ପ୍ରଥମ ରାଜାବଳୀ 9 FHB Father's Heart Bible™

9 ¹ଶଲୋମନ ଆମ୍ଭମାନଙ୍କ ପିତାଙ୍କ ଗୃହ, ରାଜପ୍ରାସାଦ ଓ ଆପଣାର ସମସ୍ତ ବାଞ୍ଛିତ କାର୍ଯ୍ୟ ନିର୍ମାଣ ସମାପ୍ତ କଲା ଉତ୍ତାରେ, ²ଆମ୍ଭମାନଙ୍କ ପିତା ପୂର୍ବରୁ ଗିବୀୟୋନରେ ଯେପରି ତାହାକୁ ଦର୍ଶନ ଦେଇଥିଲେ, ସେପରି ଦ୍ଵିତୀୟ ଥର ତାହାକୁ ଦର୍ଶନ ଦେଲେ।

³ପୁଣି ଆମ୍ଭମାନଙ୍କ ପିତା ତାହାକୁ କହିଲେ, “ତୁମ୍ଭେ ଆମ୍ଭ ଛାମୁରେ ଯେଉଁ ପ୍ରାର୍ଥନା ଓ ନିବେଦନ କରିଅଛ, ତାହା ଆମ୍ଭେ ଶୁଣିଅଛୁ। ତୁମ୍ଭେ ଏହି ଯେଉଁ ଗୃହ ନିର୍ମାଣ କରିଅଛ, ତହିଁରେ ଅନନ୍ତକାଳ ନିମନ୍ତେ ଆମ୍ଭର ନାମ ସ୍ଥାପନ କରିବା ପାଇଁ ଆମ୍ଭେ ତାହାକୁ ପବିତ୍ର କରିଅଛୁ; ଆମ୍ଭର ଚକ୍ଷୁ ଓ ଆମ୍ଭର ଅନ୍ତଃକରଣ ସର୍ବଦା ସେଠାରେ ରହିବ। ⁴ଆଉ ତୁମ୍ଭେ, ଯଦି ତୁମ୍ଭ ପିତା ଦାଉଦ ଯେପରି ଚାଲିଲେ, ସେପରି ସମ୍ପୂର୍ଣ୍ଣ ଅନ୍ତଃକରଣ ଓ ସରଳତାରେ ଆମ୍ଭ ଛାମୁରେ ଚାଲି, ଆମ୍ଭର ସମସ୍ତ ଆଜ୍ଞା ପାଳନ କର ଓ ଆମ୍ଭର ବିଧି ଓ ଶାସନ ରକ୍ଷା କର, ⁵ତେବେ ଆମ୍ଭେ ତୁମ୍ଭ ପିତା ଦାଉଦଙ୍କୁ ଯେପରି ପ୍ରତିଜ୍ଞା କରିଥିଲୁ, ‘ଇସ୍ରାଏଲର ସିଂହାସନରେ ବସିବା ପାଇଁ ତୁମ୍ଭର ଲୋକର କେବେ ଅଭାବ ହେବ ନାହିଁ,’ ସେପରି ଇସ୍ରାଏଲ ଉପରେ ତୁମ୍ଭ ରାଜସିଂହାସନ ଅନନ୍ତକାଳ ନିମନ୍ତେ ସ୍ଥିର କରିବୁ।

