରେ ଦାଉଦଙ୍କୁ ମନୋନୀତ କଲୁ।

ଇସ୍ରାଏଲର ଈଶ୍ଵର ଆମ୍ଭମାନଙ୍କ ପିତାଙ୍କ ନାମ ନିମନ୍ତେ ଏକ ଗୃହ ନିର୍ମାଣ କରିବାକୁ ମୋʼ ପିତା ଦାଉଦଙ୍କ ମନରେ ଇଚ୍ଛା ଥିଲା।

ମାତ୍ର ଆମ୍ଭମାନଙ୍କ ପିତା ମୋʼ ପିତା ଦାଉଦଙ୍କୁ କହିଲେ, ‘ଆମ୍ଭ ନାମ ନିମନ୍ତେ ଏକ ଗୃହ ନିର୍ମାଣ କରିବାକୁ ତୁମ୍ଭ ମନରେ ଇଚ୍ଛା ଥିବାରୁ, ତୁମ୍ଭେ ତାହା ମନରେ ରଖି ଭଲ କଲ। ତଥାପି ତୁମ୍ଭେ ନିଜେ ସେହି ଗୃହ ନିର୍ମାଣ କରିବ ନାହିଁ; ମାତ୍ର ତୁମ୍ଭ ଔରସଜାତ ପୁତ୍ର, ସେ ଆମ୍ଭ ନାମ ନିମନ୍ତେ ସେହି ଗୃହ ନିର୍ମାଣ କରିବ।’

ଆଉ ଆମ୍ଭମାନଙ୍କ ପିତା ଆପଣା ଉକ୍ତ ବାକ୍ୟ ସ୍ଥିର କରିଅଛନ୍ତି, କାରଣ ପିତା ଯେପରି ପ୍ରତିଜ୍ଞା କରିଥିଲେ, ସେହିପରି ମୁଁ ମୋʼ ପିତା ଦାଉଦଙ୍କ ପଦରେ ଉତ୍ପନ୍ନ ହୋଇ ଇସ୍ରାଏଲର ସିଂହାସନରେ ଉପବିଷ୍ଟ ହୋଇଅଛି, ପୁଣି ଇସ୍ରାଏଲର ଈଶ୍ଵର ଆମ୍ଭମାନଙ୍କ ପିତାଙ୍କ ନାମ ନିମନ୍ତେ ଏହି ଗୃହ ନିର୍ମାଣ କରିଅଛି। ଆଉ ପିତା ଆମ୍ଭମାନଙ୍କ ପିତୃପୁରୁଷଗଣଙ୍କୁ ମିସରରୁ ବାହାର କରି ଆଣିବା ସମୟରେ ସେମାନଙ୍କ ସହିତ ଯେଉଁ ନିୟମ ସ୍ଥାପନ କଲେ, ତାହା ଧାରଣକାରୀ ସିନ୍ଦୁକ ନିମନ୍ତେ ମୁଁ ସେଠାରେ ଏକ ସ୍ଥାନ ନିରୂପଣ କରିଅଛି।”

ପିତାଙ୍କ ସମ୍ମୁଖରେ ଶଲୋମନଙ୍କ ପ୍ରାର୍ଥନା

ଏଉତ୍ତାରେ ଶଲୋମନ ଇସ୍ରାଏଲର ସମଗ୍ର ସମାଜ ସମ୍ମୁଖରେ ଆମ୍ଭମାନଙ୍କ ପିତାଙ୍କ ଯଜ୍ଞବେଦି ଆଗରେ ଠିଆ ହୋଇ ସ୍ଵର୍ଗ ଆଡ଼କୁ ଆପଣା ହସ୍ତ ପ୍ରସାରି କହିଲେ, “ହେ ଇସ୍ରାଏଲର ଈଶ୍ଵର ଆମ୍ଭମାନଙ୍କ ପିତା, ଉପରିସ୍ଥ ସ୍ଵର୍ଗରେ କି ନୀଚସ୍ଥ ପୃଥିବୀରେ ତୁମ୍ଭ ତୁଲ୍ୟ କୌଣସି ଈଶ୍ଵର ନାହାନ୍ତି; ଯେଉଁମାନେ ଆପଣାମାନଙ୍କ ସମସ୍ତ ଅନ୍ତଃକରଣ ସହିତ ତୁମ୍ଭ ସମ୍ମୁଖରେ ଗମନାଗମନ କରନ୍ତି, ଏପରି ତୁମ୍ଭ ଦାସମାନଙ୍କ ପ୍ରତି ତୁମ୍ଭେ ନିୟମ ଓ ଦୟା ରକ୍ଷା କରୁଅଛ। ତୁମ୍ଭେ ଆପଣା ଦାସ ମୋʼ ପିତା ଦାଉଦଙ୍କ ପ୍ରତି ଆପଣା ପ୍ରତିଜ୍ଞା ରକ୍ଷା କଲ; ତୁମ୍ଭ ମୁଖ ଯାହା କହିଥିଲା, ତାହା ତୁମ୍ଭ ହସ୍ତ ଆଜି ସଫଳ କରିଅଛି।

