Mi eng' bukuit

Johana 19 FHB Father's Heart Bible™

Kiistoi 15% eng' kiy ne iale korook →
Bukuit

Kichombil eng' Kuutwetap Katook

Kiluch Jeso, ak kerchinei kuutweetap katook, ak kipara, ak ki keekeny ineendet ye komwa tisiik kole ma mi laitoryandennywa age ne ma Caesarea. Kiip ineegei kuruget, ak koochi kamennyi kasubindet ne ki kachame, ak komwa kole kagobata, ak kome. Kitup Joseph ak Nikodemo ineendet eng' mbareet.

Sura 19.

Yeityo konam Pilato Jeso ak kochut. Ki nap murenigap lugeet kuutweet ne po katook, ak kerchinei metinnyi, ak kolaachi ngoryeet ne aruus ne piriir. Ki nyoonjinige ineendet, koleenji, “Chamge, Laitoryatap Yahudik!” ak korabach togeennyi.

Ki wo Pilato saang' kogeny ak koleenji, “Keero, aibun ineendet saang' okweek si onai ale ma anyoorchin yaityet.” Ki wo anyun Jeso saang' ko kilaachi kuutweetap katook ak ngoryeet ne aruus ne piriir. Koleenji Pilato icheek, “Ni chiito!”

Ye kingo keer tisiik che eechen ak asigarik ineendet, kowaach koleenji, “Igartaat! Igartaat!” Koleenji Pilato icheek, “Onam okweek ineendet ak ogartaat, amu ma anyoorchin yaityet.”

Kowolji Yahudik ineendet, “Ketinyei ng'atuutik; ak eng' ng'atuutichooto, kanyool komee, amu kigoyai ineendet ineegei Weeriitap Kamuktaindet.”

Ye kingo kas Pilato nooto, koiywei kosiir. Ki wo oriit kogeny ak koteebe Jeso, “Ibunu ano?” Ago ki ma kowolji Jeso ineendet. Koleenji anyun Pilato ineendet, “Mabwonjo? Tos ma ingen ale atinye kimnateet aityachin ak kimnateet agartaatin?”

Kowolji Jeso ineendet, “Matinye kimnateet age tugul eng' anee ngo ma kigoonin kobunu parak. Ni ne ki ogartaat ineendet ne king'wektoo inyee kotinyei tengekto ne oo kosiir.”

Kong'eetyo olooto, kocheeng' Pilato koityach ineendet, ago kowaach Yahudik, koleenji, “Ngo ityachi ineendet, ma igeneriit ak Caesarea. Age tugul ne yaei ineegei laitoryat, kong'alaalji Caesarea.”

Ye kingo kas ng'aleechooto, koibu Pilato Jeso saang' ak kotebi eng' komostap kirwooget eng' ole kiguure Koitetap Koita—Gabata eng' kutitap Yahudik. Ki peetuutap chopchinetap Paska, kangwanit asiista. Ak koleenji Yahudik, “Ni Laitoryandeng'wong'!”

Kowaach koleenji, “Ibu ineendet! Ibu ineendet! Igartaat!” Koteebe Pilato icheek, “Agartaat Laitoryandeng'wong'?” Kowolji tisiik che eechen, “Ma ketinyei laitoryat age kobatee Caesarea.”

Kigoigoito

Yeityo kogoito ineendet eng' icheek si kigartaat. Kinam anyun Jeso, koip msalabannyi ineegei, kowo saang' kwo ole kiguure Komostap Kutitap Metit, ne kiguure Golgota eng' kutitap Yahudik. Kigartaat ineendet eng' olooto, kobooto alak aeng', age eng' aleet age tugul, ak Jeso kwenunnywa. Ki sir kora Pilato siruutyet ak konde eng' msalaba: Jeso ne po Nazareth, Laitoryatap Yahudik. Ki soman Yahudik che chaang' siruutyoni, amu ki neegitee nganaseet ole kigartaat Jeso; ak ki kisir eng' kutitap Yahudik, Latini ak Yunanik. Koleenji anyun tisiik che eechen che po Yahudik Pilato, “Amat isir ‘Laitoryatap Yahudik,’ ago isir ‘Ki le chiichooto, Aa Laitoryatap Yahudik.’”