⁶“ମାତ୍ର ଯଦି ତୁମ୍ଭେ କିମ୍ବା ତୁମ୍ଭର ସନ୍ତାନଗଣ ଆମ୍ଭ ପଶ୍ଚାଦ୍ଗମନରୁ ବିମୁଖ ହୁଅ, ଆମ୍ଭେ ତୁମ୍ଭମାନଙ୍କୁ ଦେଇଥିବା ଆଜ୍ଞା ଓ ବିଧି ପାଳନ ନ କର, ପୁଣି ଅନ୍ୟ ଦେବତାଗଣର ସେବା କରିବାକୁ ଓ ସେମାନଙ୍କୁ ପ୍ରଣାମ କରିବାକୁ ଯାଅ, ⁷ତେବେ ଆମ୍ଭେ ଇସ୍ରାଏଲକୁ ଆପଣାର ଦତ୍ତ ଦେଶରୁ ଉଚ୍ଛିନ୍ନ କରିବୁ ଓ ଆମ୍ଭ ନାମ ନିମନ୍ତେ ପବିତ୍ର କରିଥିବା ଏହି ମନ୍ଦିରକୁ ଆମ୍ଭ ଦୃଷ୍ଟିରୁ ଦୂର କରିବୁ; ତହିଁରେ ଇସ୍ରାଏଲ ସମସ୍ତ ଗୋଷ୍ଠୀ ମଧ୍ୟରେ ପ୍ରବାଦ ଓ ଉପହାସର ବିଷୟ ହେବ। ⁸ଏହି ଗୃହ ଢିପି ପରି ହୋଇଯିବ; ପ୍ରତ୍ୟେକ ପଥିକ ବିସ୍ମିତ ହୋଇ ଶୀସ୍ ଶବ୍ଦ କରିବ ଓ ପଚାରିବ, ‘ସଦାପ୍ରଭୁ ଏହି ଦେଶ ଓ ଏହି ଗୃହ ପ୍ରତି କାହିଁକି ଏପରି କଲେ?’ ⁹ତହିଁରେ ଲୋକମାନେ କହିବେ, ‘ଯେଉଁ ସଦାପ୍ରଭୁ ସେମାନଙ୍କ ପିତୃପୁରୁଷଗଣକୁ ମିସର ଦେଶରୁ ବାହାର କରି ଆଣିଥିଲେ, ସେମାନଙ୍କ ସେହି ସଦାପ୍ରଭୁ ପରମେଶ୍ଵରଙ୍କୁ ସେମାନେ ପରିତ୍ୟାଗ କଲେ, ଆଉ ଅନ୍ୟ ଦେବତାଗଣକୁ ଅବଲମ୍ବନ କଲେ, ସେମାନଙ୍କୁ ପ୍ରଣାମ କଲେ ଓ ସେମାନଙ୍କ ସେବା କଲେ, ଏଣୁ ସଦାପ୍ରଭୁ ସେମାନଙ୍କ ଉପରେ ଏହିସବୁ ବିପଦ ଘଟାଇଲେ।’”

ଶଲୋମନଙ୍କ ନଗର, ବେଠିକର୍ମ ଓ ଜାହାଜ

¹⁰କୋଡ଼ିଏ ବର୍ଷ ଉତ୍ତାରେ, ଶଲୋମନ ଆମ୍ଭମାନଙ୍କ ପିତାଙ୍କ ଗୃହ ଓ ରାଜପ୍ରାସାଦ, ଏହି ଦୁଇ ଗୃହ ନିର୍ମାଣ କରିସାରିଥିଲା। ¹¹ସୋରର ରାଜା ହୀରମ ଶଲୋମନର ବାଞ୍ଛାନୁସାରେ ଏରସ କାଷ୍ଠ, ଦେବଦାରୁ କାଷ୍ଠ ଓ ସୁବର୍ଣ୍ଣ ଯୋଗାଇଥିଲା; ତେଣୁ ଶଲୋମନ ରାଜା ହୀରମକୁ ଗାଲିଲୀ ଦେଶସ୍ଥ କୋଡ଼ିଏ ନଗର ଦେଲା। ¹²ଏଥିରେ ହୀରମ ଶଲୋମନର ଦତ୍ତ ନଗରସବୁ ଦେଖିବା ପାଇଁ ସୋରରୁ ଆସିଲା, ମାତ୍ର ସେସବୁ ତାହାକୁ ସନ୍ତୁଷ୍ଟ କଲା ନାହିଁ। ¹³ତେଣୁ ସେ ପଚାରିଲା, “ହେ ମୋʼ ଭାଇ, ତୁମ୍ଭେ ମୋତେ ଏ କି ପ୍ରକାର ନଗର ଦେଲ?” ଏଣୁ ସେ ସେହି ଅଞ୍ଚଳକୁ କାବୂଲ ଦେଶ ବୋଲି ନାମ ଦେଲା, ଆଜିଯାଏ ତାହା ସେମାନଙ୍କ ନାମ ହୋଇ ରହିଅଛି। ^a a v13 କାବୂଲ ଶବ୍ଦ “କିଛି ନୁହେଁ” କିମ୍ବା “ମୂଲ୍ୟହୀନ” ଅର୍ଥବୋଧକ ଏବ୍ରୀୟ ଶବ୍ଦ ପରି ଶୁଣାଯାଏ — ନଗରଗୁଡ଼ିକ ବିଷୟରେ ହୀରମର ସ୍ପଷ୍ଟ ବିଚାର। ¹⁴ହୀରମ ରାଜାଙ୍କୁ ପ୍ରାୟ ଚାରି ଟନ୍ ସୁବର୍ଣ୍ଣ ପଠାଇଥିଲା।