ଏଣୁ ହେ ଇସ୍ରାଏଲର ଈଶ୍ଵର ଆମ୍ଭମାନଙ୍କ ପିତା, ତୁମ୍ଭେ ଆପଣା ଦାସ ମୋʼ ପିତା ଦାଉଦଙ୍କୁ ଯାହା ପ୍ରତିଜ୍ଞା କରିଥିଲ, ତାହା ତାହାଙ୍କ ପ୍ରତି ରକ୍ଷା କର; ତୁମ୍ଭେ କହିଥିଲ, ‘ତୁମ୍ଭ ସନ୍ତାନମାନେ ତୁମ୍ଭ ପରି ଆମ୍ଭ ସମ୍ମୁଖରେ ଗମନ କରିବା ନିମନ୍ତେ ଯେବେ କେବଳ ଆପଣାମାନଙ୍କ ପଥ ବିଷୟରେ ସାବଧାନ ହୁଅନ୍ତି, ତେବେ ଇସ୍ରାଏଲର ସିଂହାସନରେ ବସିବା ପାଇଁ ଆମ୍ଭ ସମ୍ମୁଖରେ ତୁମ୍ଭର ଲୋକର ଅଭାବ କେବେ ହେବ ନାହିଁ।’ ଏବେ ଏଣୁ ହେ ଇସ୍ରାଏଲର ଈଶ୍ଵର ଆମ୍ଭମାନଙ୍କ ପିତା, ତୁମ୍ଭେ ଆପଣା ଦାସ ମୋʼ ପିତା ଦାଉଦଙ୍କୁ ଯେଉଁ ବାକ୍ୟ କହିଥିଲ, ତାହା ସ୍ଥିର କର।

ମାତ୍ର ଆମ୍ଭମାନଙ୍କ ପିତା କʼଣ ପ୍ରକୃତରେ ପୃଥିବୀରେ ବାସ କରିବେ? ଦେଖ—ସ୍ଵର୍ଗ ଓ ସ୍ଵର୍ଗର ସ୍ଵର୍ଗ ତୁମ୍ଭକୁ ଧରି ପାରେ ନାହିଁ; ତେବେ ମୋʼ ନିର୍ମିତ ଏହି ଗୃହ କେତେ ଅଳ୍ପ ପାରିବ! ତଥାପି ହେ ମୋହର ପିତା, ତୁମ୍ଭେ ଆପଣା ଦାସର ପ୍ରାର୍ଥନା ଓ ନିବେଦନ ପ୍ରତି ମନୋଯୋଗ କର, ଯେପରି ଆଜି ତୁମ୍ଭ ଦାସ ତୁମ୍ଭ ସମ୍ମୁଖରେ ଯେଉଁ କାକୂକ୍ତି ଓ ପ୍ରାର୍ଥନା କରୁଅଛି, ତାହା ତୁମ୍ଭେ ଶୁଣିବ।

