John 19

19 ¹Chieina Pilatena Jishuli khuida lijei eina ngaphitmihaowa. ²Shipaibingna ka̱shātwui kuihon akha sākhuilaga awui akuili ngahonmi, kala hungrisi kahai phahon katuma akha ali ngavaimi. ³Athumna ali rāsamphangda, "Jihudiwui Awungali okpeimeiranu!" da hānga, kala amaili kapheya.

⁴Latluida Pilatena shoklaga athumli hānga, "Yanglu, ina ali nathumwuili khuishokra, chithākha awuili khayon khikha masamphangmana kaji nathumna theira." ⁵Chieina Jishuna ka̱shātwui kuihon ngahonda hungrisi kahai phahon katuma ngavailaga shoka. Pilatena athumli hānga, "Mipā hi yanglu!"

⁶Pāngmon akhokabing eina otshinabingna ali theilaga panglāk eina vaowa, "Krushli shaothathaolu! Krushli shaothathaolu!" Pilatena athumli hānga, "Nathumna ali khuithuiulu kala krushli shaothathaolu, kaja ina awuili khayon khikha masamphangmana."

⁷Jihudibingna ali ngahānkai, "Ithumli ain akha lei; chi ain athishurda a thingayia, kaja ana akhalatta Varewui Naomayarana da sākhui."

⁸Pilatena hi shālaga, a hakmahāda ngacheenāhaowa. ⁹Ana kārotli zangluishitlaga Jishuli hānga, "Na kachiwui eina kharākhala?" Kha Jishuna ali khikha mangahānkāmana. ¹⁰Chieina Pilatena ali hānga, "Nana ili matuimarala? Ina nali chiho khavai pangshap lei, kala nali krushli shaoshān khavai pangshap lei kaji nana matheila?"

¹¹Jishuna ngahānkai, "Kazingram eina nali mikahai maningsi kaje, nana iwuitungli pangshap khikhala maleisāmara. Chiwui vang eina ili nawui pāngli horsangmi kahaia chi hakmahāda morei phunga."

¹²Chi eina thuida Pilatena Jishuli chiho khavai akhashida sai, kha Jihudibingna panglāk eina vaoda hānga, "Nana ali chihoakha, na Caesarwui ngasotnao maningmana. Kachikathāna akhalatta awunga da sākhui chi Caesarli ngakaikashina."

¹³Pilatena tui hi shālaga, Jishuli khuishoklaga, "Ngalung Yāngkhup" hoi kaho chili bichar sāpamkhongli pama, chiya Aramaic tui eina Gabbatha hoi. ¹⁴Chithang Makānkhami Phanitwui Khangarān zimikshona. Pung katharuka katā eina ana Jihudibingli hānga, "Nathumwui Awunga hi yanglu!"

¹⁵Athumna panglāk eina vaowa, "Ali khuivālu! Ali khuivālu! Krushli shaoshānhaolu!" Pilatena athumli ngahāna, "Nathumwui Awungali krushli shaoshānrala?" Pāngmon akhokabingna ngahānkai, "Ithumli Caesar maningla awunga katei maleimana."

Horsangmi Kahai

¹⁶Chieina ana ali krushli shaothat khavai athumli horsangmihaowa. Chieina athumna Jishuli khuiya, ¹⁷ana akhalattawui krush khuiphunglaga, mikuira̱pam hoi kaho chili shokvai, chiya Aramaic tui eina Golgotha hoi. ¹⁸Apam chili athumna khangatei mi khani ngasoda, akhana akhashong kala akhana akhashong, Jishuli alungthungli krushli shaoshāna. ¹⁹Pilatena Nazarethwui Jishu, Jihudiwui Awunga da kapihai chithi akha sāda krushtungli sanga. ²⁰Jihudi kachungkhana kapihai chithi chi pāsera, kaja Jishuli krushli shaokahai apam chi keinungwui eina nganailakhaira; hi Aram tui, Latin tui, kala Greek tui eina kapihaisai. ²¹Chieina Jihudiwui pāngmon akhokabingna Pilateli hānga, "'Jihudiwui Awunga' da makapilu, kha 'Hi mipāna I Jihudiwui Awungana da hānga' chi kapilu."

²²Pilatena ngahānkai, "Ina kapikahai chi ina kapikahai."