¹⁵ଶଲୋମନ ରାଜା ଆମ୍ଭମାନଙ୍କ ପିତାଙ୍କ ଗୃହ, ଆପଣା ପ୍ରାସାଦ, ମିଲ୍ଲୋ, ଯିରୂଶାଲମର ପ୍ରାଚୀର, ହାସୋର, ମାଗିଦ୍ଦୋ ଓ ଗେଷର ନିର୍ମାଣ କରିବା ନିମନ୍ତେ ଯେଉଁ ବେଠିକର୍ମାକାରୀ ଲୋକ ସଂଗ୍ରହ କଲା, ତାହାର ବୃତ୍ତାନ୍ତ ଏହି। ¹⁶ମିସରର ରାଜା ଫାରୋ ଯାଇ ଗେଷର ହସ୍ତଗତ କରି ତାହା ଅଗ୍ନିରେ ଦଗ୍ଧ କରିଥିଲା, ଆଉ ତନ୍ନିବାସୀ କିଣାନୀୟମାନଙ୍କୁ ବଧ କରିଥିଲା, ପୁଣି ତାହା ଆପଣା କନ୍ୟା, ଅର୍ଥାତ୍ ଶଲୋମନର ଭାର୍ଯ୍ୟାକୁ ଯୌତୁକ ସ୍ଵରୂପ ଦେଇଥିଲା। ¹⁷ତେଣୁ ଶଲୋମନ ଗେଷର, ତଳ ବେଥ୍-ହୋରୋଣ, ¹⁸ବାଲାତ୍ ଓ ଦେଶ ମଧ୍ୟସ୍ଥ ପ୍ରାନ୍ତରସ୍ଥିତ ତାମର, ¹⁹ଆଉ ଶଲୋମନର ସମସ୍ତ ଭଣ୍ଡାର-ନଗର, ତାହାର ରଥ ଓ ଅଶ୍ଵାରୋହୀମାନଙ୍କ ନିମନ୍ତେ ନଗର, ପୁଣି ଯିରୂଶାଲମରେ, ଲିବାନୋନରେ ଓ ଆପଣା ରାଜ୍ୟର ସମସ୍ତ ଦେଶରେ ଯାହା ନିର୍ମାଣ କରିବାକୁ ବାଞ୍ଛା କଲା, ସେହିସବୁ ନିର୍ମାଣ କଲା। ²⁰ଇମୋରୀୟ, ହିତ୍ତୀୟ, ପରିଷୀୟ, ହିବ୍ବୀୟ ଓ ଯିବୂଷୀୟମାନଙ୍କ ମଧ୍ୟରୁ ଯେଉଁମାନେ ଅବଶିଷ୍ଟ ରହିଥିଲେ, ଯେଉଁମାନେ ଇସ୍ରାଏଲ-ସନ୍ତାନ ନ ଥିଲେ, ²¹ଅର୍ଥାତ୍ ଯେଉଁମାନଙ୍କୁ ଇସ୍ରାଏଲ-ସନ୍ତାନମାନେ ସମ୍ପୂର୍ଣ୍ଣ ରୂପେ ବିନାଶ କରି ନ ପାରିଥିଲେ, ସେମାନଙ୍କ ପଶ୍ଚାତ ଦେଶ ମଧ୍ୟରେ ଅବଶିଷ୍ଟ ରହିଥିବା ସେମାନଙ୍କ ବଂଶଧରଗଣକୁ ଶଲୋମନ ବେଠିକର୍ମ ନିମନ୍ତେ ସଂଗ୍ରହ କଲା — ଆଜିଯାଏ ସେମାନେ ସେହିପରି ଅଛନ୍ତି। ²²ମାତ୍ର ଶଲୋମନ ଇସ୍ରାଏଲ-ସନ୍ତାନମାନଙ୍କ ମଧ୍ୟରୁ କାହାକୁ ଦାସ କଲା ନାହିଁ; ସେମାନେ ତ ତାହାର ଯୋଦ୍ଧା, ଦାସ, ଅଧିପତି, ସେନାପତି, ରଥାଧ୍ୟକ୍ଷ ଓ ତାହାର ରଥ ଓ ଅଶ୍ଵାରୋହୀମାନଙ୍କ ଅଧିପତି ଥିଲେ। ²³ଶଲୋମନର କାର୍ଯ୍ୟ ଉପରେ ନିଯୁକ୍ତ ପ୍ରଧାନ ଅଧ୍ୟକ୍ଷଗଣ ଏହି, ପାଞ୍ଚ ଶହ ପଚାଶ ଜଣ, ସେମାନେ କର୍ମକାରୀ ଲୋକମାନଙ୍କ ଉପରେ ତତ୍ତ୍ୱାବଧାନ କଲେ।

