ዮሐንስ 19

19 ¹ከዚያም ጲላጦስ ኢየሱስን ወስዶ አስገረፈው። ²ወታደሮቹም የእሾህ አክሊል ጐንጕነው በራሱ ላይ ደፉበት፤ ሐምራዊ ልብስም አለበሱት። ³ወደ እርሱም እየቀረቡ፣ “የአይሁድ ንጉሥ ሆይ፣ ሰላም ለአንተ ይሁን!” እያሉ በጥፊ ይመቱት ነበር።

⁴ጲላጦስም ዳግመኛ ወጥቶ፣ “እነሆ፣ ምንም ጥፋት እንዳላገኘሁበት ታውቁ ዘንድ ወደ እናንተ አወጣዋለሁ” አላቸው። ⁵ኢየሱስም የእሾህ አክሊልና ሐምራዊ ልብስ ለብሶ ወጣ። ጲላጦስም፣ “እነሆ፣ ሰውየው!” አላቸው።

⁶የካህናት አለቆችና ጠባቂዎቹ ባዩት ጊዜ፣ “ስቀለው! ስቀለው!” ብለው ጮኹ። ጲላጦስም፣ “እኔ ጥፋት ስላላገኘሁበት፣ እናንተው ወስዳችሁ ስቀሉት” አላቸው።

⁷አይሁድም፣ “እኛ ሕግ አለን፤ ራሱን የእግዚአብሔር ልጅ ስላደረገ፣ በዚያ ሕግ መሞት አለበት” ብለው መለሱለት።

⁸ጲላጦስ ይህን በሰማ ጊዜ፣ ይበልጥ ፈራ። ⁹ዳግመኛም ወደ ገዡ ግቢ ገብቶ ኢየሱስን፣ “አንተ ከወዴት ነህ?” ብሎ ጠየቀው። ኢየሱስ ግን ምንም መልስ አልሰጠውም። ¹⁰ጲላጦስም፣ “ለእኔ አትናገረኝም? ልፈታህ ሥልጣን እንዳለኝ፣ ልሰቅልህም ሥልጣን እንዳለኝ አታውቅምን?” አለው።

¹¹ኢየሱስም፣ “ከላይ ባልተሰጠህ ኖሮ፣ በእኔ ላይ ምንም ሥልጣን ባልኖረህም ነበር። ስለዚህ ለአንተ አሳልፎ የሰጠኝ ሰው ኀጢአቱ ይበልጣል” ብሎ መለሰለት።

¹²ከዚያ ጊዜ ጀምሮ ጲላጦስ ሊፈታው ፈለገ፤ አይሁድ ግን፣ “ይህን ብትፈታው የቄሳር ወዳጅ አይደለህም። ራሱን ንጉሥ የሚያደርግ ሁሉ ቄሳርን ይቃወማል” ብለው ጮኹ።

¹³ጲላጦስም ይህን ቃል ሰምቶ ኢየሱስን አወጣው፤ የድንጋይ ንጣፍ በተባለው፣ በአራማይክ ጋቫታ በሚባለው ስፍራ በፍርድ ወንበር ተቀመጠ። ¹⁴የፋሲካ መዘጋጃ ቀን፣ ወደ ቀትር አካባቢ ነበር። አይሁድንም፣ “እነሆ፣ ንጉሣችሁ!” አላቸው።

¹⁵እነርሱም፣ “አስወግደው! አስወግደው! ስቀለው!” ብለው ጮኹ። ጲላጦስም፣ “ንጉሣችሁን ልስቀል?” ብሎ ጠየቃቸው። የካህናት አለቆችም፣ “ከቄሳር በቀር ንጉሥ የለንም” ብለው መለሱ።

አሳልፎ ተሰጠ

¹⁶ከዚያም እንዲሰቀል አሳልፎ ሰጣቸው። እነርሱም ኢየሱስን ወሰዱት፤ ¹⁷የራሱንም መስቀል ተሸክሞ፣ የራስ ቅል ስፍራ ወደ ተባለው፣ በአራማይክ ጎልጎታ ወደ ተባለው ቦታ ወጣ። ¹⁸በዚያም ከሁለት ሌሎች ጋር ሰቀሉት፤ አንዱን በአንዱ ወገን፣ ሌላውን በሌላው ወገን፣ ኢየሱስን ደግሞ በመካከል አደረጉ። ¹⁹ጲላጦስም ጽሑፍ ጽፎ በመስቀሉ ላይ አደረገው፤ እንዲህም የሚል ነበር፦ የናዝሬቱ ኢየሱስ፣ የአይሁድ ንጉሥ። ²⁰ኢየሱስ የተሰቀለበት ስፍራ ለከተማዪቱ ቅርብ ስለ ነበር፣ ብዙ አይሁድ ይህን ጽሑፍ አነበቡት፤ የተጻፈውም በአራማይክ፣ በላቲንና በግሪክ ነበር። ²¹የአይሁድ የካህናት አለቆችም ጲላጦስን፣ “ ‘የአይሁድ ንጉሥ’ ብለህ አትጻፍ፤ ነገር ግን ‘ይህ ሰው፣ የአይሁድ ንጉሥ ነኝ አለ’ ብለህ ጻፍ” አሉት።

