Kaling Luthop Runluga Kiamnu
Bwei pi thangluga, kaling luthop runluga, pi muluga, takopuba rwanna 'Caesar lat ani khou krwang khatchale am make' diga rinnu kaan bi, Jisu ding pi swak rwe. Maanna Baraanto cross ga kailuga, Baom kriangnu potroi khou Banu ding piluga, taang tang rwe diga rinluga, thi rwe. Joseph le Nicodemus na anqwat khat bi Maan ding ui thang rwe.
19 1Habei ga Pilate na Jisu ding louluga Bating bwei pi thang rwe. 2Kraanmi nunna kaling luthop khat bachaluga Balu bi run thangga, sendumnu pwan Bakhou sin thang rwe. 3Banina Bakim bi hung hung ongga rinne, “Kalumme, Jihudi rwan Krwang!” Atiga Bamai kut bazaana kabeng rwe.
4Pilate na leng taanluga langkaang la thouluga bani khou rinne, “Phaang ngo, Bating nani lang la Eina pon thou nge, atiga Bating lu chung bi koi dou make dinu nanina thei lang nge.” 5Habei ga Jisu na kaling luthop runluga sendumnu pwan sin basoi langkaang la thou hung rwe. Pilate na bani khou rinne, “Hei Manpa phaang ngo!”
6Takopuba rwan le ngaak nunna Bating munu kaan bi rakanga rinne, “Cross pi athatro! Cross pi athatro!” Pilate na bani khou rinne, “Nani zungna Bating louluga cross pi athatro, balangbe Bating lu chung bi ei koi dou make.”
7Jihudi rwanna Bakhou rinne, “Ani khou chongtan amme; haba chongtan nung suiga maan thinu lat, balangbe maanna bapum bahak Rikrwang Sa Kapaisa ding sem thang rwe.”
8Pilate na hei chong ngaisu thangnu kaan bi maan katak inkuga kachi rwe. 9Maan leng Praetorium sung la khutluga Jisu ding ngai rwe, “Nang tabina hungnubo?” Atiyeda Jisu na Bakhou takolu pi make. 10Habei ga Pilate na Bakhou rinne, “Nang Akhou rin makpo? Nang ting bathan thangnu ngam le, nang cross pi athat thangnu ngam le Eina amme dinu nangna thei makpo?”
11Jisu na Bakhou rinne, “Tambaan lana nang lang pi mak dabe, nangna Ating lu chung bi ngam katei le amlaye. Atibriakpina Ating nang khou inku thangnu maan gana noh kalian inku lousunuwe.”
12Haba kaan bina Pilate na Bating ting bathan thang lang karam ngaake, atiyeda Jihudi rwanna rakanga rinne, “Nangna Bating ting bathan thang nge dabe, nang Caesar om marup make. Tudannuna bapum bahak krwang ding semnu maan gana Caesar ding maitwangnuwe.”
13Pilate na hei chong bing ngaisu thangnu kaan bi Jisu ding langkaang la pon thouluga, Lung Daannu, Hebrew chongla Gabatha diga kounu riak pi chongsem kaong la ong ngaake. 14Haga ni ga Takan Swaknu Balou om Chamdaannu Lumik ngaake, chakrin karuk tanu dat pi ngaake. Maanna Jihudi rwan khou rinne, “Hei nani Krwang phaang ngo!”
15Banina rakanga rinne, “Lou seo! Lou seo! Cross pi athatro!” Pilate na bani khou ngai rwe, “Nani Krwang ding cross pi Eina athatnu dingbo?” Takopuba rwanna rinne, “Ani khou Caesar bakhakka krwang teinu maake.”
Inku Thangnu
16Habei ga maanna Bating cross pi athat lang bani khou inku thang rwe. Atiga banina Jisu ding lou thou rwe. 17Maanna bapum om cross phunluga Luru Riak, Hebrew chongla Golgotha diga kounu riak pi thou dam ngaake. 18Habei ga banina Bating cross pi bakhai ka rwe, mi teinu pat ni le diga, pek pek la pakhat, Jisu ding bazai bi bakhai thang rwe. 19Pilate na le kazek khat zek thangluga cross pi tak thang rwe: Nazareth rwan Jisu, Jihudi rwan Krwang. 20Jihudi mi tamnuna hei kazek ga pan rwe, balangbe Jisu ding cross pi athatnu riak ga namlian takung bina ngaake; haga Hebrew chong, Latin chong khatle Greek chongna zek ongnu ngaake. 21Habei ga Jihudi rwan om takopuba rwanna Pilate ding rinne, “‘Jihudi rwan Krwang’ diga zek mako, atiyeda ‘Heiba manpana, Ei Jihudi rwan Krwang gaye diga rinne’ diga zek thang ngo.”