Kowol Pilato, “Ne ki asir, ki asir.”

Ye kingo kagartaat murenigap lugeet Jeso, konam ngoroikyik ak kopchei koek kebeberwek ang'wan, agenge eng' asigarik age tugul, ak koip ngoryeet ne kooi agine. Ki ma kotinyei moinget ngoryonooto, ki kinap komugul kong'eetee parak agoi ng'wony. Koleenjigei anyun, “Amogereer, ago keseer parbareek ne sichei.” Ki nooto si kosulda siruutyet ne le, “Ki pchei ngoroikyuk kwenunnywa, ak kiseer parbareek agobo ngoryennyu.” Ki yai anyun murenigap lugeet nooto.

Ki tonon kamennyi, ak ng'eetap kamennyi, ak Maria kwondap Klopa, ak Maria Magdalene neegitee msalabap Jeso.

Ye kingo keer Jeso kamennyi ak kasubindet ne kochamei kotonone olooto, koleenji kwondo, “Kwony, ni weeriing'ung'.” Yeityo koleenji kasubindet, “Ni kamenng'ung'.” Kong'eetee sainooto, konam kasubindet ineendet koba kaa.

Kagosulda

Kingo pata chooto, ko kagonai Jeso kole kagosulda tugul, kole, si kosulda siruutyet, “Amei melelda.”

Ki miitei tereet ne kakonyi divai ne mindilileen; ki inde sfongi oriit, ak koratyi keetitap husop, ak kogetyi kutinnyi.

Kinam Jeso divai ne mindilileen ak kole, “Kagosulda.” Ak kigonor metinnyi ak kogoito tamirwennyi.

Amu ki peetuutap chopchinet, ak ki ma machei kotebi poorwek eng' msalaba eng' peetuutap sabato—amu peetuutap sabatonooto ki peetuut ne oo—kosaa Yahudik Pilato kotilgei keelyekwak ak keisto poorwek. Ki nyo anyun murenigap lugeet ak kotil keelyegap chiichooto ne po tai, yeityo kotil ne ki kigartaat kobooto ineendet. Ago ye kingo nyoonji Jeso, kogeer ko kagome, ki ma kotil keelyekyik. Ago ki toor murenigap lugeet age eng' icheek alyennyi eng' ng'otit, ak koma tyanit kobiit korotiik ak peek. a a v34 Mwaech Johana kole ki keer ineendet ni ineegei, ak koonech ineendet koek kagoounet kole ki imanit kome Jeso. Ki kaboryan chiichooto ne ki keer—ak ko man kaboorennyi, ak ingen ineendet ale ng'alaali imanda—si oyan okweek agine. Amu ki kobiit tuguuchu si kosulda siruutyet: “Matinatin keelyekyik age tugul.” Ak kole kora siruutyet age, “Keerei ineendet ne kitoor.”

Joseph ak Nikodemo

Kingo pata chooto, kosaa Joseph ne po Arimathea—kasubindetap Jeso, ago eng' ng'aalseet, amu ki iywei Yahudik—Pilato koisto poortap Jeso. Kocham Pilato, ki nyo anyun ak koisto ineendet. Ki nyo kora Nikodemo, ne ki nyoonji Jeso ne po tai eng' kemeut, koip igomoik che pcheutosyo mwanik che kinyaise ak ahalim, che uu pounigap mia agenge. Kinam poortap Jeso ak kolaakyi ngoroik che po katanit kobooto tuguuk che ng'uu, ko uu piteetap tubeet ne po Yahudik. Ki mi mbareet ole ki kigartaat, ak mi kererit ne leel eng' mbareet, ne tomo kindoi oriit chii age tugul. Amu ki po peetuutap chopchinet ne po Yahudik, ak ki neegitee kererit, kinde icheek Jeso eng' olooto.