²²ጲላጦስም፣ “የጻፍሁትን ጽፌአለሁ” ብሎ መለሰ።

²³ወታደሮቹም ኢየሱስን ከሰቀሉ በኋላ፣ ልብሱን ወስደው ለእያንዳንዱ ወታደር አንዳንድ ዕድል ፈንታ እንዲሆን በአራት ከፈሉት፤ እጀ ጠባቡንም ወሰዱ። እጀ ጠባቡም ከላይ እስከ ታች ወጥ ሆኖ የተሠራ፣ ስፌት የሌለው ነበር። ²⁴እርስ በርሳቸውም፣ “ለማን እንደሚሆን ዕጣ እንጣጣልበት እንጂ አንቅደደው” ተባባሉ። ይህም፣ “ልብሴን እርስ በርሳቸው ተከፋፈሉ፤ በልብሴ ላይም ዕጣ ተጣጣሉ” የሚለው መጽሐፍ ይፈጸም ዘንድ ሆነ። ወታደሮቹም ይህን አደረጉ።

²⁵በኢየሱስ መስቀል አጠገብም እናቱ፣ የእናቱ እኅት፣ የቀለዮጳ ሚስት ማርያምና መግደላዊት ማርያም ቆመው ነበር።

²⁶ኢየሱስም እናቱንና የሚወደውን ደቀ መዝሙር በዚያ ቆመው ባየ ጊዜ፣ እናቱን፣ “አንቺ ሴት፣ እነሆ፣ ልጅሽ!” አላት። ²⁷ከዚያም ደቀ መዝሙሩን፣ “እነሆ፣ እናትህ!” አለው። ከዚያም ሰዓት ጀምሮ ደቀ መዝሙሩ ወደ ቤቱ ወሰዳት።

ተፈጸመ

²⁸ከዚህም በኋላ ኢየሱስ፣ ሁሉ ነገር አሁን እንደ ተፈጸመ አውቆ፣ መጽሐፍ ይፈጸም ዘንድ፣ “ተጠማሁ” አለ።

²⁹በዚያም ኮምጣጣ ወይን የሞላበት ማሰሮ ተቀምጦ ነበር፤ ሰፍነግም በወይኑ ነክረው በሂሶጵ ዘንግ ላይ አድርገው ወደ አፉ አቀረቡት።

³⁰ኢየሱስም ኮምጣጣውን ወይን ከተቀበለ በኋላ፣ “ተፈጸመ” አለ። ራሱንም አዘንብሎ ነፍሱን አሳልፎ ሰጠ።

³¹የመዘጋጃ ቀን ስለ ነበር፣ ያም ሰንበት ልዩ ቀን ስለ ነበር፣ አስከሬኖቹ በሰንበት በመስቀሉ ላይ እንዲቆዩ ስላልፈለጉ፣ አይሁድ እግሮቻቸው ተሰብረው አስከሬኖቹ እንዲወርዱ ጲላጦስን ለመኑት። ³²ስለዚህ ወታደሮቹ መጥተው የፊተኛውን ሰው እግሮች፣ ከዚያም ከእርሱ ጋር የተሰቀለውን የሌላውን ሰው እግሮች ሰበሩ። ³³ወደ ኢየሱስ በመጡ ጊዜ ግን፣ አስቀድሞ እንደ ሞተ አይተው እግሮቹን አልሰበሩም። ³⁴ነገር ግን ከወታደሮቹ አንዱ ጎኑን በጦር ወጋው፤ ወዲያውም ደምና ውኃ ፈሰሰ። ^a a v34 ዮሐንስ ይህን ራሱ እንዳየ እየነገረን ነው፤ ኢየሱስ በእውነት እንደ ሞተም ማስረጃ አድርጎ ያቀርበዋል። ³⁵ያየውም ሰው መስክሯል፤ ምስክሩም እውነት ነው፤ እርሱም እውነት እንደሚናገር ያውቃል፤ ይኸውም እናንተ ደግሞ ታምኑ ዘንድ ነው። ³⁶ይህም የሆነው፣ “ከአጥንቶቹ አንዳች አይሰበርም” የሚለው መጽሐፍ ይፈጸም ዘንድ ነው። ³⁷ደግሞም ሌላ መጽሐፍ፣ “የወጉትን ያዩታል” ይላል።

ዮሴፍና ኒቆዲሞስ

³⁸ከዚህ በኋላ አይሁድን ስለ ፈራ በስውር የኢየሱስ ደቀ መዝሙር የነበረው የአርማትያሱ ዮሴፍ፣ የኢየሱስን አስከሬን እንዲያወርድ ጲላጦስን ለመነው። ጲላጦስም ፈቀደለት፤ ስለዚህ መጥቶ አስከሬኑን አወረደ። ³⁹ቀድሞ በሌሊት ወደ ኢየሱስ መጥቶ የነበረው ኒቆዲሞስም፣ የከርቤና የእሬት ቅልቅል፣ ሰባ አምስት ነጥር የሚያህል ይዞ መጣ። ⁴⁰የኢየሱስንም አስከሬን ወስደው፣ እንደ አይሁድ አገናነዝ ልማድ ከሽቱ ጋር በበፍታ ጨርቅ ከፈኑት። ⁴¹በተሰቀለበትም ስፍራ አትክልት ነበረ፤ በአትክልቱም ውስጥ ገና ማንም ያልተቀበረበት አዲስ መቃብር ነበረ። ⁴²የአይሁድ የመዘጋጃ ቀን ስለ ነበር፣ መቃብሩም ቅርብ ስለ ነበር፣ ኢየሱስን በዚያ አኖሩት።