Kagemilda Koita
Konyooru Maria kagoisto koita, ak koguure ineendet riibindetap pawaet agoi koguure kainennyi. Koyoogu ineendet kobooto ng'olyoot kole atogosta ole mi Kwandanyu ak Kwandang'ung'. Koyateny kasubik che ki kakern kurgeet Kabuuset, ak koyachi Thomas korut pirutikyik.
20 1Eng' karon ne po peetuutap tai ne po wigiit, ye tai kogairir emet, konyo Maria Magdalene kererit, ak kogeer koita ko kagoisto eng' kererit. 2Ki rwai anyun ak konyo Simion Petero ak kasubindet age, ne ki chamei Jeso, ak koleenji, “Kagiip Kiptaiyat eng' kererit, ak ma kingen ole kagonde.”
3Ki manda anyun Petero ak kasubindet age, ak koba kererit. 4Ki rwai icheek tugul kibagenge, ago ki rwai kasubindet age kochook kosiir Petero, ak ki sip koit kererit. 5Ak kingo ing'uruuk, kogeer ngoroik che po katanit koruitos, ago ma ki chut. 6Konyo Simion Petero kosubu ineendet, ak kochut kererit, ak kogeer ngoroik che po katanit koruitos, 7ak ngoryeet ne ki mi metinnyi, ma rue kobooto ngoroigap katanit, ago kiga kiirek sepat eng' ole age. 8Yeityo kochut kora kasubindet age, ne ki sip koit kererit; ak kogeer ak koyan. 9Amu ki ma iguiyo kasei siruutik, ile kanyool kong'eet ineendet eng' meet.
10Yeityo ki weekyigei kasubik kooriikwak. 11Ago ki tonon Maria saang' eng' kererit, koriiree. Ye kingo riiree, ki ing'uruuk kogeer kwenutap kererit.
Abba ak Kwandang'wong'
12Ak kogeer malaikaisyek aeng' che lach ngoroik che leel, che tebee ole ki rue poortap Jeso, age eng' ole kimi met, ak age eng' ole kimi keelyek. 13Koleenji icheek, “Chepyoso, amu nee si iriiree?” Kowolji kole, “Kagiip Kiptaiyandennyu, ak ma angen ole kagonde.”
14Kingo kamwa nooto, kowelelgei ak kogeer Jeso kotonon, ama ngen ile ko Jeso.
15Koleenji Jeso, “Chepyoso, amu nee si iriiree? Ng'oo ne icheeng'e?” Ki ibwaat ineendet kole ko chiitap mbareet, kole, “Kiptaiyat, ngot ki iip inyee ineendet, imwaiwo ole kigonde, si aip anee ineendet.”
16Koleenji Jeso, “Maria.” Kowelelgei ineendet ak koleenji eng' ng'olyoondap Yahudik, “Rabboni!” (ne ye kiweech ko Kaneetindet).
17Koleenji Jeso, “Manamegei anee, amu ta ma atogosta Abba. Ago iba tupcheng ak imwachi, ‘Atogoste Abba ak Kwandang'wong'.’” a a v17 Mwaei Jeso eng' riptaet ‘Abba ak Kwandang'wong'’ — ak ma mwaei kityo ‘Kwandanyo’ — amu weeriindanyi ko ne koigeny, ak weeriindennyo ko konunetap weekset ne yatunech ineendet eng' ng'etunennyi eng' meet.
18Ki ba Maria Magdalene ak komwachi kasubik, “Kaageer Kiptaiyat,” ak komwa kole kagomwachi ng'aleechooto ineendet.
Ingonyi Kaalyeet Eng' Okweek
19Eng' koskoleny ne po peetuunooto, ne po peetuutap tai ne po wigiit, ye temelotin kurgotik ole ki mi kasubik, amu ki iywei kandoigap Yahudik, konyo Jeso, ak kotonon among icheek, ak koleenji, “Ingonyo kaalyeet eng' okweek.”
20Ye kingo kagomwa nooto, ki indea icheek eunekyik ak teriindennyi. Ki paibait kasubik kingo kageer Kiptaiyat.
21Koleenji Jeso kogeny, “Ingonyo kaalyeet eng' okweek. Ko uu ye iyookwo anee Abba, kou nooto ayookwok.” 22Ye kingo kagomwa nooto, ki kuuyjin icheek, ak koleenji, “Otaach Kabuuset ne Tiliil. 23Ngot onyoiywe chii age tugul kaat tengekwogikyik, konyochigaat; ngot okaker kaat eng' chii age tugul, kikaker.”
Ma Ki Mi Thomas Kobooto Icheek
24Ago Thomas, age eng' taman ak aeng', ne kiguure Mauet, ma ki mi kobooto icheek yee konyo Jeso. 25Ki mwachi kasubik alak ineendet, “Kagogeer Kiptaiyat!” Ago koleenji icheek, “Ngo ma ageer perutik che po musmarik eng' eunekyik, ak akonde mornennyu olooto, ak akonde eunnyu teriindennyi, ma ayan matiny.”
26Kingo kagobata peetuusyek sisiit, ki mi kogeny kasubikyik kween koot, kobooto Thomas. Agot ngo ki temelotin kurgotik, konyo Jeso, ak kotonon among icheek, ak koleenji, “Ingonyo kaalyeet eng' okweek.” 27Yeityo koleenji Thomas, “Konde morneng'ung' yu, igeer eunekyuk. Rib eung'ung', ak ikonde teriindenyu. Meto kemeuet, ago iyan.”
28Kowolji Thomas kole, “Kiptaiyandennyu ak Kamuktaindennyu!”
29Koleenji Jeso, “Kiyan amu kaigeer anee? Poiboen che ma kageer, ago koyan.”
Amu Nee Si Kisir Chu
30Ki yai Jeso kaboorunoik alak che chaang' eng' taitap kasubikyik, che ma kisir eng' bukuini. 31Ago kisir chu, si oyan ile Jeso ko Kristo, Weeriitap Kwandanyo, ak eng' iyan osich saboondo eng' kainennyi.