22Pilate na rinne, “Eina zek thangnu ga zek thang rwe.”
23Kraanmi nunna Jisu ding cross pi athat thangnu nung banina Bapwan bing louluga, kraanmi khat lang badam khat toga badam mali kasem rwe, atiga talathu le lou rwe. Haba talathu ga charut maknu ngaake, balu lana bakalan tangga pakhatcha toga bacha ongnu ngaake. 24Habei ga banina bani cham lak pi rinne, “Hei ding reta mako, atiyeda tuna lou su dingbo diga tasaan phaangzo.” Heiya chongdip bi rin ongnu ga hung tang lang nge, “Banina Apwan bani lak pi kasem rwe, khatle Apwan lang chungna banina tasaan rwe.” Atiga kraanmi nunna hei toga to rwe.
25Jisu om cross takung bi Banu, Banu om naonu, Cleopas mei Mary khatle Mary Magdalene na kalwang ngaake.
26Jisu na Banu khatle Baom kriangnu potroi ga habei kalwang ongnu munu kaan bi, Banu khou rinne, “Mannu, hei nasa phaang ngo.” 27Atiga maanna potroi khou rinne, “Hei nanu phaang ngo.” Haba chakrin kaan bina potroi gana Banu ding bain la lou khut rwe.
Loi Dam Rwe
28Hei nung bi Jisu na chwan katei loi dam rwe dinu theiluga, chongdip hung tang lang, rinne, “Ei thiraang nge.”
29Habei ga kathunnu drakha tui sipnu ben khat am ngaake; banina sponge haga bi imphomluga hyssop sungrwan bi takluga Bamun la basaang pi rwe.
30Jisu na kathunnu drakha tui lounu kaan bi rinne, “Loi dam rwe.” Atiga maanna Balu kuntaluga Bakatha ting pi thang rwe.
31Haga ni ga Chamdaannu Lumik briakpina, khatle Sabbath ni ga pum bing ga cross pi ong dam ding Jihudi rwanna za lan ngaake—haba Sabbath ga kalian lumik ngaake—atibriakpina banina bani ket kanat satluga pum bing lou sat lang Pilate ding ni rwe. 32Habei ga kraanmi nunna hungluga kamanu manpa om ket kanat sat rwe, atiga Maan le diga cross pi athatnu teinu manpa om ket le kanat sat rwe. 33Atiyeda banina Jisu kim bi hungnu kaan bi Maan thi owei dam rwe dinu munu briakpina, Baket kanat sat make. 34Atiyeda kraanmi nun lak pi pakhatna sung choinu bina Bapek choi thang rwe, atiga kahan bi thi khatle tui thou hung rwe. a a v34 John na maan bapum bahakka hei ga munu ngaake dinu ani khou rin thang nge, khatle Jisu batakka thi dam rwe dinu badannu toga maanna heiya pi thang nge. 35Bamik bina munu maan gana badannu pi thang rwe—baom badannu ga bazenu gaye, khatle maanna bazenu rinne dinu maanna thei nge—atibriakpina nani le balumsa lang nge. 36Balangbe hei bing nga chongdip hung tang lang swak tamnuwe, “Baru pakhatcha le kanat satlaye.” 37Atiga chongdip teinu khatle rinne, “Banina choi thangnu Bating banina phaanglune.”
Joseph le Nicodemus
38Hei bing nung bi, Arimathea rwan Joseph—maan Jisu om potroi khat ngaake, atiyeda Jihudi rwan ding kachi briakpina inkamga—na Jisu pum lou sat lang Pilate ding ni rwe. Pilate na za thang rwe, atiga maanna hungluga Bapum lou sat rwe. 39Kamanu kayong bi Jisu kim bi hung ngaaknu Nicodemus le hungluga, myrrh le aloes thang karungnu, pound somsiariga ngari tanu dat pi, pon hung rwe. 40Banina Jisu om pum ding lou thangluga, Jihudi rwan imphumnu bachaang nung suiga, banamsanu pot le diga banemnu pwan bi kazwan thang rwe. 41Bating cross pi bakhai thangnu riak pi anqwat khat am ngaake, atiga haba anqwat pi pakhatchana le riak thang damnu maknu thaan kathan khat am ngaake. 42Balangbe heiya Jihudi rwan om Chamdaannu Lumik ngaake khatle thaan le takungga ong briakpina, banina Jisu ding habei ga riak thang rwe.