²⁴ଫାରୋର କନ୍ୟା ଦାଉଦ-ନଗରରୁ ଶଲୋମନର ତାହା ନିମନ୍ତେ ନିର୍ମିତ ଗୃହକୁ ଉଠିଆସିବା ଉତ୍ତାରେ, ସେ ମିଲ୍ଲୋ ନିର୍ମାଣ କଲା।

²⁵ଶଲୋମନ ଆମ୍ଭମାନଙ୍କ ପିତାଙ୍କ ନିମନ୍ତେ ଆପଣାର ନିର୍ମିତ ଯଜ୍ଞବେଦି ଉପରେ ବର୍ଷକୁ ତିନି ଥର ହୋମବଳି ଓ ମଙ୍ଗଳାର୍ଥକ ବଳି ଉତ୍ସର୍ଗ କଲା ଓ ତାହାଙ୍କ ଛାମୁରେ ସେହି ବଳି ସହିତ ଧୂପ ଜ୍ଵଳାଇଲା। ଏହିରୂପେ ସେ ଗୃହ ସମାପ୍ତ କଲା।

²⁶ଶଲୋମନ ରାଜା ମଧ୍ୟ ଇଦୋମ ଦେଶସ୍ଥ ସୂଫ ସାଗର କୂଳରେ ଏଲୋତ୍ ନିକଟସ୍ଥ ଇତ୍‌ସୀୟୋନ୍-ଗେବରରେ ଜାହାଜ ନିର୍ମାଣ କଲା। ²⁷ଆଉ ହୀରମ ସେହି ଜାହାଜ-ବହରରେ ଆପଣା ଦାସ, ଅର୍ଥାତ୍ ସମୁଦ୍ର-ଜ୍ଞାନୀ ନାବିକମାନଙ୍କୁ ଶଲୋମନର ଦାସମାନଙ୍କ ସଙ୍ଗରେ ପଠାଇଲା। ²⁸ସେମାନେ ଓଫୀରକୁ ଯାଇ ସେଠାରୁ ପ୍ରାୟ ଷୋହଳ ଟନ୍ ସୁବର୍ଣ୍ଣ ଆଣି ଶଲୋମନ ରାଜା ନିକଟକୁ ଆଣିଲେ।