ତୁମ୍ଭ ଦୃଷ୍ଟି ଦିବାରାତ୍ର ଏହି ଗୃହ ଆଡ଼କୁ, ଅର୍ଥାତ୍‍ ‘ଆମ୍ଭ ନାମ ସେଠାରେ ରହିବ’ ବୋଲି ତୁମ୍ଭେ ଯେଉଁ ସ୍ଥାନ ବିଷୟରେ କହିଥିଲ, ସେହି ସ୍ଥାନ ଆଡ଼କୁ ଉନ୍ମୁକ୍ତ ରହୁ, ଯେପରି ତୁମ୍ଭେ ଏହି ସ୍ଥାନ ଆଡ଼କୁ ତୁମ୍ଭ ଦାସର ପ୍ରାର୍ଥନା ଶୁଣିବ। ତୁମ୍ଭ ଦାସ ଓ ତୁମ୍ଭ ଲୋକ ଇସ୍ରାଏଲ ଯେତେବେଳେ ଏହି ସ୍ଥାନ ଆଡ଼କୁ ପ୍ରାର୍ଥନା କରିବେ, ସେତେବେଳେ ସେମାନଙ୍କ ନିବେଦନ ଶୁଣ; ତୁମ୍ଭ ବାସସ୍ଥାନ ସ୍ଵର୍ଗରୁ ଶୁଣ, ଆଉ ଯେତେବେଳେ ଶୁଣିବ, ସେତେବେଳେ କ୍ଷମା କର।

ଯଦି କୌଣସି ଲୋକ ଆପଣା ପ୍ରତିବାସୀ ବିରୁଦ୍ଧରେ ପାପ କରେ ଓ ତାହାକୁ ଶପଥ କରିବାକୁ ପଡ଼େ, ପୁଣି ସେ ଆସି ଏହି ଗୃହରେ ତୁମ୍ଭ ଯଜ୍ଞବେଦି ସମ୍ମୁଖରେ ଶପଥ କରେ, ତେବେ ତୁମ୍ଭେ ସ୍ଵର୍ଗରୁ ଶୁଣି କାର୍ଯ୍ୟ କର। ଆପଣା ଦାସମାନଙ୍କର ବିଚାର କରି ଦୋଷୀକୁ ଦୋଷୀ କରି ତାହାର ଆଚରଣ ତାହାରି ମସ୍ତକରେ ବର୍ତ୍ତାଅ, ପୁଣି ଧାର୍ମିକକୁ ନିର୍ଦ୍ଦୋଷ କରି ତାହାର ଧାର୍ମିକତା ଅନୁସାରେ ତାହାକୁ ପ୍ରତିଫଳ ଦିଅ।

ତୁମ୍ଭ ଲୋକ ଇସ୍ରାଏଲ ତୁମ୍ଭ ବିରୁଦ୍ଧରେ ପାପ କରିବାରୁ ଯେବେ ଶତ୍ରୁ ସମ୍ମୁଖରେ ପରାସ୍ତ ହୁଅନ୍ତି, ପୁଣି ପୁନର୍ବାର ତୁମ୍ଭ ଆଡ଼କୁ ଫେରି ତୁମ୍ଭ ନାମ ସ୍ଵୀକାର କରନ୍ତି ଓ ଏହି ଗୃହରେ ତୁମ୍ଭ ନିକଟରେ ପ୍ରାର୍ଥନା ଓ ନିବେଦନ କରନ୍ତି, ତେବେ ତୁମ୍ଭେ ସ୍ଵର୍ଗରୁ ଶୁଣି ଆପଣା ଲୋକ ଇସ୍ରାଏଲର ପାପ କ୍ଷମା କର, ପୁଣି ସେମାନଙ୍କ ପିତୃପୁରୁଷଗଣଙ୍କୁ ଯେଉଁ ଦେଶ ଦେଇଥିଲ, ତହିଁକୁ ସେମାନଙ୍କୁ ଫେରାଇ ଆଣ।