²³Shipaibingna Jishuli krushli shaokahaiwui thili, athumna awui kachon khuida akai mati sāda ngayarkhui, shipai kachiva̱li akai akha, kala aphahonla khui. Phahon chi khopkakhui maleila, atung eina aze tāshungda akha khawutta rakkakhui. ²⁴Chieina athumna ngakai ngarok hānga, "Ithum hi maserusa, kha khipāna reira kaji kalā yangsa." Hi kathara lairikli hāngkahai ungshung khavaina, "Athumna iwui kachon them ngachaili ngayarkhui, kala iwui kachonwui vang kalā yangkhui." Chithāda shipaibingna sāhaowa.

²⁵Awui ava̱, awui ava̱wui achināva̱, Clopaswui preiva̱ Mary, kala Magdalawui Mary china Jishuwui krushwui ngalemli nganinga.

²⁶Jishuna ava̱ kala ana leishiya sākhangatha̱ apam chili nganing chi theilaga, ava̱li hānga, "Sha̱nao, hili nawui naomayarana." ²⁷Chieina ana sākhangatha̱ chili hānga, "Hili nawui ava̱na." Chi atam eina thuida sākhangatha̱ china ava̱li awui shimli khuizangmi.

Kuphaira

²⁸Hiwui thili, saikora ara kuphaira kaji theihaoda, kathara lairik ungshung khavai Jishuna hānga, "I ra̱changhaira."

²⁹Apam chili drakhāra̱ kathura pemtinghai ham akha leisāda athumna wothop chi chili rurkhuilaga, maharnā mārong akhali khalapshānhailaga awui khamorli khāngkai.

³⁰Jishuna drakhāra̱ kathur chi khuilaga hānga, "Kuphaira." Ana akui shunzangda awui manglā chihomihaowa.

³¹Khangarān kasā zimiksho sāhaoda, kala chi Sabbath chi mataimeikap kaje zimiksho sāhaoda, Sabbaththang angun chi krushtungli taisang khavai maningda, Jihudibingna Pilateli athumwui aphei sātekmi khavai kala angunbing khuitā khavai poi. ³²Chieina shipaibingna khare mipāwui aphei kala ali ngasoda krushli shaokahai khangatei mipāwui aphei sātekmi. ³³Kha Jishuli rāda, a ara thihaira kaji theilaga, awui aphei masātekmana. ³⁴Kha shipaibingwui ngachaili akhana kazei eina awui akaili rungthata, kala ngalāngda ashee kala tara̱ sokkhuihaowa. ^a a v34 Johnna ithumli hi apāng eina theikahaina da hāngmi, kala hi Jishu shaikhavaila thihaira kaji shākhi thāda chitheimi. ³⁵Nathumnala shitsangpai khavai, mik eina kathei ana shākhi mihaira. Awui shākhi hi khamashungana, kala ana khamashung tui matui kaji ana thei. ³⁶Kaja otbing hi Kathara Lairik chi ungshung khavai shokkahaina: "Awui ara̱kui akhala khamā za̱mara." ³⁷Kala khangatei Kathara Lairik akhana hānglui, "Athumna rungthat kahaiapā chili khayangra."

Joseph eina Nicodemus

³⁸Chiwui thili, Jihudibingli ngacheewui vang ngathumda Jishuwui sākhangatha̱ sākasapā Arimatheawui Josephna Pilateli Jishuwui angun khuithui khavai apoi. Pilatena mayāhaowa, chieina ana angun chi khuithuihaowa. ³⁹Khare Jishuli thangngayā rāhāngkasā Nicodemusla myrrh eina aloe manāt kahai kg. thumrāda mati sha̱kha khuiphungda rai. ⁴⁰Athumna Jishuwui angun chi khuilaga, Jihudiwui chifa khangachā athishurda nganamkaphā thaoyur eina ngasoda khamanaka kachon eina khaluihai. ⁴¹Ali shaoshān kahaipamli yāmgui akha leisai, kala yāmgui chili mi khipālikha machizanlakrang kaji chikhur kadhar akha leisai. ⁴²Jihudiwui Khangarān kasā zimiksho sāhaoda, kala chikhur chila nganaihaowui vang, athumna Jishuli chili chizana.