ସେମାନେ ତୁମ୍ଭ ବିରୁଦ୍ଧରେ ପାପ କରିବାରୁ ଯେବେ ଆକାଶ ବନ୍ଦ ହୁଏ ଓ ବୃଷ୍ଟି ନ ହୁଏ, ଆଉ ତୁମ୍ଭେ ସେମାନଙ୍କୁ କ୍ଲେଶ ଦେବା ହେତୁ ସେମାନେ ଏହି ସ୍ଥାନ ଆଡ଼କୁ ପ୍ରାର୍ଥନା କରନ୍ତି, ତୁମ୍ଭ ନାମ ସ୍ଵୀକାର କରନ୍ତି ଓ ଆପଣାମାନଙ୍କ ପାପରୁ ଫେରନ୍ତି, ତେବେ ତୁମ୍ଭେ ସ୍ଵର୍ଗରୁ ଶୁଣି ଆପଣା ଦାସମାନଙ୍କର, ଅର୍ଥାତ୍‍ ତୁମ୍ଭ ଲୋକ ଇସ୍ରାଏଲର ପାପ କ୍ଷମା କର, ଯେତେବେଳେ ତୁମ୍ଭେ ସେମାନଙ୍କ ଗନ୍ତବ୍ୟ ଉତ୍ତମ ପଥ ସେମାନଙ୍କୁ ଶିଖାଇବ; ପୁଣି ତୁମ୍ଭେ ଆପଣା ଲୋକଙ୍କୁ ଅଧିକାରାର୍ଥେ ଯେଉଁ ଦେଶ ଦେଇଥିଲ, ତୁମ୍ଭ ସେହି ଦେଶ ଉପରେ ବୃଷ୍ଟି ପ୍ରେରଣ କର।

ଯେବେ ଦେଶରେ ଦୁର୍ଭିକ୍ଷ ହୁଏ, ଯେବେ ମହାମାରୀ, ଶସ୍ୟର ଧୂଳିଶୋଷ କି କ୍ଷୟରୋଗ, ପଙ୍ଗପାଳ କି କୀଟ ଉପସ୍ଥିତ ହୁଏ; ଯେବେ ସେମାନଙ୍କ ଶତ୍ରୁ ସେମାନଙ୍କ ନଗର-ଦ୍ଵାରରେ ସେମାନଙ୍କୁ ଅବରୋଧ କରେ—ଯେକୌଣସି ମାରୀ କି ଯେକୌଣସି ବ୍ୟାଧି ହୁଏ, ତେବେ ଯେକୌଣସି ବ୍ୟକ୍ତି କିଅବା ତୁମ୍ଭ ସମଗ୍ର ଲୋକ ଇସ୍ରାଏଲ ପ୍ରତ୍ୟେକେ ଆପଣା ଆପଣା ଅନ୍ତଃକରଣର ଯନ୍ତ୍ରଣା ଜାଣି ଏହି ଗୃହ ଆଡ଼କୁ ଆପଣା ହସ୍ତ ପ୍ରସାରି ଯେକୌଣସି ପ୍ରାର୍ଥନା କି ନିବେଦନ କରନ୍ତି, ତେବେ ତୁମ୍ଭେ ଆପଣା ବାସସ୍ଥାନ ସ୍ଵର୍ଗରୁ ଶୁଣି କ୍ଷମା କର ଓ କାର୍ଯ୍ୟ କର, ପୁଣି ପ୍ରତ୍ୟେକ ଜଣକୁ ତାହାର ସମସ୍ତ ଆଚରଣ ଅନୁସାରେ ଫଳ ଦିଅ, କାରଣ ତୁମ୍ଭେ ତାହାର ଅନ୍ତଃକରଣ ଜାଣ—କେବଳ ତୁମ୍ଭେ ହିଁ ସମସ୍ତ ମନୁଷ୍ୟ-ସନ୍ତାନର ଅନ୍ତଃକରଣ ଜାଣ, ଯେପରି ତୁମ୍ଭେ ଆମ୍ଭମାନଙ୍କ ପିତୃପୁରୁଷଗଣଙ୍କୁ ଯେଉଁ ଦେଶ ଦେଇଥିଲ, ତହିଁ ଉପରେ ସେମାନେ ବଞ୍ଚିଥିବା ସମସ୍ତ ଦିନ ତୁମ୍ଭକୁ ଭୟ କରିବେ।

ଆହୁରି ମଧ୍ୟ, ତୁମ୍ଭ ଲୋକ ଇସ୍ରାଏଲର ନ ହୋଇ ଯେଉଁ ବିଦେଶୀ ଲୋକ ତୁମ୍ଭ ନାମ ସକାଶୁ ଦୂର ଦେଶରୁ ଆସେ, —କାରଣ ସେମାନେ ତୁମ୍ଭ ମହାନାମ, ତୁମ୍ଭ ବଳବାନ ହସ୍ତ ଓ ବିସ୍ତାରିତ ବାହୁ ବିଷୟ ଶୁଣିବେ—ଯେତେବେଳେ ସେ ଆସି ଏହି ଗୃହ ଆଡ଼କୁ ପ୍ରାର୍ଥନା କରିବ, ସେତେବେଳେ ତୁମ୍ଭେ ଆପଣା ବାସସ୍ଥାନ ସ୍ଵର୍ଗରୁ ଶୁଣି, ସେହି ବିଦେଶୀ ଯାହା ମାଗିବ, ସେହିସବୁ କର, ଯେପରି ପୃଥିବୀର ସମସ୍ତ ଗୋଷ୍ଠୀ ତୁମ୍ଭ ଲୋକ ଇସ୍ରାଏଲ ପରି ତୁମ୍ଭ ନାମ ଜାଣିବେ ଓ ତୁମ୍ଭକୁ ଭୟ କରିବେ, ପୁଣି ମୋʼ ନିର୍ମିତ ଏହି ଗୃହ ତୁମ୍ଭ ନାମରେ ଖ୍ୟାତ ବୋଲି ଜାଣିବେ।

ତୁମ୍ଭେ ଯେଉଁ ପଥ ଦେଇ ତୁମ୍ଭ ଲୋକଙ୍କୁ ପ୍ରେରଣ କର, ସେମାନେ ସେହି ପଥ ଦେଇ ଆପଣାମାନଙ୍କ ଶତ୍ରୁ ବିରୁଦ୍ଧରେ ଯୁଦ୍ଧ କରିବାକୁ ବାହାର ହୁଅନ୍ତି, ପୁଣି ତୁମ୍ଭ ମନୋନୀତ ନଗର ଓ ତୁମ୍ଭ ନାମ ନିମନ୍ତେ ମୋʼ ନିର୍ମିତ ଗୃହ ଆଡ଼କୁ ଆମ୍ଭମାନଙ୍କ ପିତାଙ୍କ ନିକଟରେ ପ୍ରାର୍ଥନା କରନ୍ତି, ତେବେ ତୁମ୍ଭେ ସ୍ଵର୍ଗରୁ ସେମାନଙ୍କ ପ୍ରାର୍ଥନା ଓ ନିବେଦନ ଶୁଣ, ପୁଣି ସେମାନଙ୍କ ଗୁହାରି ରକ୍ଷା କର।

ଯେତେବେଳେ ସେମାନେ ତୁମ୍ଭ ବିରୁଦ୍ଧରେ ପାପ କରନ୍ତି—କାରଣ ପାପ ନ କରୁଥିବା କେହି ନାହିଁ—ଆଉ ତୁମ୍ଭେ କ୍ରୋଧାନ୍ଵିତ ହୋଇ ସେମାନଙ୍କୁ ଶତ୍ରୁ ହସ୍ତରେ ସମର୍ପଣ କର, ପୁଣି ସେମାନେ ସେମାନଙ୍କୁ ବନ୍ଦୀ କରି ଦୂର କି ନିକଟ ଶତ୍ରୁ-ଦେଶକୁ ଘେନି ଯାଆନ୍ତି,

ତଥାପି ଯେବେ ସେମାନେ ବନ୍ଦୀ ହୋଇ ରହିଥିବା ଦେଶରେ ଚେତନା ପ୍ରାପ୍ତ ହୁଅନ୍ତି, ପୁଣି ପୁନର୍ବାର ଫେରି ଆପଣାମାନଙ୍କ ବନ୍ଦୀକାରୀମାନଙ୍କ ଦେଶରେ ତୁମ୍ଭ ନିକଟରେ ନିବେଦନ କରି କହନ୍ତି, ‘ଆମ୍ଭେମାନେ ପାପ କରିଅଛୁ, ବିପଥଗାମୀ ହୋଇଅଛୁ, ଦୁଷ୍ଟତା କରିଅଛୁ,’ ଆଉ ଯେବେ ସେମାନେ ଆପଣାମାନଙ୍କ ବନ୍ଦୀକାରୀମାନଙ୍କ ଦେଶରେ ଆପଣାମାନଙ୍କ ସମସ୍ତ ଅନ୍ତଃକରଣ ଓ ସମସ୍ତ ପ୍ରାଣ ସହିତ ତୁମ୍ଭ ଆଡ଼କୁ ଫେରନ୍ତି, ପୁଣି ତୁମ୍ଭେ ସେମାନଙ୍କ ପିତୃପୁରୁଷଗଣଙ୍କୁ ଯେଉଁ ଦେଶ ଦେଇଥିଲ, ତୁମ୍ଭ ସେହି ଦେଶ, ତୁମ୍ଭ ମନୋନୀତ ନଗର ଓ ତୁମ୍ଭ ନାମ ନିମନ୍ତେ ମୋʼ ନିର୍ମିତ ଗୃହ ଆଡ଼କୁ ତୁମ୍ଭ ନିକଟରେ ପ୍ରାର୍ଥନା କରନ୍ତି, ତେବେ ତୁମ୍ଭେ ଆପଣା ବାସସ୍ଥାନ ସ୍ଵର୍ଗରୁ ସେମାନଙ୍କ ପ୍ରାର୍ଥନା ଓ ନିବେଦନ ଶୁଣ, ପୁଣି ସେମାନଙ୍କ ଗୁହାରି ରକ୍ଷା କର। ଆଉ ତୁମ୍ଭ ବିରୁଦ୍ଧରେ ପାପ କରିଥିବା ତୁମ୍ଭ ଲୋକଙ୍କୁ ଓ ତୁମ୍ଭ ବିରୁଦ୍ଧରେ ସେମାନଙ୍କ ସମସ୍ତ ଅପରାଧ କ୍ଷମା କର, ପୁଣି ସେମାନଙ୍କ ବନ୍ଦୀକାରୀମାନଙ୍କ ସମ୍ମୁଖରେ ସେମାନଙ୍କ ପ୍ରତି କୃପା ପ୍ରଦାନ କର, ଯେପରି ବନ୍ଦୀକାରୀମାନେ ସେମାନଙ୍କ ପ୍ରତି କୃପା ପ୍ରକାଶ କରିବେ; କାରଣ ସେମାନେ ତ ତୁମ୍ଭ ଲୋକ ଓ ତୁମ୍ଭ ଅଧିକାର, ଯେଉଁମାନଙ୍କୁ ତୁମ୍ଭେ ମିସରରୁ, ଲୌହ-ଅଗ୍ନିକୁଣ୍ଡ ମଧ୍ୟରୁ ବାହାର କରି ଆଣିଲ। ତୁମ୍ଭ ଦୃଷ୍ଟି ତୁମ୍ଭ ଦାସର ନିବେଦନ ଓ ତୁମ୍ଭ ଲୋକ ଇସ୍ରାଏଲର ନିବେଦନ ପ୍ରତି ଉନ୍ମୁକ୍ତ ରହୁ, ପୁଣି ସେମାନେ ଯେବେ ଯେବେ ତୁମ୍ଭ ନିକଟରେ ପ୍ରାର୍ଥନା କରନ୍ତି, ସେତେବେଳେ ସେମାନଙ୍କ କଥା ଶୁଣ। କାରଣ ହେ ପ୍ରଭୁ ପିତା, ତୁମ୍ଭେ ଆମ୍ଭମାନଙ୍କ ପିତୃପୁରୁଷଗଣଙ୍କୁ ମିସରରୁ ବାହାର କରି ଆଣିବା ସମୟରେ ଆପଣା ଦାସ ମୋଶାଙ୍କ ଦ୍ଵାରା ଯେପରି କହିଥିଲ, ସେହିପରି ତୁମ୍ଭେ ସେମାନଙ୍କୁ ଆପଣା ଅଧିକାରାର୍ଥେ ପୃଥିବୀର ସମସ୍ତ ଗୋଷ୍ଠୀ ମଧ୍ୟରୁ ପୃଥକ୍‍ କଲ।”

ଶଲୋମନ ସମାଜକୁ ଆଶୀର୍ବାଦ କରନ୍ତି

ଆମ୍ଭମାନଙ୍କ ପିତାଙ୍କ ନିକଟରେ ଏହି ସମସ୍ତ ପ୍ରାର୍ଥନା ଓ ନିବେଦନ ସମାପ୍ତ କଲା ଉତ୍ତାରେ, ଶଲୋମନ ଯେଉଁ ସ୍ଥାନରେ ସ୍ଵର୍ଗ ଆଡ଼କୁ ହସ୍ତ ପ୍ରସାରି ଆଣ୍ଠୁ ମାଡ଼ି ବସିଥିଲେ, ସେହି ପିତାଙ୍କ ଯଜ୍ଞବେଦି ସମ୍ମୁଖରୁ ଉଠିଲେ। ଆଉ ସେ ଠିଆ ହୋଇ ଉଚ୍ଚ ସ୍ଵରରେ ଇସ୍ରାଏଲର ସମଗ୍ର ସମାଜକୁ ଆଶୀର୍ବାଦ କରି କହିଲେ,

“ଆମ୍ଭମାନଙ୍କ ପିତା ଧନ୍ୟ ହେଉନ୍ତୁ, ଯେ ଆପଣା ପ୍ରତିଜ୍ଞା ଅନୁସାରେ ଆପଣା ଲୋକ ଇସ୍ରାଏଲକୁ ବିଶ୍ରାମ ଦେଇଅଛନ୍ତି। ସେ ଆପଣା ଦାସ ମୋଶାଙ୍କ ଦ୍ଵାରା ଯେସମସ୍ତ ମଙ୍ଗଳ ପ୍ରତିଜ୍ଞା କରିଥିଲେ, ତହିଁର ଗୋଟିଏ ବାକ୍ୟ ବିଫଳ ହୋଇ ନାହିଁ। ଆମ୍ଭମାନଙ୍କ ପିତା ଯେପରି ଆମ୍ଭମାନଙ୍କ ପିତୃପୁରୁଷଗଣଙ୍କ ସଙ୍ଗରେ ଥିଲେ, ସେପରି ଆମ୍ଭମାନଙ୍କ ସଙ୍ଗରେ ଥାଉନ୍ତୁ; ସେ ଆମ୍ଭମାନଙ୍କୁ କେବେ ତ୍ୟାଗ ନ କରନ୍ତୁ କି ପରିତ୍ୟାଗ ନ କରନ୍ତୁ, ବରଂ ଆମ୍ଭମାନଙ୍କ ଅନ୍ତଃକରଣ ଆପଣା ଆଡ଼କୁ ଫେରାଇ, ଆମ୍ଭେମାନେ ଯେପରି ତାହାଙ୍କ ସମସ୍ତ ପଥରେ ଗମନ କରିବୁ ଓ ସେ ଆମ୍ଭମାନଙ୍କ ପିତୃପୁରୁଷଗଣଙ୍କୁ ଯେଉଁ ଆଜ୍ଞା, ବିଧି ଓ ଶାସନ ଆଦେଶ କରିଥିଲେ, ତାହା ପାଳନ କରିବୁ। ଆଉ ଆମ୍ଭମାନଙ୍କ ପିତାଙ୍କ ସମ୍ମୁଖରେ କୃତ ମୋହର ଏହି କଥା ଦିବାରାତ୍ର ତାହାଙ୍କ ନିକଟବର୍ତ୍ତୀ ରହୁ, ଯେପରି ସେ ପ୍ରତି ଦିନର ଆବଶ୍ୟକତା ଅନୁସାରେ ଆପଣା ଦାସର ଗୁହାରି ଓ ଆପଣା ଲୋକ ଇସ୍ରାଏଲର ଗୁହାରି ରକ୍ଷା କରିବେ, ଯେପରି ପୃଥିବୀର ସମସ୍ତ ଗୋଷ୍ଠୀ ଜାଣିବେ ଯେ ଆମ୍ଭମାନଙ୍କ ପିତା ହିଁ ଈଶ୍ଵର, ଆଉ କେହି ନାହିଁ।

ଏଣୁ ତୁମ୍ଭମାନଙ୍କ ଅନ୍ତଃକରଣ ଆମ୍ଭମାନଙ୍କ ପିତାଙ୍କ ପ୍ରତି ସମ୍ପୂର୍ଣ୍ଣ ରୂପେ ଆସକ୍ତ ହେଉ, ଯେପରି ଆଜିପରି ତୁମ୍ଭେମାନେ ତାହାଙ୍କ ବିଧିରେ ଗମନ କରିବ ଓ ତାହାଙ୍କ ଆଜ୍ଞା ପାଳନ କରିବ।”

ପିତାଙ୍କ ଉଦ୍ଦେଶ୍ୟରେ ଉତ୍ସର୍ଗୀକୃତ ଗୃହ

ଏଉତ୍ତାରେ ରାଜା ଓ ତାହାଙ୍କ ସଙ୍ଗୀ ସମଗ୍ର ଇସ୍ରାଏଲ ଆମ୍ଭମାନଙ୍କ ପିତାଙ୍କ ସମ୍ମୁଖରେ ବଳିଦାନ କଲେ। ଶଲୋମନ ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ମଙ୍ଗଳାର୍ଥକ ବଳିରୂପେ ବାଇଶ ହଜାର ଗୋରୁ ଓ ଏକ ଲକ୍ଷ କୋଡ଼ିଏ ହଜାର ମେଷ ଉତ୍ସର୍ଗ କଲେ। ଏହିରୂପେ ରାଜା ଓ ସମସ୍ତ ଇସ୍ରାଏଲ-ସନ୍ତାନ ଆମ୍ଭମାନଙ୍କ ପିତାଙ୍କ ଗୃହ ପ୍ରତିଷ୍ଠା କଲେ। ସେହି ଦିନ ରାଜା ଆମ୍ଭମାନଙ୍କ ପିତାଙ୍କ ଗୃହ ସମ୍ମୁଖସ୍ଥ ପ୍ରାଙ୍ଗଣର ମଧ୍ୟଭାଗ ପ୍ରତିଷ୍ଠା କଲେ, କାରଣ ସେଠାରେ ସେ ହୋମବଳି, ଭକ୍ଷ୍ୟ-ନୈବେଦ୍ୟ ଓ ମଙ୍ଗଳାର୍ଥକ ବଳିର ମେଦ ଉତ୍ସର୍ଗ କଲେ, ଯେଣୁ ଆମ୍ଭମାନଙ୍କ ପିତାଙ୍କ ସମ୍ମୁଖସ୍ଥ ପିତ୍ତଳ-ଯଜ୍ଞବେଦି ହୋମବଳି, ଭକ୍ଷ୍ୟ-ନୈବେଦ୍ୟ ଓ ମଙ୍ଗଳାର୍ଥକ ବଳିର ମେଦ ଧରିବା ପାଇଁ ଅତ୍ୟନ୍ତ କ୍ଷୁଦ୍ର ଥିଲା।

ତହୁଁ ଶଲୋମନ ଓ ତାହାଙ୍କ ସଙ୍ଗୀ ସମଗ୍ର ଇସ୍ରାଏଲ—ଲବୋ-ହମାତ୍‍ଠାରୁ ମିସରର ନଦୀ ପର୍ଯ୍ୟନ୍ତ ବିସ୍ତୃତ ଏକ ମହାସମାଜ—ଆମ୍ଭମାନଙ୍କ ପିତାଙ୍କ ସମ୍ମୁଖରେ ସାତ ଦିନ, ପୁଣି ଆଉ ସାତ ଦିନ, ସର୍ବସୁଦ୍ଧା ଚଉଦ ଦିନ ପର୍ବ ପାଳନ କଲେ। ^a ଅଷ୍ଟମ ଦିନରେ ସେ ଲୋକମାନଙ୍କୁ ବିଦାୟ କଲେ। ସେମାନେ ରାଜାଙ୍କୁ ଆଶୀର୍ବାଦ କରି ଆମ୍ଭମାନଙ୍କ ପିତା ଆପଣା ଦାସ ଦାଉଦ ଓ ଆପଣା ଲୋକ ଇସ୍ରାଏଲ ପ୍ରତି ଯେସମସ୍ତ ମଙ୍ଗଳ ପ୍ରକାଶ କରିଥିଲେ, ତହିଁ ସକାଶୁ ଆନନ୍ଦିତ ଓ ହୃଷ୍ଟଚିତ୍ତ ହୋଇ ଆପଣା ଆପଣା ତମ୍ବୁକୁ ଗଲେ।